Azərbaycanın tranzit ölkə kimi beynəlxalq əhəmiyyəti artır

Bakı:

24 °C

47 %

1 m/s

Əlaqə

AZ RU EN

Ana səhifə / YAP xəbərləri / Azərbaycanın tranzit ölkə kimi beynəlxalq əhəmiyyəti artır

Azərbaycanın tranzit ölkə kimi beynəlxalq əhəmiyyəti artır

31.05.2023 [12:56]

Dövlət başçısı İlham Əliyevin mayın 25-də Moskvada Ali Avrasiya İqtisadi Şurasının geniş tərkibdə iclasına qonaq qismində dəvət edilməsi ölkəmizin beynəlxalq münasibətlər sistemində artan nüfuzunun göstəricisidir. Hər bir beynəlxalq əhəmiyyətli tədbir əhatə etdiyi sahəyə uyğun olaraq iştirakçı dövlətlərin malik olduqları imkanların təqdimatında əhəmiyyətli rol oynayır. Cənab İlham Əliyev iclasdakı çıxışında ölkəmizin iqtisadi tərəqqisini rəqəmlər əsasında diqqətə çatdırdı. Bu mühüm məqam da xüsusi qeyd edildi ki, Azərbaycan quruma üzv olmasa da Ermənistan istisna olmaqla, Avrasiya İqtisadi Birliyinin üzvləri ilə əməkdaşlığı 30 ildə uğurla inkişaf edir. Ötən il Azərbaycanın Avrasiya İqtisadi Birliyi ilə əmtəə dövriyyəsi 31 faiz artıb və 4,7 milyard dollar təşkil edib. Bu ilin yanvar-aprel aylarında qarşılıqlı ticarətin həcmi daha 38 faiz artıb. Ötən il Avrasiya İqtisadi Birliyinə üzv ölkələrin Azərbaycanın xarici ticarət dövriyyəsində payı 9 faizə yaxın olub. Əmtəə dövriyyəsinin gələcək artımında böyük potensialın olduğu bildirilir.

Ölkələr arasında əlaqələrin inkişafında nəqliyyat yolları mühüm amildir. Azərbaycanın tranzit ölkə kimi beynəlxalq əhəmiyyəti artır. Belə ki, ölkəmiz Şərq-Qərb və Şimal-Cənub nəqliyyat yollarının coğrafi kəsişməsində yerləşir. Azərbaycanın nəqliyyat-logistika infrastrukturu bütün istiqamətlərdə daşımaları həyata keçirməyə imkan verir. Azərbaycan Xəzərdə 50 gəmidən ibarət ən böyük ticarət donanmasına malikdir. On beş milyon ton yükün daşınmasına hesablanmış Ələt Dəniz Limanı yaxın vaxtlarda modernləşdiriləcək və yükaşırmaların həcmi 25 milyon tona çatacaq. Son zamanlar Azərbaycan ərazisindən yükdaşımaların artmasını nəzərə alsaq, bu, xüsusilə vacibdir. Bakıda artıq bir neçə ildir bütün növ gəmilər hazırlaya bilən müasir gəmiqayırma tərsanəsi fəaliyyət göstərir. Azərbaycanın gəmiqayırma imkanları bu gün Xəzərdəki qonşularımıza da təqdim olunub.

Dövlət başçısı İlham Əliyev iclasdakı çıxışında onu da qeyd etmişdir ki, Bakı-Tbilisi-Qars dəmir yolu Avropaya, həmçinin Türkiyənin Aralıq dənizi limanlarına çıxışı təmin edir. Azərbaycan “Şimal-Cənub” nəqliyyat dəhlizi layihəsinin fəal iştirakçısıdır. Azərbaycan, həmçinin ölkənin əsas hissəsini Naxçıvan Muxtar Respublikası ilə birləşdirəcək, həm də beynəlxalq dəmir yolu marşrutlarının bir hissəsi olacaq Zəngəzur dəhlizinin yaradılması təşəbbüsünü irəli sürüb. Azərbaycanda 8 beynəlxalq aeroport fəaliyyət göstərir. Onlardan ikisi işğaldan azad olunmuş torpaqlarda – Füzuli və Zəngilanda son iki ildə tikilib. Doqquzuncu beynəlxalq aeroport azad olunmuş Laçında tikilir və 2025-ci ildə istismara veriləcək.

Moskvada Azərbaycan, Rusiya və Ermənistanın liderlərinin üçtərəfli Zirvə görüşündə də əsas müzakirə mövzularından biri kommunikasiyaların açılması oldu. Ümumilikdə Moskva görüşü sülh müqaviləsinin imzalanması prosesinin yaxınlaşdığını təsdiqlədi. Dövlət başçısı İlham Əliyev bildirdi ki, Ermənistanın rəsmən Qarabağı Azərbaycanın tərkib hissəsi kimi tanıdığını nəzərə alsaq, sülh sazişinə nail olmaq üçün imkanlar var.

Etibar Hacıyev

YAP Ağstafa rayon təşkilatının sədri

Paylaş:

Baxılıb: 552 dəfə