Bakı və Abşeronda gecikmiş problemin qəti həlli

Bakı:

16 °C

94 %

3 m/s

Əlaqə

AZ RU EN

Ana səhifə / YAP xəbərləri / Bakı və Abşeronda gecikmiş problemin qəti həlli

Bakı və Abşeronda gecikmiş problemin qəti həlli

14.01.2026 [18:02]

Yanvarın 12-də cənab Prezident İlham Əliyevin sədrliyi ilə keçirilən müşavirə bir daha sübut etdi ki, müasir dövrdə su təkcə təbii sərvət deyil – dövlətin idarəçilik mədəniyyətinin, siyasi uzaqgörənliyinin və sosial məsuliyyətinin ölçü vahididir. Bakı şəhəri və Abşeron yarımadasında su təchizatı, tullantı və yağış suları sistemlərinin təkmilləşdirilməsinə dair 2026–2035-ci illəri əhatə edən Dövlət Proqramına həsr olunmuş bu müşavirə əslində paytaxtın və yarımadanın gələcəyinə yazılan strateji sənədin ictimai təqdimatı idi.

Cənab Prezident İlham Əliyev çıxışında ilk cümlələrdən mövzunun mahiyyətini dəqiq ifadə etdi: “Bu gün biz Bakı şəhərinin və Abşeron yarımadasının su problemlərinin həlli məsələlərini müzakirə edəcəyik. Bu, həyata keçirilən infrastruktur layihələri arasında xüsusi yer tutan məsələdir.” Bu vurğu onu göstərdi ki, söhbət lokal texniki çatışmazlıqlardan deyil, ölkənin ən böyük urbanistik məkanında həyatın dayanıqlığından gedir. Cənab Prezident İlham Əliyevin çıxışında son 20 ilin inkişaf yoluna qısa, lakin tutumlu ekskurs edildi. Enerji, qaz, yol, su infrastrukturu sahəsində bir vaxtlar mövcud olan problemlər xatırladıldı və bu problemlərin mərhələli şəkildə necə aradan qaldırıldığı göstərildi. Dövlət başçısının sözləri ilə desək: “Bu gün bizim enerji generasiya gücümüz tələbatımızdan daha artıqdır. Azərbaycan bir neçə ildən sonra elektrik enerjisini dünya bazarlarına ixrac edəcək.” Bu fikir sadəcə statistik göstərici deyil. Bu, idarə olunan xaosdan planlı inkişaf mərhələsinə keçidin siyasi manifestidir. Cənab Prezident bu nümunə ilə su sektorunda da eyni uğurun mümkünlüyünü cəmiyyətə açıq şəkildə çatdırır. Dövlətimizin başçısının çıxışında xüsusi yer tutan mövzulardan biri də işğal dövründə su resurslarının Ermənistana siyasi təzyiq alətinə çevrilməsi idi. Dövlət başçısı bunu açıq şəkildə ifadə etdi. Bildirdi ki, “Vaxtilə Ermənistan dövləti bizə qarşı su terroru da həyata keçirirdi.” “Sərsəng” və “Suqovuşan” su anbarlarının sudan silah kimi istifadə olunması bir daha göstərdi ki, su məsələsi təkcə ekoloji yox, təhlükəsizlik məsələsidir. Bu gün həmin anbarların bərpası, yeni su anbarlarının tikilməsi Azərbaycanın suverenliyinin infrastruktur səviyyəsində bərqərar olmasının bariz nümunəsidir.

Cənab Prezidentin vurğuladığı kimi, Füzuli, Ağdam, Laçın və digər azad edilmiş ərazilərdə su təsərrüfatının yenidən qurulması bu torpaqlara yalnız insanların yox, həyatın qayıdışıdır. Dövlət başçısının çıxışında iqlim dəyişikliyi məsələsinə toxunulması təsadüfi deyil. Prezident İlham Əliyev açıq şəkildə bildirdi ki, dünyada su ilə bağlı risklər artır və bu reallıq nəzərə alınmalıdır: “Əgər vaxtında bu addımlar atılmasaydı, bu gün su təhlükəsizliyimizlə bağlı olan məsələlər bizim üçün çox ciddi problemlər yarada bilərdi.” Bu fikirlər göstərir ki, Azərbaycan dövləti hadisələrin arxasınca getmir, onları qabaqlayan siyasət yürüdür. Yeni Dövlət Proqramı da məhz bu yanaşmanın məhsuludur. Prezident İlham Əliyev Bakı və Abşeron yarımadasının su problemlərinin uzun illər davam etdiyini gizlətmədi. Əksinə, məsuliyyətlə etiraf etdi və qəti qərar ortaya qoydu: “Vaxt gəlib çatıb ki, genişmiqyaslı və müfəssəl dövlət proqramı qəbul edilsin.” 2035-ci ilə qədər nəzərdə tutulan proqram paytaxt və ətraf ərazilər üçün tamamilə yeni su fəlsəfəsi formalaşdırır. 30-a yaxın yeni su anbarı, 100 faiz sayğaclaşdırma, fasiləsiz su təminatının 95 faizə çatdırılması, su itkilərinin kəskin azaldılması – bütün bunlar Bakının gələcək urbanistik modelini müəyyənləşdirən əsas göstəricilərdir. Leysan yağışları zamanı Bakının üzləşdiyi problemlər cənab Prezidentin çıxışında xüsusi yer aldı. Dövlət başçısı bu problemin qlobal xarakter daşıdığını desə də, zəif cəhətlərin mövcudluğunu da açıq etiraf etdi: “Buna baxmayaraq, bizim də bu sahədə zəif yerlərimiz kifayət qədər çoxdur.” 30 küçədə yeni yağış kollektorlarının qurulması, kanalizasiya şəbəkəsinin genişləndirilməsi, dənizə axıdılan suların 100 faiz təmizlənməsi şəhər mədəniyyətinin və ekoloji məsuliyyətin yeni mərhələsidir. Cənab Prezident İlham Əliyevin çıxışında xüsusi diqqət çəkən məqam ölkədə ilk dəfə duzsuzlaşdırma zavodunun inşası oldu. Ölkə başçısının sözləri bu layihənin mahiyyətini açır: “Bu imkan verəcək ki, biz Bakıya və Abşeron yarımadasına gələn suların həcmini artıraq.” Rəqəmsal idarəetmə sisteminin tətbiqi isə su sektorunda şəffaflığın və effektivliyin təminatıdır. Bu, həm itkilərin qarşısının alınması, həm də ictimai etimadın gücləndirilməsi deməkdir.

Yanvarın 12-də keçirilən müşavirə bir daha göstərdi ki, su məsələsi cənab Prezident İlham Əliyevin siyasi gündəmində texniki mövzu deyil, dövlətçilik məsələsidir. Bakı və Abşeron yarımadası üzrə Dövlət Proqramı yalnız boruların dəyişməsi yox, şəhərin həyat keyfiyyətinin yenidən yazılmasıdır. Bu proqram həyata keçdikcə Bakının suyu da, sabahı da daha güvənli olacaq. Çünki bu yol məsuliyyətli dövlət ağlı ilə başlayan və xalq rifahına aparan yoldur.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 289 dəfə