Milli Məclisin Sədri: Ermənistanın hərbi təcavüzü başlayandan bəri parlament tərəfindən 80-dən çox ölkədəki tərəfdaşlara məktublar göndərilib

Bakı:

29 °C

61 %

5 m/s

AZ RU EN

Ana səhifə / Siyasət / Milli Məclisin Sədri: Ermənistanın hərbi təcavüzü başlayandan bəri parlament tərəfindən 80-dən çox ölkədəki tərəfdaşlara məktublar göndərilib

Milli Məclisin Sədri: Ermənistanın hərbi təcavüzü başlayandan bəri parlament tərəfindən 80-dən çox ölkədəki tərəfdaşlara məktublar göndərilib

27.10.2020 [09:30]

Azərbaycan Respublikası Milli Məclisinin Sədri Sahibə Qafarova Türkiyənin “Milliyet” qəzetinə müsahibə verib.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a verilən məlumata görə, müsahibədə Sahibə Qafarova bildirib ki, sentyabrın 27-də Ermənistanın Azərbaycana qarşı növbəti hərbi təcavüzünün başladığı ilk anlardan etibarən Türkiyənin həm rəsmi şəxsləri, həm də xalqı açıq və birbaşa olaraq ölkəmizə dəstək verib. Türkiyə Böyük Millət Məclisində təmsil olunan 4 siyasi partiya tərəfindən Azərbaycanın haqlı mübarizəsinə verilən dəstək də ölkəmiz üçün çox dəyərlidir. S.Qafarova bu dəstəyə görə həm şəxsən öz adından, həm də Milli Məclisin deputatları adından Türkiyə Respublikasına, Türkiyə Böyük Millət Məclisinə və parlamentin üzvlərinə minnətdarlığını bildirib.
Milli Məclisin Sədri diqqətə çatdırıb ki, hər bir azərbaycanlı Türkiyə vətəndaşlarının qəlbinin Azərbaycanda olduğunu bilir, hər bir Azərbaycan vətəndaşının qəlbinin də çətin günlərdə qardaş Türkiyə ilə bərabər döyünür.
Müsahibədə Sahibə Qafarova bildirib ki, Ermənistanın növbəti hərbi təcavüzü başlayandan bəri Azərbaycan parlamentinin rəhbəri və üzvləri tərəfindən Milli Məclisin fəal əməkdaşlıq etdiyi 80-dən çox ölkədəki tərəfdaşlarına məktublar göndərilərək, bu təcavüz barədə məlumat verilib.
Müsahibəsində Ermənistanın mülki şəxslərə qarşı müharibə cinayəti törətdiyini xatırladan spiker Sahibə Qafarova deyib ki, Azərbaycan 30 ildir erməni terrorundan əziyyət çəkir. Terror yalnız Gəncəyə təcavüzlə başlamayıb. Terror ilk qarabağlının ermənilər tərəfindən yurdundan didərgin salındığı gündən başlayıb.
Sədr onu da vurğulayıb ki, Ermənistan təkcə Azərbaycana qarşı deyil, qonşuları olan 4 ölkədən 3-nə qarşı torpaq iddiası irəli sürür. Bəzi güclər Türkiyə və Azərbaycan kimi müstəqil siyasət yürüdən ölkələrə qarşı Ermənistandan istifadə edirlər. Ermənistan isə bir xidmətçi olaraq bu güclərə xidmət edir.
Sahibə Qafarova qeyd edib ki, hazırda dünyada beynəlxalq hüququn təmin olunmasında ciddi problemlər var və beynəlxalq hüquqda ikili standartlar hökm sürür. Birləşmiş Millətlər Təşkilatının Təhlükəsizlik Şurasının bəzi qətnamələri 2 saat ərzində icra edildiyi halda, Azərbaycanla bağlı qətnamələr 30 ilə yaxındır yerinə yetirilmir. Milli Məclis Sədrinin sözlərinə görə, BMT Təhlükəsizlik Şurasının 1993-cü ildə qəbul etdiyi 4 qətnamədə “Ermənilər Azərbaycan torpaqlarından dərhal, tam və qeyd-şərtsiz çıxmalıdır” deyilir. Amma bu qətnamələr 30 ilə yaxındır yerinə yetirilmir. Azərbaycan isə öz gücü hesabına BMT Təhlükəsizlik Şurasının məlum qətnamələrinin icrasını təmin edir.

Paylaş:

Baxılıb: 509 dəfə