Ermənistanda siyasi böhran dərinləşir

Bakı:

29 °C

61 %

5 m/s

Əlaqə

AZ RU EN

Ana səhifə / Dünya / Ermənistanda siyasi böhran dərinləşir

Ermənistanda siyasi böhran dərinləşir

22.01.2021 [09:17]

44 günlük müharibədə ordusu darmadağın edilən, sarsıdıcı məğlubiyyətlə üzləşən Ermənistanda siyasi qarşıdurma, sosial-iqtisadi tənəzzül və mənəvi-psixoloji böhran davam edir. Mövcud hakimiyyətin istefasına nail olmaq üçün müxtəlif vasitələrə əl atan siyasi qüvvələrin tələbləri çoxdandır cəmiyyətin bütün təbəqələrindən dəstək alsa da, baş nazir Nikol Paşinyan vəzifəsi ilə vidalaşmaq istəmir. Erməni mediasının yazdığına görə, son günlər hökumət daxilində yeni istefa dalğasını növbədənkənar parlament seçkiləri məsələsinin müzakirəsi ilə ört-basdır etmək istəyən Paşinyan ölkədə yaranmış problemlərin həll olunmamasının günahını müxalifət partiyalarının üstünə atmaqdan da çəkinmir.
Qeyd edək ki, yanvarın 20-də parlamentdə çıxış edən Paşinyan müxalif deputatların sual və ittihamları qarşısında aciz vəziyyətə düşüb. Onun bir-birinə zidd, məntiqsiz özünümüdafiə cavablarını bəzi hallarda dərin sükut əvəz edib. “Aysor.am” yazır ki, baş nazir çıxışında bəyan edib ki, müxalifət seçkilərdə iştirakdan imtina etdiyi halda növbədənkənar seçkilərin keçirilməsi məntiqsizdir: “Mən növbədənkənar seçki təklifi ilə çıxış etdim. Qəribə bir şəkildə parlamentdə təmsil olunan müxalifət partiyaları bu təklifi rədd etdi. Hakim siyasi qüvvənin özünün növbədənkənar seçki təşkil etməsi məntiqsizdir”.
Paşinyan, eyni zamanda, növbədənkənar seçki təklifinin qüvvədə qaldığını, müzakirələrin davam etdiyini xatırladıb.
“Past” qəzetinin yazdığına görə, Ermənistanın baş prokuroru Artur Davtyan dar çərçivədə söhbət zamanı əslində, Paşinyanın dövlətə xəyanətdə təqsirləndirilməsi və barəsində cinayət işi başlanması üçün kifayət qədər əsas olduğunu söyləyib. Baş prokurorun sözlərinə görə, bu əsaslar Paşinyanın həbsi üçün kifayətdir.
Qeyd edək ki, sahibkar-xeyriyyəçi Artak Tovmasyan “Qolos Armenii” qəzetinə verdiyi müsahibədə deyib ki, Paşinyan hökuməti hakimiyyətdə qalmağa davam edərsə, ölkə daha da dərinləşən və uzun sürən iqtisadi tənəzzüllə qarşılaşacaq: “Biz ayılmasaq və ayıq olmasaq, daxili siyasi böhranın daha da dərinləşməsi davam edəcək. Hökumət rəhbəri kapitulyasiya sənədinin imzalanmasının birbaşa iştirakçısı olduğu üçün artıq heç bir tələb irəli sürə bilmir”.
A.Tovmasyan deyib ki, əslində, məqsəddən yayındığı üçün müxalifət mitinq və nümayişlərdə lazımi sayda insan kütləsi toplaya bilmir: “İnsanlar aydın şəkildə başa düşməlidirlər ki, bu hökumət hakimiyyətdə qalmağa davam edərsə, hər gün daha dərin iqtisadi tənəzzüllə qarşılaşacağıq. Vətəndaşlarımız bunu dərk etməli, eyni zamanda, bu gün “cəbhə xətti”nin Respublika meydanı olduğunu anlamalıdırlar”.
Sonda qeyd edək ki, məğlub ölkədə mövcud olan siyasi, iqtisadi və mənəvi-psixoloji böhranın hökm sürməsini təhlil edən yerli ekspertlərin fikrincə, baş nazir və onun komandası vaxtı özləri üçün yeganə xilas vasitəsi hesab edirlər. Başqa sözlə, mövcud hökumət ümid edir ki, zaman keçdikcə cəmiyyət məğlubiyyəti, minlərlə qurbanı unudacaq. Ancaq real mənzərə odur ki, indiyə qədər verdiyi heç bir vədi yerinə yetirməyən Paşinyanın üstəlik müharibəni də uduzması yoxsulluqdan əziyyət çəkən və düşmənçiliyə köklənən cəmiyyətin əksər hissəsinin onun istefasını tələb etməsinə gətirib çıxarıb.
Qaşqay

Paylaş:

Baxılıb: 979 dəfə