Küveytdən Azərbaycana turist axını 2-3 dəfə arta bilər

Bakı:

21 °C

73 %

4 m/s

Əlaqə

AZ RU EN

Ana səhifə / Xəbər lenti / Küveytdən Azərbaycana turist axını 2-3 dəfə arta bilər

Küveytdən Azərbaycana turist axını 2-3 dəfə arta bilər

25.05.2023 [14:39]

“Küveytlə Azərbaycan arasında ikitərəfli əlaqələr yüksələn xətlə inkişaf edir”. Yeniazərbaycan.com-un məlumatına görə, bu fikirləri jurnalistlərə açıqlamasında Küveyt Dövlətinin Azərbaycandakı səfiri Abdullah Mohamed Abdullah Almauidin səsləndirib. Qarşılıqlı əməkdaşlığın xüsusilə siyasi sahədə güclü olduğunu qeyd edən səfir münasibətlərin inkişaf etməkdə olduğunu da diqqətə çatdırıb.

“Siyasi əlaqələrdən danışarkən qeyd etmək olar ki, hər iki ölkə beynəlxalq təşkilatlar çərçivəsində eyni mövqedən çıxış edir. Müəyyən beynəlxalq təşkilatlar çərçivəsində namizədlərin dəstəklənməsinə dair iki ölkənin xarici işlər nazirlikləri arasında qarşılıqlı razılaşma mövcuddur. Azərbaycan Prezidenti ilə ilk görüşdə etimadnaməni dövlət başçısına təqdim edərkən geniş fikir mübadiləsi aparıldı və o, əlaqələrdən məmnunluğunu ifadə etdi. Ümid edirik ki, əlaqələrimiz bundan sonra da bütün sahələrdə genişlənəcək və daha da irəliləyiş əldə olunacaq”, - deyə diplomat bildirib.

Diplomat həmçinin bildirib ki, iki ölkə arasında xarici işlər nazirlərinin başçılıq etdiyi birgə hökumətlərarası komissiya fəaliyyət göstərir. Bu komissiyada iki ölkənin bir çox nazirlik və idarələri iqtisadiyyat, təhsil, mədəniyyət, turizm sahələrində təmsil olunurlar. Artıq komissiyanın iki iclası keçirilib, lakin koronavirus pandemiyası üçüncü iclasın keçirilməsinə mane olub. Üçüncü iclas 2023-cü ilə planlaşdırılıb.

“Mənim vəzifəm komissiyanın qərarlarını, imzalanmış ikitərəfli sazişləri həyata keçirməkdir ki, onlar kağız üzərində qalmasın, konkret nəticələr versin”, - deyə, səfir əlavə edib.

Səfir həm də turizm əlaqələrinin inkişafı barədə də söz açıb. Diplomat deyib ki, Küveytdən Azərbaycana turist axını 2-3 dəfə arta bilər. Ölkələrarası əməkdaşlıqda turizm sahəsinin önəminə diqqət çəkən səfir bu sahənin hər iki ölkənin gündəliyində ən uğurlu məsələ olduğunu vurğulayıb. 2022-ci ildə Küveytdən Azərbaycana 22 min nəfər turistin gəldiyini qeyd edən səfir bu göstəricinin gələcəkdə artacağından əminliyini ifadə edib.

2017-ci ildən etibarən iki ölkə arasında müntəzəm uçuşların həyata keçirildiyinə diqqət çəkən diplomat Bakıda və bölgələrdə bütün lazımi turizm infrastrukturunun mövcud olduğunu da bildirib. Səfir vurğulayıb ki, bütün bunlar turizm sektorunda əlaqələrin genişləndirilməsi üçün vacib elementlərdir.

Səfir bildirib ki, turizm sektorunda ikitərəfli əlaqələrin genişləndirilməsi məsələlərinə Küveytdə Azərbaycan-Küveyt hökumətlərarası komissiyasının üçüncü iclasında baxılacaq.

Nicat

Paylaş:

Baxılıb: 573 dəfə