Naxçıvanda İran İslam İnqilabının 36-cı ildönümü qeyd olunub

Bakı:

26 °C

59 %

6 m/s

Əlaqə

AZ RU EN

Ana səhifə / Siyasət / Naxçıvanda İran İslam İnqilabının 36-cı ildönümü qeyd olunub

Naxçıvanda İran İslam İnqilabının 36-cı ildönümü qeyd olunub

13.02.2015 [10:03]

Fevralın 11-də İran İslam Respublikasının Naxçıvandakı Baş Konsulluğu ölkəsinin milli bayramı - İslam İnqilabı Günü münasibətilə rəsmi qəbul təşkil edib.
Naxçıvan Muxtar Respublikası Ali Məclisinin mətbuat xidmətindən AzərTAc-a bildirilib ki, Naxçıvan Muxtar Respublikası Ali Məclisinin Sədri Vasif Talıbov rəsmi qəbulda iştirak edib.
İran İslam Respublikasının və Azərbaycan Respublikasının Dövlət himnləri səsləndirildikdən sonra “Qurani-Kərim”dən ayələr oxunub.
Tədbirdə İran İslam Respublikasının Naxçıvandakı baş konsulu Məhəmmədtağı Məhəmmədəli çıxış edərək deyib ki, 1979-cu ildə azadlıq və istiqlaliyyət uğrunda mübarizəyə qalxan İran xalqı qələbə qazanıb, ötən dövrdə İran İslam Respublikası uğurlu inkişaf yolu keçib. Bu gün dünya ölkələri ilə səmərəli əməkdaşlığın qurulması İran İslam Respublikasının xarici siyasət kursunun əsas istiqamətini təşkil edir. İran-Azərbaycan münasibətlərinin inkişafı da bu mənada mühüm əhəmiyyətə malikdir. Hazırda hər iki ölkə arasında siyasi, iqtisadi və mədəni sahələrdə əlaqələr uğurla inkişaf etdirilir.
Muxtar respublikada diplomatik fəaliyyətinin başa çatdığını bildirən baş konsul Naxçıvan Muxtar Respublikası ilə İranın yaxın vilayətləri arasındakı əlaqələrin hazırkı səviyyəsinin məmnunluq doğurduğunu qeyd edib, mövcud səmərəli əməkdaşlığın gələcəkdə ikitərəfli münasibətlərin daha da dərinləşməsinə xidmət edəcəyini diqqətə çatdırıb.
Naxçıvan Muxtar Respublikası Ali Məclisinin Sədri Vasif Talıbov İran İslam inqilabının 36-cı ildönümü münasibətilə dost və qardaş İran xalqını təbrik edib, İran İslam Respublikasına inkişaf və tərəqqi arzulayaraq deyib: Azərbaycan-İran əlaqələrinin dərin kökləri var. Bu əlaqələrin inkişafı Azərbaycan xalqının Ümummilli lideri Heydər Əliyevin adı ilə bağlıdır. Ulu öndərin Naxçıvan Muxtar Respublikasının rəhbəri kimi əsasını qoyduğu səmərəli əməkdaşlıq əlaqələri dahi şəxsiyyətin ali hakimiyyətə ikinci qayıdışından sonra dövlətlərarası münasibətlər səviyyəsinə yüksəldilib. Hazırda ölkələrimiz arasındakı qarşılıqlı əməkdaşlıq mehriban qonşuluq münasibətlərinə əsaslanaraq daha da inkişaf etdirilir.
Qeyd olunub ki, bu gün Azərbaycan-İran əlaqələrinin inkişafına Azərbaycanın Naxçıvan Muxtar Respublikası ilə İranın yaxın vilayətləri arasında əlaqələrin dərinləşməsi də öz töhfəsini verir. Mövcud imkanlardan səmərəli istifadə və qarşılıqlı rəsmi səfərlər əlaqələrimizin davamlı olması üçün möhkəm təməl yaradıb. Son illər energetika, kənd təsərrüfatı, təhsil, səhiyyə, mədəniyyət, turizm və idman sahələrində əməkdaşlıq imkanları genişlənib. Bütün bunlar Azərbaycan-İran əlaqələrinin sarsılmazlığından xəbər verir.
Ali Məclisin Sədri Azərbaycan Respublikasının Prezidenti İlham Əliyevin “İranla Azərbaycan arasında olan münasibətlər çox sürətlə inkişaf edir. Siyasi, iqtisadi, humanitar və digər sahələrdə bizim aramızda əməkdaşlığın əməli nəticələri vardır. Bu əməkdaşlıq daha da güclənəcəkdir” fikrini xatırladıb, bir daha qardaş İran xalqını İslam inqilabının ildönümü münasibətilə təbrik edib.
Sonra tədbir İrandan gələn incəsənət ustalarının ifasında konsert proqramı ilə davam edib.

Paylaş:

Baxılıb: 800 dəfə