Füzuli şəhərinin bərpası və yenidən qurulması

Bakı:

28 °C

45 %

2 m/s

Əlaqə

AZ RU EN

Ana səhifə / YAP xəbərləri / Füzuli şəhərinin bərpası və yenidən qurulması

Füzuli şəhərinin bərpası və yenidən qurulması

15.10.2025 [14:43]

Mansur Quliyev

YAP Ağdam rayon təşkilatının sədri

Azərbaycanın Qarabağ bölgəsində həyatın yenidən canlanması, doğma torpaqlarımızın dirçəldilməsi, dağıdılmış şəhər və kəndlərimizin bərpası bu gün Prezident İlham Əliyevin rəhbərliyi ilə həyata keçirilən milli dirçəlişin ən böyük simvollarından biridir. İşğaldan azad olunmuş Füzuli şəhərinin bərpası və yenidən qurulması bu prosesin önündə gedən nümunəvi layihələrdəndir. Bu möhtəşəm yenidənqurma işlərində qardaş ölkələrin, xüsusilə də Qazaxıstan Respublikasının dəstəyi xüsusi minnətdarlıqla qeyd olunmalıdır. Füzuli şəhəri bu gün təkcə Azərbaycan xalqının deyil, bütün Türk dünyasının qürur mənbəyinə çevrilib. Qardaş Qazaxıstanın bu qədim Azərbaycan torpağında “Qazaxıstan” məktəbinin inşası kimi nəcib təşəbbüsü xalqlarımız arasındakı sarsılmaz dostluq və qardaşlıq münasibətlərinin bariz təzahürüdür. Bu addım təkcə bir təhsil ocağının yaradılması deyil, eyni zamanda mənəvi körpüdür – iki xalq arasında dostluq, qarşılıqlı hörmət və birliyə xidmət edən tarixi bir simvoldur. Azərbaycan və Qazaxıstan münasibətləri ümummilli lider Heydər Əliyevin və Qazaxıstanın görkəmli dövlət başçısı Nursultan Nazarbayevin müəyyənləşdirdiyi strateji əməkdaşlıq və qarşılıqlı etimad prinsiplərinə əsaslanır. Bu gün həmin ənənə Prezident İlham Əliyev və Qazaxıstan Prezidenti Kasım-Jomart Tokayev tərəfindən uğurla davam etdirilir. Hər iki liderin siyasi iradəsi nəticəsində ölkələrimiz arasında münasibətlər yüksələn xətt üzrə inkişaf edir, Türk dünyasında birliyin möhkəmlənməsinə real töhfələr verilir. Füzuli şəhərində Qazaxıstanın dəstəyi ilə həyata keçirilən sosial layihələr, təhsil və mədəniyyət infrastrukturunun bərpası təkcə humanitar yardım deyil, həm də ümumtürk həmrəyliyinin təntənəsidir. Bu təşəbbüslər bir daha göstərir ki, Türk dövlətləri ailəsinin üzvləri təkcə beynəlxalq platformalarda deyil, həm də həyati məsələlərdə – dağıdılmış şəhərlərin dirçəldilməsində, insanların doğma yurdlarına dönüşündə bir-birinin yanında dayanır. Bu gün Füzuli şəhəri müasir memarlıq üslubunda inşa edilən, ağıllı texnologiyalara əsaslanan, yaşıl enerji prinsiplərinə söykənən yeni bir mərkəzə çevrilməkdədir. Burada ucaldılan hər bina, salınan hər küçə azadlığımızın, suverenliyimizin və xalqlarımız arasındakı qardaşlığın simvoludur. Qazaxıstan xalqının bu müqəddəs işdə iştirak etməsi isə Füzulinin taleyində silinməz iz buraxır. Füzuli şəhəri günü təkcə bir coğrafi məkanın bayramı deyil bu, həm də yenidən doğulan Azərbaycan ruhunun, Türk birliyinin və mədəni həmrəyliyin bayramıdır.

Bu münasibətlə Qazaxıstan Respublikasına və bütün qardaş qazax xalqına dərin minnətdarlığımızı bildiririk. Qoy dostluğumuz daim möhkəm olsun, Füzuli kimi şəhərlərimiz isə bu qardaşlığın əbədi rəmzinə çevrilsin!

Paylaş:

Baxılıb: 553 dəfə