Ermənistanda siyasi gərginlik davam edir

Bakı:

26 °C

59 %

2 m/s

Əlaqə

AZ RU EN

Ana səhifə / Dünya / Ermənistanda siyasi gərginlik davam edir

Ermənistanda siyasi gərginlik davam edir

24.06.2021 [09:03]

Məlum olduğu kimi, Ermənistanda keçirilən növbədənkənar parlament seçkilərinin ilkin nəticələrinə görə, baş nazir vəzifəsini icra edən Nikol Paşinyanın rəhbərlik etdiyi “Vətəndaş müqaviləsi” partiyası qalib gəlib. Artıq seçkidə iştirak edən partiya və blokların bir çoxu məğlubiyyətlə barışaraq Paşinyanı təbrik ediblər. Lakin siyasi qüvvələr arasında seçkilərin nəticələri ilə razılaşmayanlar da var. Hətta parlamentdə mandat qazanmayan siyasilərin bəzilərinin fikrincə, seçkilərin nəticələri məğlub ölkəni böhrandan çıxarmayacaq.
Ermənistan mediasının yazdığına görə, artıq “Ermənistan” blokunun rəhbərliyi parlament seçkilərinin nəticələrini mübahisəli hesab etdiyi üçün rəsmi şəkildə konstitusiya məhkəməsinə müraciət edib, eyni zamanda, mərkəzi seçki komissiyasından (MSK) məhkəməyə şikayət ünvanlayıb. Bu arada, “Sputnik-Ermənistan”ın yaydığı məlumata əsasən, MSK-ya edilən müraciətlər əsasında 70 regional seçki məntəqəsində səslərin yenidən sayılmasına razılıq verilib. Artıq 27 məntəqədə səslərin yenidən sayılmasına başlanılıb. Müşahidəçilərin fikrincə, bu sayımdan sonra faizlərdə hər hansı dəyişkilik mümkün olsa belə, ümumi nəticələrə ciddi təsir göstərəcəyi güman edilmir.
Yeri gəlmişkən, əvvəlki parlamentdə təmsil olunan “Çiçəklənən Ermənistan” partiyasının sədri Qagik Çarukyan seçkidən dərhal sonra nəticələrə etiraz etsə də, komandası ilə görüşdə reallığı qəbul etdiyini bildirib. “News.am”ın yaydığı digər xəbərə görə, partiyanın parlament fraksiyasının katibi Arman Abovyan isə seçkilər baş tutsa da, faktiki olaraq ölkədə siyasi böhranın aradan qaldırılmadığını deyib. “Panorama.am” yazır ki, oxşar bəyanatla “Rusiya erməniləri ittifaqı”nın sədri, “Ermənistan-Bizim evimiz” partiyasının təsisçisi Ara Abramyan da çıxış edib.
Bu arada, “News.am” yazır ki, seçkidə məğlub olan “Ermənistan” bloku isə hakimiyyətin yeni siyasi repressiyalara başladığı barədə bəyanatla çıxış edib. Belə ki, blokdan deputatlığa namizəd, “İzmirliyan” tibb mərkəzinin rəhbəri Armen Çarçıyana qarşı irəli sürülən ittihamın siyasi xarakter daşıdığı elan edilib. Xatırladaq ki, xüsusi istintaq xidməti A.Çarçıyana qarşı həbs qətimkan tədbiri seçilməsinə dair qərar qəbul edib, prokuror isə ona qarşı cinayət işi başlanılması və həbs olunmasına razılıq verilməsi üçün MSK qarşısında vəsatət qaldırıb. Repressiya və təzyiq barədə digər bir iddia isə icma rəhbərlərinin təhdidlərlə “könüllü olaraq” istefaya göndərilməsi barədədir. “Aysor.am”ın yaydığı məlumata görə, regionlarda icma rəhbərləri istefa verməyə məcbur edilir. Məlumatda o da qeyd edilir ki, Lori vilayətinin Odzun icmasının başçısı Arsen Titanyana qarşı oxşar tələb irəli sürülüb və o, qubernatorun tələbini yerinə yetirməkdən imtina etdikdə isə vilayət rəhbərliyinin binasında döyülüb.
Göründüyü kimi, məğlub ölkədə seçkilər arxada qalsa da, daxili siyasi gərginlik davam edir. Məğlubiyyətlə barışmayan qüvvələrin etirazlarına hakimiyyətin siyasi təqib və təzyiqlərinin əlavə olunması isə vəziyyəti bir qədər də mürəkkəbləşdirir.
Qaşqay ZİYƏDDİNOĞLU

Paylaş:

Baxılıb: 843 dəfə