19–20 Sentyabr 2023-cü il antiterror əməliyyatının 2-ci ildönümü: Suverenliyin və ədalətin təntənəsi

Bakı:

11 °C

82 %

4 m/s

AZ RU EN

Ana səhifə / YAP xəbərləri / 19–20 Sentyabr 2023-cü il antiterror əməliyyatının 2-ci ildönümü: Suverenliyin və ədalətin təntənəsi

19–20 Sentyabr 2023-cü il antiterror əməliyyatının 2-ci ildönümü: Suverenliyin və ədalətin təntənəsi

23.09.2025 [18:47]

Azərbaycan tarixinin ən şanlı səhifələrindən biri – 19–20 sentyabr 2023-cü il antiterror əməliyyatının icrasından bu gün iki il keçir. Cəmi 24 saat davam edən bu qətiyyətli hərbi əməliyyat nəticəsində Qarabağda qondarma rejim ləğv olundu, Ermənistan ordusunun qanunsuz silahlı birləşmələri məhv edildi, Azərbaycanın dövlət suverenliyi tam bərpa olundu.

Terrora qarşı cavab – haqqın və ədalətin bərpası

Əməliyyatın başlanmasına səbəb 2023-cü il sentyabrın 19-da erməni silahlı birləşmələrinin törətdiyi növbəti terror aktı oldu. Mina partlayışı nəticəsində iki mülki şəxs daxil olmaqla altı Azərbaycan vətəndaşı şəhid oldu. Bu, Ermənistanın İkinci Qarabağ müharibəsindən sonra törətdiyi yüzlərlə mina terroru hadisələrindən sadəcə biri idi.

Prezident İlham Əliyev cənablarının xalqa müraciətində vurğuladı ki, bu minalar məqsədyönlü şəkildə Azərbaycana qarşı terror aktı həyata keçirmək üçün gətirilmişdi. Azərbaycan Ordusu isə dərhal lokal xarakterli antiterror tədbirlərinə başladı və qarşıya qoyulan bütün vəzifələr qısa müddətdə icra olundu.

Qəhrəman Azərbaycan Ordusu

Əməliyyat zamanı Silahlı Qüvvələrimiz peşəkarlıq, şücaət və fədakarlıq nümunəsi göstərdi. Uzun illər ərzində möhkəmləndirilmiş istehkamların mövcudluğuna, əlverişli relyefin düşmən tərəfdə olmasına baxmayaraq, Azərbaycan Ordusu qısa müddətdə strateji üstünlüyü ələ aldı.

Ən mühüm məqamlardan biri isə mülki əhalinin tam qorunması idi. Prezident İlham Əliyev cənablarının xüsusi tapşırığı ilə hərbi zərbələr yalnız qanunsuz hərbi obyektlərə endirildi, mülki infrastruktura zərər vurulmadı. Bu, həm Azərbaycan dövlətinin humanist siyasətinin, həm də ordumuzun yüksək dəqiqliyinin bariz nümunəsi oldu.

Kriminal xuntanın sonu

Antiterror tədbirləri nəticəsində Ermənistan ordusuna məxsus yüzlərlə tank, zirehli texnika, artilleriya qurğusu məhv edildi. Qarabağda qanunsuz fəaliyyət göstərən separatçı xunta rejimi təslim oldu və onun “status” iddialarına birdəfəlik son qoyuldu. Prezident İlham Əliyev həmin gün xalqa müraciətində bir daha bəyan etdi:
“Status cəhənnəmə getdi! Qarabağ Azərbaycandır!”

Bu sözlər yalnız siyasi bəyanat deyil, həm də yeni reallığın təsdiqi idi.

Sülhə doğru yeni mərhələ

Antiterror əməliyyatı təkcə separatçılığın aradan qaldırılması deyil, həm də Cənubi Qafqazda yeni geosiyasi reallığın formalaşması demək idi. Ermənistan rəhbərliyi artıq açıq şəkildə Qarabağın Azərbaycanın ayrılmaz hissəsi olduğunu qəbul edib. Bu, bölgədə sülh müqaviləsinə doğru atılan ən mühüm addımlardan biri kimi qiymətləndirilir.

Prezident İlham Əliyev cənablarının qeyd etdiyi kimi, Ermənistanın son dövrdə göstərdiyi siyasi səriştə sülh prosesinə müsbət təsir edə bilər. Əgər qarşı tərəf revanşist meyillərdən imtina edərsə, yaxın gələcəkdə Azərbaycan və Ermənistan arasında sülh müqaviləsinin imzalanması real görünür.

Prezident İlham Əliyev cənablarının 20 sentyabr tarixli müraciətində vurğuladı: “19–20 sentyabr antiterror əməliyyatı Azərbaycan xalqının iradəsinin, dövlətin gücünün və ordunun qəhrəmanlığının tarixi nümunəsi olaraq torpaqlarımızın bütövlüyünü təmin etdi, xunta rejiminə son qoydu və bölgədə sülh üçün yeni reallıq yaratdı.”

Bu gün, əməliyyatın 2-ci ildönümündə Azərbaycan xalqı bir daha qürurla deyir:

“Qarabağ Azərbaycandır!”

Abbas Pənahov,

Yeni Azərbaycan Partiyası Nəsimi rayon təşkilatının sədr müavini

Paylaş:

Baxılıb: 452 dəfə