Azərbaycan-Qırğızıstan münasibətlərində yeni strateji mərhələ: etimad, əməkdaşlıq və ortaq gələcək

Bakı:

26 °C

57 %

8 m/s

AZ RU EN

Ana səhifə / Xəbər lenti / Azərbaycan-Qırğızıstan münasibətlərində yeni strateji mərhələ: etimad, əməkdaşlıq və ortaq gələcək

Azərbaycan-Qırğızıstan münasibətlərində yeni strateji mərhələ: etimad, əməkdaşlıq və ortaq gələcək

02.08.2026 [00:23]

Azərbaycan Respublikasının Prezidenti cənab İlham Əliyevin 31 iyul 2026-cı il tarixində Qırğızıstan Respublikasına etdiyi dövlət səfəri təkcə ikitərəfli münasibətlərin inkişafı baxımından deyil, bütövlükdə Türk dünyasında inteqrasiyanın gücləndirilməsi baxımından da mühüm siyasi hadisə kimi qiymətləndirilməlidir. Səfər çərçivəsində keçirilən görüşlər, imzalanan sənədlər və dövlət başçılarının verdikləri bəyanatlar göstərdi ki, Azərbaycan ilə Qırğızıstan arasında münasibətlər artıq keyfiyyətcə yeni mərhələyə qədəm qoyub.

Prezident İlham Əliyevin mətbuata bəyanatında səsləndirdiyi "Müttəfiqlik münasibətləri çox böyük məsuliyyət deməkdir və biz bu məsuliyyətə hazırıq" fikri iki ölkə arasında formalaşmış yüksək etimadın və siyasi iradənin ifadəsidir. Müttəfiqlik yalnız dostluq münasibətlərini deyil, eyni zamanda beynəlxalq təşkilatlarda qarşılıqlı dəstəyi, regional təhlükəsizliyin möhkəmləndirilməsini, iqtisadi əməkdaşlığın genişləndirilməsini və ortaq maraqların birlikdə müdafiəsini nəzərdə tutur. Bu baxımdan Azərbaycan və Qırğızıstanın eyni mövqedən çıxış etməsi gələcək əməkdaşlıq üçün möhkəm zəmin yaradır.

Səfərin mühüm nəticələrindən biri iqtisadi əlaqələrin daha da genişləndirilməsi istiqamətində qəbul olunan qərarlar oldu. Azərbaycan–Qırğız İnvestisiya Fondunun kapitalının 200 milyon dollara çatdırılması tərəflərin iqtisadi tərəfdaşlığa böyük önəm verdiyini nümayiş etdirir. Bu fond vasitəsilə sənaye, kənd təsərrüfatı, turizm, logistika və digər sahələrdə həyata keçiriləcək layihələr hər iki ölkənin iqtisadi inkişafına yeni impuls verəcək. Yeni müəssisələrin yaradılması, investisiya mühitinin yaxşılaşdırılması və məşğulluğun artırılması bu əməkdaşlığın ən mühüm nəticələrindən olacaq.

İssık-Kul gölünün sahilində istifadəyə verilən "Bakı" hoteli isə Azərbaycan investisiyasının uğurlu nümunələrindən biridir. Bu layihə iqtisadi əhəmiyyətindən əlavə, xalqlarımız arasında dostluğun və qarşılıqlı etimadın rəmzi kimi də böyük dəyər daşıyır. Azərbaycanın beynəlxalq layihələrə verdiyi töhfə ölkəmizin iqtisadi potensialını və etibarlı tərəfdaş kimi nüfuzunu bir daha nümayiş etdirir.

Humanitar əməkdaşlıq sahəsində əldə olunan nəticələr də diqqətəlayiqdir. Qarabağın bərpasına Qırğızıstanın verdiyi dəstək qardaş ölkənin Azərbaycanın ərazi bütövlüyünə və bərpa prosesinə göstərdiyi səmimi münasibətin göstəricisidir. Ağdam rayonunda "Manas" adını daşıyan məktəbin inşa edilməsi gələcək nəsillərə dostluq və həmrəylik mesajı verən mühüm layihədir. Eyni zamanda Bakıda Çingiz Aytmatovun abidəsinin ucaldılması, onun adını daşıyan parkın yaradılması, Bişkekdə Azərbaycan–Qırğızıstan Dostluq Parkının salınması və qarşılıqlı Mədəniyyət Günlərinin təşkili xalqlarımızın ortaq mədəni köklərinin daha da möhkəmlənməsinə xidmət edir.

Səfər zamanı qəbul edilən qərarlar yalnız ikitərəfli münasibətlərlə məhdudlaşmır. Çolpon-Ata Bəyannaməsi Azərbaycan ilə Mərkəzi Asiya ölkələri arasında əməkdaşlığın yeni istiqamətlərini müəyyənləşdirən mühüm siyasi sənəd kimi xüsusi əhəmiyyət daşıyır. Azərbaycanın Mərkəzi Asiya Məşvərət Görüşlərində tamhüquqlu iştirak etməsi ölkəmizin regionun siyasi və iqtisadi həyatında artan rolunun göstəricisidir. Bu platforma gələcəkdə nəqliyyat dəhlizlərinin inkişafına, ticarət əlaqələrinin genişlənməsinə və Türk dövlətləri arasında inteqrasiyanın daha da dərinləşməsinə mühüm töhfə verəcək.

Prezident İlham Əliyevin Qırğız Respublikasının ali dövlət mükafatı – I dərəcəli "Manas" ordeni ilə təltif olunması, Prezident Sadır Japarovun isə Azərbaycanın ali dövlət təltifi olan "Heydər Əliyev" ordeninə layiq görülməsi dövlətlərarası münasibətlərin ən yüksək səviyyədə olduğunu göstərən mühüm hadisədir. Bu qarşılıqlı təltiflər iki dövlət başçısının əməkdaşlığın inkişafına verdiyi töhfəyə göstərilən yüksək ehtiram olmaqla yanaşı, Azərbaycan–Qırğızıstan dostluğunun möhkəm təməllər üzərində qurulduğunu da təsdiqləyir.

Bu gün Prezident İlham Əliyevin rəhbərliyi ilə həyata keçirilən uğurlu xarici siyasət nəticəsində Azərbaycan Türk dünyasının birliyinin möhkəmləndirilməsində aparıcı dövlətlərdən birinə çevrilib. Qırğızıstana dövlət səfəri bir daha sübut etdi ki, ortaq tarixə, mədəniyyətə və mənəvi dəyərlərə söykənən münasibətlər zaman keçdikcə daha da güclənir. Qarşılıqlı hörmətə və etimada əsaslanan bu strateji tərəfdaşlıq gələcək illərdə həm Azərbaycan və Qırğızıstanın milli maraqlarına, həm də Türk dünyasında əməkdaşlığın daha da genişlənməsinə mühüm töhfələr verəcək. Bu isə regionda sabitliyin, təhlükəsizliyin və davamlı inkişafın möhkəmlənməsi baxımından xüsusi əhəmiyyət daşıyır.

Sənan Ağayev

Siyəzən RİHB-nın Beşdam kənd iəd üzrə nümayəndəsi

Paylaş:

Baxılıb: 98 dəfə