Cəlilabad seçiciləri bələdiyyə seçkilərində YAP-ın namizədlərinə səs verəcəklər

Bakı:

23 °C

60 %

2 m/s

Əlaqə

AZ RU EN

Ana səhifə / YAP xəbərləri / Cəlilabad seçiciləri bələdiyyə seçkilərində YAP-ın namizədlərinə səs verəcəklər

Cəlilabad seçiciləri bələdiyyə seçkilərində YAP-ın namizədlərinə səs verəcəklər

03.12.2014 [09:34]

YAP Cəlilabad rayon təşkilatı tərəfindən irəli sürülmüş namizədlərlə görüş keçirilib
Yeni Azərbaycan Partiyası (YAP) Cəlilabad rayon təşkilatının Seçki Qərargahı bələdiyyə seçkiləri ilə əlaqədar təbliğat-təşviqat tədbirlərini davam etdirir. Bu kontekstdə dünən bələdiyyə üzvlüyünə namizədliyi verilmiş şəxslərlə və Seçki Qərargahının üzvləri ilə görüş keçirilib. Tədbirdə Milli Məclisin deputatı Malik Həsənov, “Yeni Azərbaycan” qəzetinin baş redaktoru Hikmət Babaoğlu, YAP İcra Katibliyinin məsul işçisi Məcid Əhmədov iştirak ediblər.
Tədbiri giriş sözü ilə açan YAP Cəlilabad rayon təşkilatının sədri Mirsüleyman Mirxaslı qeyd edib ki, Azərbaycan son illər ərzində dünyanın ən sürətlə inkişaf edən ölkələrindən birinə çevrilib: “Son 10 ildə Azərbaycanın iqtisadi artımı 3 dəfədən çox, büdcə xərcləri 20 dəfə artıb, yoxsulluq və işsizliyin səviyyəsi kəskin şəkildə azalıb. Azərbaycanın beynəlxalq arenada nüfuzu ildən-ilə artır və bu gün ölkəmiz dünyada ən etibarlı tərəfdaş kimi tanınır. Bu nailiyyətlərin fonunda əvvəlki seçkilərdə olduğu kimi, bu dəfə də Yeni Azərbaycan Partiyasının namizədlərinə etimadın yüksək olacağına ümid edirik”.
Sonra Milli Məclisin deputatı Malik Həsənov çıxış edərək bələdiyyə seçkilərinin mahiyyətindən bəhs edib, seçkilərin yüksək fəallıq şəraitində baş tutacağına əminliyini ifadə edib.
“Yeni Azərbaycan” qəzetinin baş redaktoru Hikmət Babaoğlu geniş məruzə ilə çıxış edərək qarşıdan gələn bələdiyyə seçkilərinin siyasi-hüquqi, sosial və mədəni əhəmiyyətindən danışıb, seçkiöncəsi ictimai-siyasi vəziyyəti analiz edib. Prezident İlham Əliyevin Sədri olduğu Yeni Azərbaycan Partiyasının cəmiyyətin bütün sahələrini əhatə edən səmərəli fəaliyyətindən bəhs edən Hikmət Babaoğlu əlavə edib ki, YAP sahib olduğu strateji resurslarla Azərbaycan siyasi sisteminin alternativsiz siyasi güc mərkəzidir: “YAP-ın 22 illik tarixi var və cəmiyyətə təqdim etdiyi dəyərlər, məqsədlər artıq siyasi ənənə kimi səciyyələndirə biləcəyimiz ideoloji tezislər vasitəsilə Azərbaycan xalqı tərəfindən mənimsənilib. Ona görə də, dekabrın 23-də keçiriləcək bələdiyyə seçkilərində də YAP-ın namizədləri qələbə qazanacaqlar”.
Tədbirdə Bələdiyyələri əlaqələndirmə şurasının sədri Bağış Mustafayev, YAP Cəlilabad rayon təşkilatı Gənclər Birliyinin üzvü Elçin Hüseynov, Qarazəncir kənd ərazi ilk partiya təşkilatının sədri Rəhimdil Həsənov, “Yeni Gün” rayon qəzetinin redaktoru Böyükxan Bağırov, YAP Cəlilabad rayon təşkilatı Qadınlar Şurasının sədri Fərqanə Məmmədova və digərləri çıxış edərək bələdiyyə seçkilərində partiyanın namizədlərinin qalib gələcəklərinə əminliklərini ifadə ediblər. Diqqətə çatdırılıb ki, bu seçkilərdə də YAP-ın qələbəsi şəksizdir.
NURLAN

Paylaş:

Baxılıb: 902 dəfə