YAP Gənclər Birliyinin “Yay məktəbi” Lerikdə

Bakı:

21 °C

49 %

1 m/s

Əlaqə

AZ RU EN

Ana səhifə / YAP xəbərləri / YAP Gənclər Birliyinin “Yay məktəbi” Lerikdə

YAP Gənclər Birliyinin “Yay məktəbi” Lerikdə

08.07.2014 [10:25]

Yeni Azərbaycan Partiyası (YAP) Gənclər Birliyinin “Gənc Liderlər” gənc siyasətçilər üçün “Yay məktəbi” layihəsinə start verilib. Hər il olduğu kimi, bu il də “Yay məktəbi” ölkəmizin gözəl guşələrində təşkil olunur. İyulun 6-dan 11-dək davam edəcək layihə çərçivəsində 100-ə yaxın fəal gənc Lerik rayonunda olacaq.
İyulun 6-da “Yay məktəbi”nin açılışı olub. YAP Siyasi Şurasının üzvü, “İki sahil” qəzetinin Baş redaktoru, Əməkdar jurnalist Vüqar Rəhimzadənin rəhbərlik etdiyi qrup öncə rayon mərkəzində müstəqil Azərbaycanın qurucusu, Yeni Azərbaycan Partiyasının yaradıcısı Ümummilli lider Heydər Əliyevin abidəsini ziyarət edərək önünə gül-çiçək dəstələri düzüblər. Eyni zamanda, layihə iştirakçıları Heydər Əliyev Mərkəzində də olublar.
Sonra rayon ərazisində yerləşən “Relax” istirahət mərkəzində “Gənc Liderlər” Gənc Siyasətçilər üçün “Yay məktəbi” layihəsinin açılış mərasimində çıxış edən qrup rəhbəri, YAP Siyasi Şurasının üzvü, “İki sahil” qəzetinin Baş redaktoru Vüqar Rəhimzadə layihənin əhəmiyyətindən, gənclərin bilik və bacarıqlarının artırılmasındakı rolundan geniş bəhs edib. Bildirib ki, YAP rəhbərliyi gənclərin siyasi fəallığının artırılması, asudə vaxtlarının səmərəli təşkili, beynəlxalq əlaqələrin genişlənməsi, ümumiyyətlə, ayrı-ayrı sahələr üzrə müxtəlif layihələrin həyata keçirilməsinə xüsusi diqqət yetirir. Bu layihələr sırasında 2007-ci ildən başlayaraq hər il keçirilən yay və qış liderlik məktəblərini xüsusi qeyd etmək lazımdır. Bu layihələrin əsas məqsədi Azərbaycan ərazisində yaşayan bütün gənclərin biri-birini daha yaxından tanımasını, onların arasında səmimi münasibətlərin yaradılmasını, ölkədə ictimai həyatın istənilən sahəsində dinamik inkişaf haqqında onlara dolğun məlumatların çatdırılmasını, tanınmış siyasətçilərlə gənclərin görüşlərinin təşkilini təmin etməkdir.
V.Rəhimzadə qeyd edib ki, gənclərimiz onlar üçün yaradılan bu şəraitdən səmərəli istifadə etməli, günbəgün qüdrətlənən, güclənən Azərbaycana öz töhfələrini verməlidirlər. Bunun üçün gənclər elmin sirlərinə dərindən yiyələnməli, ölkənin ictimai-siyasi həyatında fəal iştirak etməli, ən əsası, Azərbaycan reallıqlarının təbliğində fəal olmalıdırlar. Azərbaycan gəncləri böyük qüvvədir. Birgə səylər qarşıya qoyulan hər bir məqsədə yüksək səviyyədə nail olmağa stimul verir.
Açılış mərasimində çıxış edən YAP İcra katibliyinin baş təlimatçısı Rəfail Gülməmmədov və YAP GB-nin layihələr üzrə koordinatoru Leyla Kərimova layihə çərçivəsində nəzərdə tutulan seminarlar, təlimlər barədə iştirakçı gənclərə ətraflı məlumat veriblər. L.Kərimova, eyni zamanda, layihə çərçivəsində gənclərin istirahətini nəzərdə tutan intellektual oyunların, yarışların da proqrama daxil edildiyini bildirib.
