Qürurumuzun və Qəhrəmanlığımızın rəmri: Füzuli Şəhəri

Bakı:

27 °C

61 %

8 m/s

Əlaqə

AZ RU EN

Ana səhifə / YAP xəbərləri / Qürurumuzun və Qəhrəmanlığımızın rəmri: Füzuli Şəhəri

Qürurumuzun və Qəhrəmanlığımızın rəmri: Füzuli Şəhəri

16.10.2025 [20:50]

Azərbaycan Respublikasının tarixinə qızıl hərflərlə yazılan günlərdən biri də 17 oktyabr 2020-ci il tarixidir. Həmin gün rəşadətli Azərbaycan Ordusu uzun illər işğal altında qalan Füzuli şəhərini və onun ətraf kəndlərini düşmən tapdağından azad etdi. Bu tarixi hadisə təkcə bir şəhərin azad olunması deyil, həm də Qarabağ uğrunda gedən Vətən müharibəsində mühüm bir dönüş nöqtəsi idi.

Füzuli rayonu Azərbaycanın Qarabağ bölgəsində, Araz çayı vadisində yerləşir. Zəngin tarixə, mədəniyyətə və təbiət gözəlliklərinə malik olan bu torpaq 1993-cü ildə Ermənistan silahlı qüvvələri tərəfindən işğal edilmişdi. İşğal nəticəsində şəhər tamamilə viran edilmiş, yaşayış evləri, məktəblər, mədəniyyət ocaqları və tarixi abidələr dağıdılmışdı. Minlərlə füzulili məcburi köçkün kimi Azərbaycanın müxtəlif bölgələrinə səpələnmişdi.

2020-ci ilin sentyabr ayında başlayan 44 günlük Vətən müharibəsi zamanı Azərbaycan Ordusu Ali Baş Komandan İlham Əliyevin rəhbərliyi ilə əzmlə irəliləyərək Füzuli istiqamətində düşmənin möhkəmləndirilmiş müdafiə xəttini yarıb keçdi. Füzulinin azad olunması çox çətin və şərəfli döyüşlərin nəticəsi idi. 17 oktyabr tarixində Ölkə Prezidenti cənab İlham Əliyev xalqa müraciətində bu möhtəşəm qələbəni elan etdi.

Bu qələbə həm hərbi, həm də strateji baxımdan mühüm əhəmiyyət kəsb edirdi. Füzuli şəhərinin azad edilməsi Şuşaya aparan yolun açılmasına, cəbhənin gedişatının dəyişməsinə səbəb oldu. Məhz bu uğurlu əməliyyatlardan sonra Azərbaycan Ordusu Şuşa şəhərinə doğru irəliləməyə başladı və nəticədə Qarabağ münaqişəsi Azərbaycanın qəti qələbəsi ilə başa çatdı.

Füzuli şəhəri azad olunduqdan sonra burada genişmiqyaslı yenidənqurma və bərpa işlərinə start verildi. Azadlığa qovuşmuş şəhərin xarabalığından yeni həyat doğmağa başladı. Bu gün Füzuli müasir şəhər planlaşdırılması ilə fərqlənən, ağıllı infrastruktur layihələri ilə abadlaşdırılan bir məkana çevrilir. Qısa müddətdə Füzuli Beynəlxalq Hava Limanı inşa olundu və istifadəyə verildi. Yeni yollar, körpülər, yaşayış evləri, məktəblər, xəstəxanalar tikilir. Əhalinin doğma yurdlarına qayıdışı üçün şərait yaradılır.

Hər il 17 oktyabr tarixi Füzuli şəhəri günü kimi qeyd olunur. Bu gün dövlət səviyyəsində tədbirlər keçirilir, şəhidlərin əziz xatirəsi anılır, qəhrəmanlıq salnaməsi nəsillərə çatdırılır. Füzuli şəhəri günü həm də Azərbaycan xalqının birlik, mübarizlik və qələbə iradəsinin simvoluna çevrilib.

Bu gün Füzuli yalnız bir coğrafi məkan deyil, qürurumuzun və qəhrəmanlığımızın rəmzidir. Onun yenidən dirçəlməsi, inkişaf etməsi Azərbaycanın gücünü, dövlətin əzmini və xalqın vətən sevgisini bir daha nümayiş etdirir.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 589 dəfə