Neftçala birinci Avropa Oyunlarının məşəlinin rayonda şölələnməsinin böyük sevincini yaşayır

Bakı:

24 °C

68 %

3 m/s

Əlaqə

AZ RU EN

Ana səhifə / İdman / Neftçala birinci Avropa Oyunlarının məşəlinin rayonda şölələnməsinin böyük sevincini yaşayır

Neftçala birinci Avropa Oyunlarının məşəlinin rayonda şölələnməsinin böyük sevincini yaşayır

05.05.2015 [10:24]

Salyan rayonunda yandırılan birinci Avropa Oyunlarının məşəli mayın 4-də günün ikinci yarısında Neftçala rayonuna gətirilib. Rayon sakinləri estafet iştirakçılarını böyük coşqu ilə qarşılayıblar.
AZƏRTAC xəbər verir ki, Neftçala şəhərinin giriş qapısında məşəlin qarşılanma mərasimi olub. Birinci Avropa Oyunlarının məşəlini Azərbaycanın ərazi bütövlüyü uğrunda fiziki sağlamlığını itirmiş mədəniyyət işçisi Ceyhun Mehdiyev qəbul edib.
Bədən tərbiyəsi müəllimi Ülkər İbrahimova, məktəbli Səyyarə Səmədzadə, mədəniyyət işçisi Kamran Əsədov, boks üzrə gənclər arasında ölkə çempionatının qalibi Elmar Abbasov və finalçısı Həsənağa Həsənov, boks məşqçisi Xəyal Mustafayev, “Neftçala” futbol klubunun məşqçiləri Mehman İbrahimov və Fəxrəddin Mürvətov Mirzə Ələkbər Sabir küçəsi və Heydər Əliyev prospekti boyunca 4 kilometrə yaxın yolu qət edərək məşəli növbə ilə daşıyıblar.
Mərasimdə “Bakı 2015”-in ulduz elçiləri, sevilən aktyorlar Rafael İsgəndərov və Coşqun Rəhimovun iştirakı sakinlərin bayram ovqatına xüsusi rəng qatıb.
Son məşəlçi, futbol məşqçisi Dilavər Yaqubov məşəli Bayraq meydanına gətirərək səhnəyə qalxıb və çırağı yandırıb. Coğrafiya fənni üzrə respublika olimpiadasının qızıl medalçısı İlham Səmədovun ictimaiyyətə təqdim etdiyi çıraq Oyunların sonuna qədər saxlanılmaq üçün şəhərə hədiyyə edilib.
Mərasimdə aprelin 26-da Bakıda, Atəşgah məbədində birinci Avropa Oyunları məşəlinin alovlandırılması mərasiminin əks olunduğu videoçarx nümayiş etdirilib.
Məşəl yürüşü mərasiminin böyük sevincini yaşayan rayon sakinlərinin bir neçəsi təəssüratlarını AZƏRTAC-ın müxbiri ilə də bölüşüb.
Məşəl yürüşündə iştirak etmiş veteran futbolçu, hazırda Neftçalanın eyniadlı klubunda məşqçi işləyən Mehman İbrahimov: “Birinci Avropa Oyunlarının ən mühüm mərasimlərindən birinin iştirakçısı olduğum üçün sevincim hədsizdir. Bu etimada görə təşəkkür edirəm. Tarixdə yerini alacaq Oyunların idmanımızda xüsusi yeri olacaq və həmişə xatırlanacaq. Bu anların mənim də həyatımda xoş xatirə kimi xüsusi izi qalacaq. Məşəl estafetinin layiqincə qarşıladıqları üçün bütün həmyerlilərimə minnətdaram və onları bu bayram münasibətilə təbrik edirəm. Avropa Oyunlarında isə idmançılarımızın hər birinə uğurlar arzulayır və onlardan qələbə, ən əsası, layiqli çıxış gözləyirəm”.
Böyük Vətən müharibəsi veteranı Alxan Əliyev: “Bu günlər ikiqat sevinc yaşayıram. Mayın 9-da faşizm üzərində tarixi Qələbənin 70 illiyi tamam olur. Qələbənin əldə olunmasında azərbaycanlı döyüşçülərin də böyük rolu olub. İyunun 12-də isə Azərbaycanda birinci Avropa Oyunlarına start veriləcək. Bunların hər ikisi fərəh doğuran hadisədir. Bir arzum var: Qələbə gününü Şuşada, Xankəndidə də qeyd edək, bu məşəli Dağlıq Qarabağda da yandıraq”.
Rayon gənclər və idman idarəsinin rəisi Yalçın Nuriyev də sevinc hisslərini dilə gətirərək Azərbaycanda idmanın inkişafına göstərilən dövlət dəstəyindən danışıb, ölkəmizdə keçirilən ilk Avropa Oyunlarında çıxış edəcək idmançılara qələbə arzulayıb.
Sonra məşəl Azərbaycanın balıqçılıq və kürü sənayesinin aparıcı müəssisəsi olan məşhur nərə balıqartırma zavoduna aparılıb. Kür çayı sahilində salınmış yeni Bayraq meydanında ecazkar axşam mənzərələri seyr edilib, yelkən səyahətinə çıxılıb.
Neftçala rayonunda alovlandırılan birinci Avropa Oyunlarının məşəli oradan Şirvan şəhərinə istiqamət götürüb.

Paylaş:

Baxılıb: 1098 dəfə