“Yay məktəbi”nin ikinci günündə Yeni Azərbaycan Partiyası Gənclər Birliyinin “Gənc Liderlər” gənc siyasətçilər üçün “Yay məktəbi” layihəsi çərçivəsində “Ulu öndər Heydər Əliyevin ideyaları və müasir dövlət quruculuğunda gənclərin rolu” mövzusunda seminar keçirilib.
YAP Siyasi Şurasının üzvü, “İki sahil” qəzetinin Baş redaktoru Vüqar Rəhimzadə dahi şəxsiyyət Heydər Əliyevin dövlətimiz, xalqımız qarşısındakı xidmətlərindən, gələcəyə hesablanmış inkişaf strategiyasından geniş bəhs edib. Bildirib ki, Ulu öndər Heydər Əliyevin ideyaları Azərbaycanın dünəninin, bu gününün və sabahının əsasıdır. Bu ideyalar müstəqil Azərbaycanımıza biri-birindən əhəmiyyətli uğurlar qazandırır.
V.Rəhimzadə bildirib ki, gənclərə diqqət və qayğı Ulu öndər Heydər Əliyevin hakimiyyətinin hər iki dövründə fəaliyyətinin əsas istiqaməti olub.
Qeyd olunub ki, Ulu öndər Heydər Əliyevin siyasi kursunu uğurla davam etdirən Prezident İlham Əliyev gənclərin böyük qüvvə olduğunu, eyni zamanda, müasir dövrün informasiya-kommunikasiya texnologiyaları əsri olduğunu önə çəkərək, yüksək ixtisaslı gənclərin yetişdirilməsini qarşıya mühüm vəzifə kimi qoyur. Prezident İlham Əliyevin Sərəncamı ilə təsdiqlənən “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” Azərbaycan gənclərinin intellektual səviyyəsinin artırılmasına, elmi biliklərə dərindən yiyələnmələrinə, dünyanın qabaqcıl ölkələrinin təcrübəsini öyrənib, ölkəmizdə tətbiqinə, eyni zamanda, yeni texnologiyaların mənimsənilməsinə xidmət edir. “Azərbaycan gəncliyi 2011-2015-ci illərdə Dövlət Proqramı”nda gənclərin gələcəyi üçün zəruri olan bütün addımların atılması öz əksini tapıb. Ölkə Prezidenti İlham Əliyevin Fərmanı ilə Gənclər Fondu yaradılıb. Bütün bunlar onu təsdiqləyir ki, gənclərə diqqət və qayğı davamlıdır.
V.Rəhimzadə bildirib ki, gənclər bu diqqət və qayğıdan bəhrələnərək, öz potensiallarını ortaya qoymalı, Azərbaycanın daha da qüdrətlənməsinə, möhkəmlənməsinə töhfələrini verməlidirlər.
Seminarda gənclərdən Vüsal Əliyev, Aysel Məmmədova, Xətai Abdullayev, Şahnaz Hacıyeva, Lütfiyyə Mustafayeva, Ramin Həsənov, Elvin Dadaşov, Vəfa Ələkbərova, Vüsal Rzayev və başqaları çıxış edərək, Ulu öndər Heydər Əliyevin ideyalarından və müasir dövlət quruculuğundan danışaraq, onlara olan diqqət və qayğını yüksək qiymətləndiriblər.
Diskussiya şəklində davam edən seminarda gəncləri maraqlandıran suallar da cavablandırılıb. Sonra gənclər arasında müxtəlif idman yarışları (futbol, üzgüçülük, stolüstü tennis) keçirilib. Günə interaktiv, intellektual, praktik oyunlarla yekun vurulub.

Paylaş:

Baxılıb: 1023 dəfə