AMEA-da “Azərbaycan elminin inkişaf doktrinası”nın layihəsi müzakirə olunub

Bakı:

-1 °C

93 %

3 m/s

Əlaqə

AZ RU EN

Ana səhifə / Elm / AMEA-da “Azərbaycan elminin inkişaf doktrinası”nın layihəsi müzakirə olunub

AMEA-da “Azərbaycan elminin inkişaf doktrinası”nın layihəsi müzakirə olunub

13.07.2016 [09:47]

İyulun 12-də Azərbaycan Milli Elmlər Akademiyasının (AMEA) rəyasət heyətində Respublika Elmi Tədqiqatların Əlaqələndirilməsi Şurasının (RETƏŞ) növbəti iclası keçirilib.
AZƏRTAC xəbər verir ki, AMEA-nın prezidenti, akademik Akif Əlizadənin sədrliyi ilə keçirilən tədbirdə akademiyanın vitse-prezidentləri, akademik-katibi, elmi bölmələrin akademik-katibləri, Respublika Elmi Tədqiqatların Əlaqələndirilməsi Şurasının üzvləri, elmi problemlər üzrə şuraların sədrləri iştirak ediblər.
RETƏŞ-in sədri, akademik Akif Əlizadə gündəlikdəki məsələləri tədbir iştirakçılarının diqqətinə çatdırıb.
Daha sonra “Azərbaycan elminin inkişaf doktrinası”nın layihəsi barədə məlumat verilib. Ölkədə elmin inkişafının dövlət siyasətinin əsas prioritetlərindən olduğunu vurğulayan akademik A.Əlizadə bildirib ki, dövlətin gələcəyi, iqtisadi, siyasi və hərbi qüdrəti onun elmi potensialı ilə bilavasitə bağlıdır. Azərbaycanda elmin zəngin tarixi və ənənələrinin olduğunu söyləyən AMEA-nın rəhbəri qeyd edib ki, əsrlər boyu Azərbaycan alimləri elmi təfəkkürün müxtəlif sahələrində ərsəyə gətirdikləri sanballı əsərlərlə bəşəriyyətin elmi-mədəni tərəqqisinə böyük xidmətlər göstərib, Şərqlə Qərb arasında elmin varislik əlaqələrinin qorunub saxlanması işinə dəyərli töhfələr veriblər.
Akademiyanın sürətli inkişaf mərhələsinin Ümummilli lider Heydər Əliyevin adı ilə bağlı olduğunu vurğulayan alim Ulu öndərin elm və təhsil sahəsində müəyyənləşdirdiyi siyasətin bu gün Prezident İlham Əliyev tərəfindən uğurla davam etdirildiyini diqqətə çatdırıb.
A.Əlizadənin sözlərinə görə, ölkə başçısının müvafiq Sərəncamı ilə təsdiq edilmiş “Azərbaycan Respublikasında 2009-2015-ci illərdə elmin inkişafı üzrə Milli Strategiya” və “Azərbaycan Respublikasında 2009-2015-ci illərdə elmin inkişafı üzrə Milli Strategiyanın həyata keçirilməsi ilə bağlı Dövlət Proqramı”nın icrası ilə bağlı görülmüş işlər bütövlükdə Azərbaycan elminin inkişafına böyük təkan verib.
Prezident İlham Əliyevin AMEA-nın 70 illik yubileyinə həsr olunmuş ümumi yığıncaqdakı proqram xarakterli çıxışını xatırladan akademik dövlət başçısının Azərbaycan elminin inkişafı ilə bağlı müəyyənləşdirdiyi hədəflərin, qaldırdığı problemlərin və qarşıya qoyduğu vəzifələrin hazırda AMEA-nın gələcək fəaliyyət proqramının əsasını təşkil etdiyini bildirib.
Sonra sənədin layihəsi ətrafında müzakirələr aparılıb.
AMEA-nın vitse-prezidenti, akademik İsa Həbibbəyli, AMEA-nın akademik-katibi, akademik Rasim Əliquliyev, AMEA-nın müşaviri, akademik Qərib Məmmədov, Azərbaycan Respublikasının Prezidenti yanında Ali Attestasiya Komissiyası sədrinin müavini, AMEA-nın müxbir üzvü Vəli Hüseynov, Naxçıvan Dövlət Universitetinin rektoru, AMEA-nın müxbir üzvü Saleh Məhərrəmov, Azərbaycan Texniki Universitetinin rektoru, texnika elmləri doktoru Havar Məmmədov və digər çıxış edənlər doktrinanın ölkəmizdə elmin inkişafı baxımından çox böyük əhəmiyyət daşıdığını, dövlətin elm sahəsində siyasətinin və strategiyasının əsas prinsiplərinin bu sənəddə əks olunduğunu bildirib, təklif və tövsiyələrini səsləndiriblər.
Tədbirdə 2016-cı il üçün doktorantura və dissertanturaya qəbul planı da müzakirə olunub. Akademik A.Əlizadə bildirib ki, AMEA-da təhsilin təkmilləşdirilməsi istiqamətində görülən işlərdən biri də doktorantura və dissertanturaya qəbulun yeni tələblər əsasında həyata keçirilməsidir. Cari il üçün fəlsəfə doktoru proqramı üzrə 93, elmlər doktoru proqramı üzrə isə 41 yerin ayrıldığını deyən akademik qəbulun müvəffəqiyyətlə həyata keçirildiyini söyləyib.
AMEA rəyasət heyəti aparatının elm və təhsil idarəsinin rəhbəri, texnika elmləri doktoru Əminağa Sadıqov fizika, iqtisadiyyat, sənətşünaslıq və memarlıq, həmçinin torpaq və su ehtiyatlarının idarə edilməsi və ətraf mühitin mühafizəsi problemləri üzrə elmi şuraların tərkiblərindəki dəyişiklikləri diqqətə çatdırıb. Qeyd olunan məsələlərlə bağlı müvafiq qərarlar qəbul edilib.

Paylaş:

Baxılıb: 1412 dəfə