COVID geri qayıdır?

Bakı:

15 °C

72 %

9 m/s

Əlaqə

AZ RU EN

Ana səhifə / Sosial / COVID geri qayıdır?

COVID geri qayıdır?

08.07.2025 [10:05]

“Omikron”un bəzi altnövləri hələ də dövriyyədədir...

Son günlər əhali arasında qrip simptomlarına bənzər viruslar çox yayılıb. Bu xəstəlik yüksək hərarət, boğazda ağrı, halsızlıq, burun axması, tutulması və bir sıra əlamətlərlə xarakterizə olunur. Adını qoya bilmədiyimiz və ağır simptomlarla keçirilən xəstəliyin əslində “Omikron” ştammı olduğu ortaya çıxıb. Belə ki, Səhiyyə Nazirliyinin mütəxəssis-eksperti, infeksionist Təyyar Eyvazov açıqlamasında hazırda Azərbaycanda COVID-19 infeksiyasının “Omikron” ştamının mövcud olduğunu bildirib.

T.Eyvazov qeyd edib ki, həm Azərbaycanda, həm də bir çox digər ölkələrdə COVID-19 infeksiyasının “Omikron” variantının bəzi altnövləri hələ də dövriyyədədir: “Bu ştamlar yüksək yoluxuculuq qabiliyyətinə malik olsa da, sağlam və immun sistemi normal olan insanlarda xəstəlik əsasən yüngül keçir və bir neçə gün ərzində sağalma ilə nəticələnir”.

Yüksək hərarət, boğaz ağrısı, burun axması və ya tutulması, öskürək, oynaq və əzələ ağrıları ilə müşahidə olunan hallar isə əksər hallarda müxtəlif respirator virus infeksiyaları ilə bağlıdır. Bu viruslar əsasən hava-damcı yolu ilə yayılır və xüsusilə insanların sıx toplaşdığı məkanlarda sürətlə yoluxma halları baş verir.

Belə simptomlarla müşahidə olunan infeksiyalar çoxdur və onların gedişatı şəxsin fərdi xüsusiyyətlərindən - xüsusilə immun vəziyyətindən asılı olaraq dəyişə bilər”.

Digər variantlardan daha sürətlə yayılır

Mövzu barədə “Yeni Azərbaycan”a açıqlama verən infeksionist-həkim Vüqar Cavadzadənin sözlərinə görə, “Omikron” kimi variantlar, bizə COVID-19 pandemiyasının sona çatmasının hələ uzaq olduğunu xatırladır: “Hazırda “Omikron” variantı dünyanın bir çox ölkəsində aşkar edilib. Yadda saxlamaq lazımdır ki, COVID-19-un bütün variantları ağır xəstəlik və ya ölümə səbəb ola bilər. Lakin “Omikron digər variantlardan daha sürətlə yayılır.

Göründüyü kimi, COVID hələlik davam edən pandemiyadır. “Omikron” koronavirusun mutasiya edən sonuncu ştammı deyil. Mutasiyalar davam etdiyi üçün pandemiya bitməyib”.

Necə qorunaq?

İnfeksionist qeyd edib ki, “Omikron” ştamından qorunmaq üçün gigiyenik qaydalara əməl etmək vacibdir: “Hətta “Omikron”un yüksək yoluxduruculuğunu nəzərə aldıqda bu qaydaların zəruriliyi daha da artır. Yoluxmadan qorunmaq, virusun yayılmasının qarşısını almaq üçün qapalı məkanlardan mümkün qədər uzaq qalmaq, kütləvi toplaşmalarda mütləq tibbi maska taxmaq lazımdır. Həmçinin sosial məsafənin qorunması da zəruri tədbirlərdəndir. Belə olan halda virusun geniş yayılmasının qarşısı alınar, xəstələnənlər infeksiyanı daha yüngül keçirər. Lakin istənilən halda, COVID-19 virusuna qarşı ən yaxşı profilaktika vaksinasiyadır”.

Yeganə BAYRAMOVA

Paylaş:

Baxılıb: 254 dəfə