Ana dilimizi qoruyaq – gələcəyimizi qoruyaq

Bakı:

26 °C

57 %

8 m/s

Əlaqə

AZ RU EN

Ana səhifə / Arxiv / Ana dilimizi qoruyaq – gələcəyimizi qoruyaq

Ana dilimizi qoruyaq – gələcəyimizi qoruyaq

31.07.2026 [13:45]

Hər il avqustun 1-i ölkəmizdə Azərbaycan əlifbası və Azərbaycan dili Günü qeyd olunur. Bu tarix sadəcə təqvimdə əlamətdar gün deyil. Bu gün bizi keçmişimizə bağlayan, bu günümüzü yaşadan və gələcəyimizi müəyyənləşdirən ən böyük milli sərvətlərimizdən biri – ana dilimiz haqqında düşünmək, onu qorumaq və inkişaf etdirmək məsuliyyətimizi bir daha xatırladır.

Bəzən gündəlik həyatın sürəti içərisində fərqinə varmırıq ki, hər gün danışdığımız Azərbaycan dili yüz illərin sınağından çıxmış, böyük tarixi yol keçmiş, xalqımızın bütün mənəvi irsini özündə yaşadan əvəzsiz xəzinədir. Bu dildə nənələrimizin laylası, şəhid analarının duası, şairlərimizin misraları, alimlərimizin fikirləri, qəhrəmanlarımızın vətən sevgisi yaşayır.

Dil xalqın yaddaşıdır. Tarix kitabları itə bilər, abidələr dağıla bilər, amma dil yaşayırsa, xalq da yaşayır. Elə buna görə də tarix boyu xalqımız ana dilini qorumağı özünün müqəddəs vəzifəsi hesab edib. Ən çətin dövrlərdə belə Azərbaycan dili ailələrdə, məktəblərdə, ədəbiyyatda və xalq yaradıcılığında yaşadılıb, nəsildən-nəslə ötürülüb.

Azərbaycan dövlətinin dil siyasəti də məhz bu milli dəyərlərə söykənir. Ümummilli Lider Heydər Əliyev ana dilimizin qorunmasını dövlətçilik məsələsi kimi qiymətləndirirdi. Onun təşəbbüsü ilə Azərbaycan dilinin dövlət dili statusunun möhkəmləndirilməsi istiqamətində atılan addımlar bu gün də öz bəhrəsini verir. 1978-ci ildə Azərbaycan dilinin Konstitusiyada dövlət dili kimi təsbit olunması, müstəqillik illərində isə bu siyasətin daha da inkişaf etdirilməsi milli tariximizin ən mühüm hadisələrindəndir.

Ulu Öndər deyirdi: "Dil hər bir millətin milliliyinin əsasıdır." Bu fikrin dərin mənası var. Çünki insan öz ana dilində düşünür, sevinir, kədərlənir, yaradır və gələcəyini qurur. Ana dili milli mənsubiyyət hissini formalaşdırır, insanı öz xalqına və dövlətinə daha möhkəm bağlayır.

Bu gün Prezident İlham Əliyev tərəfindən həyata keçirilən siyasətdə də Azərbaycan dilinin qorunması xüsusi yer tutur. Dövlət başçısının dilimizin saflığının qorunması ilə bağlı verdiyi tapşırıqlar, imzaladığı fərman və sərəncamlar göstərir ki, dövlətimiz ana dilimizi milli təhlükəsizlik və milli-mənəvi dəyər kimi qiymətləndirir.

Qloballaşan dünyada müxtəlif dillərin qarşılıqlı təsiri təbii prosesdir. Xarici dilləri bilmək hər bir insan üçün üstünlükdür. Lakin başqa dilləri öyrənmək heç vaxt ana dilinə laqeyd münasibət yaratmamalıdır. Əksinə, insan nə qədər çox dil bilirsə, öz ana dilini də bir o qədər dərindən bilməli və onun zənginliyini daha yaxşı dərk etməlidir.

Bu gün sosial şəbəkələrdə, reklam lövhələrində, gündəlik danışıqda bəzən Azərbaycan dilinin normalarına uyğun olmayan ifadələrlə qarşılaşırıq. Xarici sözlərin lüzumsuz işlədilməsi, yazı qaydalarına əməl olunmaması, nitq mədəniyyətinə diqqətsizlik cəmiyyətimizin dil mədəniyyətinə mənfi təsir göstərir. Halbuki zəngin söz ehtiyatına malik Azərbaycan dili istənilən fikri aydın və səlis ifadə etməyə tam qadirdir.

Ana dilinin qorunması yalnız dövlət orqanlarının işi deyil. Bu işdə müəllimin də, jurnalistin də, yazıçının da, dövlət qulluqçusunun da, valideynin də, tələbənin də, şagirdin də məsuliyyəti var. Hər birimiz gündəlik həyatımızda düzgün danışmaqla, düzgün yazmaqla, övladlarımıza ana dilini sevdirməklə bu müqəddəs işə öz töhfəmizi verə bilərik.

İlham Əliyev

Siyəzən RİHB-nın Məşrif kənd iəd uzrə nümayəndəsi

Paylaş:

Baxılıb: 127 dəfə