Deputat: Laçında Böyük Qayıdışın davamının şahidi olacağıq

Bakı:

30 °C

42 %

4 m/s

Əlaqə

AZ RU EN

Ana səhifə / Xəbər lenti / Deputat: Laçında Böyük Qayıdışın davamının şahidi olacağıq

Deputat: Laçında Böyük Qayıdışın davamının şahidi olacağıq

22.09.2022 [13:14]

Günel ABBAS

“Cənab Prezidentin Laçına səfər etməsi və şəhərin mərkəzində üçrəngli Azərbaycan bayrağının ucaldılması tarixi bir hadisədir”.

Bu fikirləri yeniazerbaycan.com-a açıqlamasında Milli Məclisin deputatı Naqif Həmzəyev deyib.

N.Həmzəyev qeyd edib ki, heç kim azərbaycanlıların öz dədə-baba yurdlarında yaşamalarına mane ola bilməz: “Laçın 44 günlük Vətən Müharibəsi bitdikdən sonra bir güllə atmadan Cənab Prezident İlham Əliyevin uğurlu siyasəti nəticəsində azad olunub. Ancaq məhz Laçın şəhərinin mərkəzindən Laçın yolu keçdiyi üçün biz şəhəri tam nəzarətə götürə bilməmişdik. Lakin alternativ yol avqust ayında tikilib təhvil verildikdən sonra avqustun 26-da biz Laçın rayonu və onun ətrafındakı kəndləri nəzarətə götürdük”.

Onun sözlərinə görə, Prezident İlham Əliyev Laçında maraqlı açıqlamalar verib: “Bu açıqlamalardan göründüyü kimi Azərbaycan Silahlı qüvvələrinin bütün sərhədboyu ərazilərdə yerləşməsinin tək və yeganə səbəbkarı Ermənistanın təcavüzkar və təxribatçı siyasətidir. Həmçinin Ermənistan tərəfinin irəli sürdüyü bir sıra əsassız arqumentlər var. Sovet İttifaqı dağıldıqdan sonra Ermənistan əgər həmin əraziləri sərhəd hesab edirdisə, niyə həmin ərazilərdə sərhəd tikməyiblər? Aydın məsələdir ki, onlar Qarabağ və ətraf ərazilərə göz tikmişdilər. Cənab Prezident dəfələrlə çıxışlarında qeyd edib ki, biz Azərbaycan torpaqlarında ikinci Ermənistan dövlətinin yaradılmasına qətiyyən icazə verməyəcəyik. Hazırda Azərbaycan bütün sərhədboyu mövqeyini qüvvətləndirir”.

Deputat bildirib ki, öz dədə-baba torpaqlarında yaşamaq bütün azərbaycanlıların haqqıdır: “Prezidentin də qeyd etdiyi kimi bütün XIX və XX əsrin xəritələrini incələyərək tarixə baxsaq görərik ki, bu ərazilər Azərbaycan torpağıdır. Öz tarixi torpaqlarımızda yaşamaq hüququmuzu heç kim bizim əlimizdən ala bilməz. Bu halda Ermənistanın yeganə çıxış yolu Azərbaycanın ayağına düşmək və beynəlxalq qurumlara sülh müqaviləsini imzalamaq istədiklərini bildirmək və dondurulmuş Brüssel və Moskva görüşlərinin ən qısa zamanda davamını bərpa etmək və sülh üçün addımlar atmaqdır.”

Deputat Prezident İlham Əliyevin laçınlılar üçün verdiyi müjdəli xəbəri də diqqətə çatdırıb: “Ən qısa zamanda laçınlılar öz dədə-baba torpaqlarına qayıdacaqlar, biz Böyük Qayıdışın davamının şahidi olacağıq. Laçına müxtəlif istiqamətlərdən avtomobil yollarının çəkilişi davam edir, eyni zamanda Laçında Beynəlxalq Hava Limanın inşası davam edir və Laçının bütün elektrik təminatları üzrə məsələləri öz həllini tapmaqdadır. Biz Qarabağ və Şərqi Zəngəzur mahalını cənnət məkana çeviririk. Heç kim bu prosesi dayandıra bilməz, heç kim azərbaycanlıların öz dədə-baba yurdlarında yaşamalarına mane ola bilməz”.

Paylaş:

Baxılıb: 718 dəfə