Elmin inkişafına daim böyük diqqət göstərilir

Bakı:

29 °C

37 %

1 m/s

Əlaqə

AZ RU EN

Ana səhifə / YAP xəbərləri / Elmin inkişafına daim böyük diqqət göstərilir

Elmin inkişafına daim böyük diqqət göstərilir

06.11.2025 [13:43]

Dövlət başçısı İlham Əliyev noyabrın 3-də Azərbaycan Milli Elmlər Akademiyasının 80 illik yubiley yığıncağında iştirak etdi. “Azərbaycan alimləri bundan sonra da ölkəmizin uğurlu inkişafına öz töhfələrini verəcəklər” söyləyən cənab İlham Əliyev bildirdi ki, Akademiya 80 il ərzində böyük yol keçmiş, Azərbaycanda elmin inkişafında aparıcı rol oynamışdır. Bu illər ərzində biz müxtəlif ictimai-siyasi quruluşlarda yaşasaq da, Azərbaycan hər zaman öz elminin inkişafına böyük diqqət yetirirdi.

Ulu Öndər Heydər Əliyev hər zaman Azərbaycan alimlərini dəstəkləmək üçün öz səylərini əsirgəmirdi. Hələ ötən əsrin 70-ci illərində onun rəhbərliyi ilə Akademiyanın fəaliyyəti təkmilləşdi, bir neçə yeni elmi-tədqiqat institutu yaradıldı, elmin inkişafına böyük vəsait ayrılırdı. Ulu Öndərin təşəbbüsü ilə həmin illərdə yüz minlərlə Azərbaycan gənci Sovet İttifaqının aparıcı ali məktəblərinə göndərilmişdir və ölkəmizdə intellektual potensial daha da güclənmişdir. Eyni siyasət müstəqillik illərində də davam etdirilir. Bu gün də on minlərlə Azərbaycan gənci artıq dünyanın aparıcı ali məktəblərində təhsil alır. Onların böyük əksəriyyəti oxuyub Vətənə qayıdırlar və ölkəmizin inkişafına öz dəyərli töhfələrini verirlər.

Azərbaycanın inkişaf yolundan bəhs edərkən müstəqilliyimizin ilk illərində yaşananları qeyd etməmək mümkün deyil. O illərdə Azərbaycanda xaos, anarxiya, özbaşınalıq hökm sürür, ölkəmiz müstəqilliyini itirmək təhlükəsini yaşayırdı. Məhz bu çətin dövrdə Ulu Öndər Heydər Əliyevin qətiyyəti, iradəsi, xalqa olan bağlılığı bizi böyük bəlalardan qurtara bildi. Dövlət başçısı İlham Əliyev sözügedən çıxışında qeyd etdi ki, müstəqilliyin ilk illəri çox ağır, faciəvi idi. O da çox böyük göstəricidir ki, Ümummilli Liderin hakimiyyətə qayıdışından sonra Azərbaycan ziyalıları, Azərbaycan ictimaiyyəti ilə ilk görüşü məhz 1993-cü ildə Milli Elmlər Akademiyasında olmuşdur. Beləliklə, o, bir daha müstəqil Azərbaycanın, yəni, yeniləşən Azərbaycanın prioritetlərini açıq şəkildə bəyan etmişdir. Düzdür, o vaxt maliyyə imkanlarımız çox məhdud idi. Demək olar ki, yox idi, xəzinə boş idi. Azərbaycan böyük humanitar fəlakətlə üz-üzə idi. Bir milyondan çox qaçqın və məcburi köçkün, torpaqlarımızın işğal altına düşməsi və çox böyük iqtisadi, maliyyə çətinlikləri o dövrün reallıqları idi. Amma buna baxmayaraq, yenə də Akademiyanın işinə, Akademiyanın qorunmasına, alimlərin fəaliyyəti üçün vəsait ayrılırdı.

Prezident İlham Əliyev onu da qeyd etdi ki, son on il ərzində Azərbaycan elminə ayrılan vəsait iki dəfədən çox artıb. İllər keçdikcə, Azərbaycan inkişaf etdikcə vəsait daha böyük həcmdə ayrılır: “Mənim prezidentlik dövrümdə də bu istiqamətdə, yəni, Azərbaycan elminin inkişafına göstərilən diqqət Ulu Öndərin siyasətinə uyğun şəkildə aparıldı. Bir çox addımlar atıldı. Akademiyanın maddi-texniki bazası möhkəmləndirilmişdir və burada yerləşən, bu akademiya şəhərciyində yerləşən binaların təmiri aparıldı. Elmə aidiyyəti olmayan, akademiyanın bəzi binalarını zəbt etmiş qurumlar buradan çıxarıldı. Yeni böyük elmi kitabxana, Milli Ensiklopediya üçün yeni bina inşa edilmişdir. Elmi-tədqiqat institutlarının təmiri və avadanlıqlarla təchizi təmin edilmişdir. Elm Fondu hələ 2009-cu ildə yaradılmışdır. O vaxt bu Fondun yaradılmasının əsas məqsədi Azərbaycan alimlərinə maddi dəstək vermək, elmin inkişafına qrantlar çərçivəsində təkan vermək idi”.

Elmin inkişafı üzrə Milli Strategiya, “Elm haqqında” Qanun və Dövlət Proqramı qəbul edildi. Görülmüş bütün işlərin hamısını təbii ki, sadalamaq mümkün deyil. Sadəcə bu əsas məqamı qeyd etmək lazımdır ki, bütün başqa sahələrdə olduğu kimi, bu istiqamətdə də Heydər Əliyev siyasəti davam edir, yaşayır, yeni formalarla zənginləşir.

Dövlət başçısı İlham Əliyevin çıxışında elmin inkişafı ilə bağlı səsləndirilən çağırışlardan ümumi nəticə bu oldu ki, bu gün biliyə əsaslanan, innovativ və milli maraqlara xidmət edən elmi sistemin formalaşdırılması əsas vəzifələrdəndir. Azərbaycanın hər dövrün tələblərini yüksək səviyyədə yerinə yetirməsi dayanıqlı inkişafın təmin edilməsində əsas amildir.

Etibar Hacıyev

YAP Ağstafa rayon təşkilatının sədri

Paylaş:

Baxılıb: 644 dəfə