Ermənistanla sərhəddə nəzarət-buraxılış məntəqəsinin yaradılması suverenliyimizin bərpası üçün önəmlidir

Bakı:

22 °C

54 %

1 m/s

AZ RU EN

Ana səhifə / YAP xəbərləri / Ermənistanla sərhəddə nəzarət-buraxılış məntəqəsinin yaradılması suverenliyimizin bərpası üçün önəmlidir

Ermənistanla sərhəddə nəzarət-buraxılış məntəqəsinin yaradılması suverenliyimizin bərpası üçün önəmlidir

26.04.2023 [12:37]

Məlum olduğu kimi, Azərbaycan Dövlət Sərhəd Xidməti Ermənistanla sərhəddə, Laçın-Xankəndi yolunun başlanğıcında sərhəd-buraxılış məntəqəsi yaradıb. Yerli siyasi tədqiqatçılar birmənlı şəkildə qeyd edirlər ki, Ermənistanla sərhəddəki məşhur Həkəri çayı üstündəki körpüdə sərhəd-buraxılış məntəqəsinin qurulması böyük tarixi hadisədir və mühüm əhəmiyyət kəsb edir. Bu qiymətləndirmə müxtəlif cəhətlərdən sübut oluna bilər.

Onu da vurğulamaq yerinə düşər ki, 44 günlük Vətən müharibəsindən sonra Azərbaycan imzalanmış üçtərəfli Bəyanata sadiq qalaraq üzərinə götürdüyü bütün öhdəlikləri yerinə yetirir. Qarşı tərəf isə sənədin müvafiq müddəalarına zidd olaraq, iki il yarımdır ki, öz silahlı qüvvələrini regiondan çıxarmır, əksinə orada olan qeyri-qanuni silahlı dəstələrin hərbi təchizatı ilə məşğul olur. Digər tərəfdən, Azərbaycan dəfələrlə bəyan edib ki, daxili işlərimizi heç bir ölkə ilə müzakirə etməyəcəyik. Dövlət başçısının bu günlərdə bəyan etdiyi kimi, Qarabağda yaşayan ermənilər ya Azərbaycan vətəndaşlığını qəbul etməlidirlər, ya da ki, özləri üçün başqa yaşayış yeri tapmalıdırlar. Bunu birmənalı olaraq erməni hakimiyyəti, separatçılar və onlara havadarlıq edən qüvvələr də başa düşməlidirlər!

Bu baxımdan, Ermənistanla sərhəddə nəzarət-buraxılış məntəqəsinin qurulması Azərbaycanın öz ərazisində suverenliyinin bərpası yönündə ən mühüm addımdır. Çünki Ermənistanla sərhədə beynəlxalq qanunlara uyğun şəkildə nəzarət edilməsi bir çox problemləri birdəfəlik həll edəcək. Birincisi, ölkə ərazisinə giriş-çıxış dövlət qurumlarımızın nəzarəti altında həyata keçiriləcək ki, bu da milli təhlükəsizliyimizin təmin edilməsinin başlıca şərtlərindən biridir. İkincisi, Ermənistan ərazisindən ermənilərin və üçüncü tərəflərin ərazimizə qeyri-qanuni şəkildə girişinin, Ermənistan ərazisindən ölkəmizə silah-sursat keçirilməsinin və hərbi qüvvə göndərilməsinin qarşısı birdəfəlik alınacaq.

Ən əsas gözlənti odur ki, Rusiya Federasiyasının sülhməramlı kontingetinin müvəqqəti nəzarətində olan bölgədəki separatçı ünsürlər, o cümlədən indiyə qədər Azərbaycan dövlətinə və vətəndaşlarına qarşı cinayət əməlləri törətmiş bütün şəxslər artıq Azərbaycan ərazisini özbaşına tərk edə bilməyəcəklər. Bir sözlə, Xankəndidə özlərinə sığınacaq tapmış bütün cinayətkarlar layiqli cəzalarını alacaqlar.

Bu vəziyyətə görə revanşist qüvvələrin Ermənistanda və ermənilərin güclü diaspora malik olan ölkələrdə saldığı hay-küyü nəzərə almasaq, ermənilərin əksəriyyətində artıq belə bir fikir çoxdan formalaşıb ki, Azərbaycan Prezidenti İlham Əliyev qarşısına qoyduğu bütün hədəflərə nail olub. Ermənistan siyasi hakimiyyəti də bunu anlayır ki, müasir dövrdə getdikcə sürətlənən qloballaşma şəraitində Avrasiyanın vahid iqtisadi- mədəni orqanizm kimi fəaliyyət göstərə bilməsi üçün ilk növbədə qarşılıqlı iqtisadi əlaqələrin daha səmərəli əsasda yenidən qurulması zərurəti var. Belə ki, Avrasiya miqyasında Cənubi Qafqaz regionunun və ayrılıqda Azərbaycanın iqtisadi, siyasi önəmi dəfələrlə artır. Regionda söz sahibi olan Azərbaycan bunu yaxşı başa düşür, inkişaf naminə sülhün vacib olduğunu bəyan edir. Artıq 2 ildən çoxdur sülh müqaviləsi imzalamaqdan boyun qaçıran Ermənistan da son hadisələrdən sonra reallığa daha adekvat yanaşsa, regionda sabitlik bərqərar olacaq.

Zamir Hüseynov,

Yeni Azərbaycan Partiyası Göygöl rayon təşkilatının sədr müavini

Paylaş:

Baxılıb: 460 dəfə