Vətən müharibəsi bizim şanlı tariximiz, şəhidlər və qazilər qürur mənbəyimizdir

Bakı:

29 °C

61 %

5 m/s

Əlaqə

AZ RU EN

Ana səhifə / Arxiv / Vətən müharibəsi bizim şanlı tariximiz, şəhidlər və qazilər qürur mənbəyimizdir

Vətən müharibəsi bizim şanlı tariximiz, şəhidlər və qazilər qürur mənbəyimizdir

23.09.2026 [14:47]

Müzəffər Ali Baş Komandanımızın rəhbərliyi ilə respublikamızın suverenliyi və ərazi bütövlüyü uğrunda gedən mübarizədə qəhrəmanlıq göstərən əsgər və zabitlərimiz, arxa cəbhədə çalışan mülki insanlarımız, bütövlükdə xalqımız əzm və iradə, bir yumruq kimi birlik və həmrəylik nümayiş etdirərək, düşmənə sarsıdıcı zərbələr endirib. Azərbaycan Ordusunun əks-hücumları qarşısında aciz qalan düşmənin günahsız mülki insanları hədəfə alması, çoxsaylı müharibə cinayətləri xalqımızı qələbə əzmini sarsıda bilməyib.

Biz qurtuluş savaşında minlərlə şəhid vermişik, həmvətənlərimiz arasında itkin düşənlər, yaralanaraq sağlamlığını itirənlər var. Torpaqlarımız işğaldan qəhrəman şəhidlərimizin, əsgər və zabitlərimizin, qazilərimizin qanı-canı bahasına azad edilib. Müzəffər Ordumuzun bu gün yazdığı tarix sabahımız üçün möhkəm bünövrədir.

Qırx dörd gün davam edən hərbi əməliyyatlar nəticəsində Azərbaycan Ordusu Ermənistanın silahlı qüvvələrini məhv edərək tariximizə yeni bir gün yazdı və şəhidlərimizin qisası alındı. Əlbəttə ki, bu 44 gün qısa bir zaman olsa da, Azərbaycanın şanlı tarixini yazdı. XXI əsrin müharibəsini aparan Azərbaycan hərbi gücü, qüdrəti ilə dünyaya səs saldı. 44 günlük müharibə zamanında Azərbaycan uğurlu əməliyyat keçirərək 30 ilə yaxın zamanda işğal altında qalmış torpaqlarını erməni təcavüzkarlarından azad etdi.

Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü yolunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq, Azərbaycan Respublikasının Prezidenti İlham Əliyevin 2020-ci il 2 dekabr tarixli Sərancamı ilə hər il sentyabrın 27-si Azərbaycan Respublikasında Anım Günü kimi qeyd edilməsi qərara alınmışdır.

Cəmi 44 gün ərzində Azərbaycan Ordusu Ali Baş Komandan İlham Əliyevin rəhbərliyi ilə Şuşa başda olmaqla işğal altındakı bir çox rayon və şəhərləri azad etdi. 10 noyabr 2020-ci il tarixində Ermənistan kapitulyasiya aktına imza atmağa məcbur oldu. Bu zəfər təkcə hərbi qələbə deyildi, həm də ədalətin və beynəlxalq hüququn bərpası idi. Bu zəfərin əldə olunmasında minlərlə igid Azərbaycan əsgəri və zabiti canından keçdi. Onlar millətə olan borclarını canları bahasına ödədilər və şəhidlik zirvəsinə ucaldılar. Şəhidlərimizin hər biri tariximizin qəhrəmanlarıdır. Onların fədakarlığı sayəsində bu gün Azərbaycan xalqı başı dik, alnı açıq yaşayır. Şəhidlərimiz və onların ailələri dövlətin və xalqın daim diqqət mərkəzindədir. Onların xatirəsi əbədi olaraq qəlbimizdə yaşayacaq və gələcək nəsillərə örnək olacaqdır.Vətən müharibəsində iştirak etmiş qazilərimiz də xalqımızın qürur mənbəyidir. Onlar sağlamlıqlarını, bədənlərinin bir parçasını bu torpaqlar uğrunda fəda etdilər. Qazilərimiz təkcə döyüş meydanında deyil, həm də müharibədən sonrakı dövrdə öz həyat mübarizələrində də qəhrəmanlıq nümunələri göstərirlər. Dövlətimiz onların sosial rifahının yaxşılaşdırılması, tibbi yardımla təmin olunması və məşğulluğu istiqamətində mühüm addımlar atır. Qazilərimizin hekayələri gənc nəslə vətənpərvərlik ruhunu aşılayır.Vətən müharibəsi zamanı xalqın nümayiş etdirdiyi milli birlik və həmrəylik də qələbənin mühüm amillərindən biri oldu. Ölkənin bütün bölgələrindən olan insanlar bir bayraq altında birləşdi. Hər kəs cəbhədəki əsgərə dəstək vermək, dövlətin yanında olmaq üçün əlindən gələni etdi. Bu milli birliyin formalaşması uzun illər boyu yürüdülən düzgün siyasətin və xalqın dövlətinə olan inamının nəticəsi idi.Vətən müharibəsi Azərbaycan tarixində qürurla xatırlanacaq bir səhifədir. Bu müharibə bizə göstərdi ki, yalnız birlik, vətənpərvərlik və qətiyyət sayəsində ən çətin hədəflərə çatmaq mümkündür. Şəhidlərimiz və qazilərimiz bu zəfərin memarlarıdır. Onların fədakarlığı və qəhrəmanlığı gələcək nəsillərə bir məktəbdir. Məktəblərdə, ali təhsil müəssisələrində bu qəhrəmanlıq salnaməsi geniş təbliğ olunmalıdır ki, gənclər vətən sevgisini daha dərindən dərk etsinlər.Vətən müharibəsi bizim şanlı tariximizin qızıl səhifəsidir. Şəhidlərimiz və qazilərimiz isə bu tarixdə silinməz iz qoymuş qəhrəmanlardır. Onların fədakarlığı qarşısında baş əyir, xatirələrini dərin ehtiramla yad edirik. Azərbaycan xalqı olaraq bu tarixi qorumaq və gələcək nəsillərə çatdırmaq hər birimizin müqəddəs borcudur. Çünki bu zəfər təkcə keçmişin deyil, həm də gələcəyin möhkəm təməlidir.

Müşfiq Səfərov

Yeni Azərbaycan Partiyası

Beyləqan rayon təşkilatının sədri

Paylaş:

Baxılıb: 69 dəfə