COVID-19-a qalib gəlmək istəyiriksə...

Bakı:

29 °C

61 %

5 m/s

Əlaqə

AZ RU EN

Ana səhifə / Sosial / COVID-19-a qalib gəlmək istəyiriksə...

COVID-19-a qalib gəlmək istəyiriksə...

03.11.2020 [09:12]

Hər kəs məsuliyyətli olmalı, müəyyən olunmuş qaydalara ciddi riayət etməlidir
Məlum olduğu kimi, hazırda dünya ölkələri koronavirus pandemiyasının yeni dalğasını yaşayır. Bir çox ölkədə virusun yayılmasının qarşısını almaq üçün ciddi tədbirlər həyata keçirilir, tətbiq olunmuş karantin rejimi sərtləşdirilir. Azərbaycanda da COVID-19-a yoluxanların sayında kəskin artım müşahidə edilir, yoluxma və sağalma halları arasında fərq artır, sanitar-epidemioloji durum pisləşir. Pandemiyanın qarşısının alınması məqsədilə Nazirlər Kabinetinin qərarına əsasən, ölkə ərazisində xüsusi karantin rejiminin müddəti 1 dekabr 2020-ci il saat 06:00-dək uzadılıb. Ekspertlər vətəndaşları vəziyyətin ciddiliyini nəzərə almağa və mövcud qaydalara əməl etməyə çağırırlar.
Məsələ ilə bağlı fikirlərini bölüşən Milli Məclisin deputatı Azər Badamov bildirib ki, bu gün ölkəmiz iki cəbhədə müharibə aparır. Onun sözlərinə görə, erməni işğalçılarına qarşı müharibədə döyüş meydanında olan düşmənimizi görsək də, arxa cəbhədə insanlarımız gözə görünməz düşmənə, COVID-19-a qarşı savaşır. Millət vəkili qeyd edib ki, ön cəbhədə qəhrəman əsgərlərimiz tərəfindən 30 illik torpaq həsrətimizə son qoyulduğunu görüb COVID-i yaddan çıxarmamalıyıq və unutmamalıyıq ki, düşmənlə səngərdə üz-üzə dayanırıqsa, gözə görünməz koronavirusla da hər yerdə qarşılaşa bilərik: “Son günlərdə koronavirusa yoluxmada artan dinamikanın müşahidə olunması bir daha ictimai məsuliyyət məsələsini aktuallaşdırır. Məhz ictimai məsuliyyətsizlik nəticəsində hər gün bu xəstəliyə yoluxanların sayının min nəfərin üstündə olmasını və dünyasını dəyişənlərin sayının artmasını görürük. Dövlətimiz vətəndaşlarının sağlamlığı üçün əlindən gələni edir. Biz isə sadə tələblərə riayət etməyərək yoluxma sayını artırmaqla hazırkı dövrdə dövlətin diqqətinin cəbhəyə deyil, fərqli istiqamətə yönəlməsinə yol açmış oluruq”.
“Dövlətimiz üçün birinci növbədə insanların sağlamlığıdır və ona görə yenidən sərtləşdirilmiş karantin tədbirləri tətbiq edilir, xəstəlik simptomu müşahidə olunanlar dərhal xəstəxanalara yerləşdirilir, müalicəsi təşkil olunur. Bu, həm də milyonlarla vəsait deməkdir və bu gün xırda bir səhlənkarlıq bizə baha başa gəlir. Biz özümüzü koronavirusdan qorumaqla ölkədə yoluxma sayını azaldaraq müharibədə qələbəyə töhfə vermiş olarıq. Mən bir daha bütün vətəndaşları tibbi maskadan istifadə etməyə, sosial məsafəni gözləməyə və şəxsi gigiyena qaydalarına riayət etməyə çağırıram. Təbii ki, biz birlikdə güclüyük. Biz güclü olanda cəbhədə düşmənə qısa bir zamanda qalib gələ bilərik”, - deyə A.Badamov əlavə edib.
Milli Elmi-Tədqiqat Tibbi Profilaktika İnstitutunun direktoru Adil Allahverdiyev də sentyabrdan etibarən dünyada koronavirusa yoluxanların sayında artımın qeydə alındığını və bu tendensiyanın Azərbaycandan da yan keçmədiyini bildirib. Onun sözlərinə görə, rəqəmlərin artımının obyektiv səbəbləri də var. Səbəblərdən biri respirator sistemə aid xəstəliklərin sentyabr-oktyabr aylarından başlayaraq artması olsa da, vətəndaşlarda yaranan arxayınlıq da səbəblər sırasındadır: “Yoluxma sayının azlığı vətəndaşlarda arxayınlığa səbəb oldu və hər kəs pandemiyanın bitdiyini düşündü. Əslində isə xəstəlik davam edir. Bunu biz ikinci dalğa kimi də qəbul edə bilmərik. Çünki xəstəlik var və vətəndaşlar məsuliyyətlə yanaşmanı kənara qoyduqdan sonra rəqəmlərdə artımlar qeydə alındı. Bu gediş əslində çox həyəcanlıdır. Çünki hazırda gərgin bir dövrdə yaşayırıq. Vətən müharibəsi davam edir. Bizim hər birimizin xəstələnməsi cəbhə üçün də təhlükə törədir. Vətəndaşlar cəbhə zonasında hərbçilərlə təmasda olduqlarına görə, məsuliyyətimiz birə on qat artmalıdır. Hər birimiz ordumuzun qələbəsi naminə koronavirusa qarşı mübarizədə də həmrəylik nümayiş etdirməliyik”.
A.Allahverdiyev onu da qeyd edib ki, ölkəmizdə xəstəliyin artım səbəbi, buna təsir edən faktorlar araşdırılır, analiz edilir və qarşısının alınması üçün tədbirlər hazırlanır. Görülən tədbirlərin nəticə verməsi üçün isə hər bir vətəndaşın üzərinə məsuliyyət düşür. Əgər qaydalara əməl edilsə, yoluxma sayları azalacaq. “Xəstəlikdən qorunmanın yolları bəllidir - maska taxmaq, əl gigiyenasına əməl etmək və məsafə saxlamaq. Təəssüflər olsun ki, vətəndaşlar əvvəlki vətəndaş məsuliyyətini nümayiş etdirmirlər. Parklarda, dayanacaqlarda avtobuslarda maskasız vətəndaşların sayı kifayət qədərdir. Bu da yoluxma saylarında artımla nəticələnir. Bu gün ölkəmizdə əhalinin sayına görə, aparılan test sayı yüksək səviyyədədir. Test saylarının çoxluğu son dərəcə önəmlidir və xəstəliyi gizli keçirənlərin üzə çıxarılmasına imkan verir”, - deyə A.Allahverdiyev əlavə edib.
Pərviz SADAYOĞLU

Paylaş:

Baxılıb: 735 dəfə