Sülh üçün son şans...

Bakı:

25 °C

65 %

12 m/s

Əlaqə

AZ RU EN

Ana səhifə / Xarici siyasət / Sülh üçün son şans...

Sülh üçün son şans...

21.08.2024 [10:30]

Ötən il oktyabrın 7-də HƏMAS hərəkatının İsrailin cənubuna qəfil hücumu ilə alovlanan müharibə səngimək bilmir. Müharibənin əhatə dairəsinin genişlənmə ehtimalları da kifayət qədər böyükdür. Xatırladaq ki, indiyə qədər Qəzza zolağında ölənlərin sayı 40 min, yaralananların sayı isə 92 min nəfəri ötüb.

Atəşkəsin əldə olunmasına daha bir cəhd

Müharibə başlayandan bəri BMT səviyyəsində, eləcə də ABŞ və bir sıra region dövlətləri tərəfindən vaxtaşırı atəşkəsə çağırışlar edilib. Əslində, HƏMAS-ın, İsrailin və vasitəçi dövlətlərin təmsilçilərinin iştirakı ilə bir neçə dəfə danışıqlar aparılıb. Lakin bunlar uzunmüddətli sülh üçün yetərli olmayıb. Razılaşmalar tez bir zamanda pozulub və silahlar yenidən işə düşüb. HƏMAS müqaviməti davam etdirməkdə, İsrail isə qruplaşmanı tamam məhv etməkdə israrlı mövqe sərgiləyirlər.

Belə bir şəraitdə sülh üçün yeni ümidlər yarandı. Xatırladaq ki, avqustun 15-də Dohada Qəzza zolağında atəşkəsə nail olmaq və HƏMAS-ın əlindəki girovların azad edilməsi məqsədilə danışıqların yeni mərhələsi başlayıb. Vasitəçilərin - Misir, Qətər və ABŞ-nın birgə bəyanatında qeyd olunub ki, danışıqlar “müsbət atmosferdə” keçib. Tərəflər növbəti görüşün bu həftənin sonunadək Qahirədə keçirilməsi barədə razılığa gəliblər.

Blinkenin İsrailə 9-cu səfəri

Bu arada ABŞ-nin Dövlət katibi Antoni Blinken İsrailə səfər edib. Bu, onun Qəzzada müharibə başlayandan bəri Təl-Əvivə doqquzuncu səfəridir. ABŞ-nın dövlət katibi Qəzza zolağı üzrə danışıqların hazırkı raundunu girovların qaytarılması və anklavda atəşkəsə nail olmaq üçün “son şans” adlandırıb.

İsrail mediasının məlumatına görə, Blinken bu fikri Qüdsdə bu ölkənin prezidenti İsaak Hersoqla görüşdə səsləndirib. Antoni Blinken həmçinin avqustun 19-da Baş nazir Benyamin Netanyahu və müdafiə naziri Yoav Qalantla da görüşüb. ABŞ rəsmisi keçirdiyi görüşlərin nəticələri barədə danışıb. O, Təl-Əvivdə etdiyi çıxışında İsrail tərəfinin ABŞ-nin Qəzza zolağında atəşkəs məsələsində Fələstinin radikal HƏMAS hərəkatı ilə fikir ayrılıqlarını azaltmaq üçün nəzərdə tutulmuş yeni təklifini qəbul etdiyini bildirib. “Bu gün Baş nazir Binyamin Netanyahu ilə çox məhsuldar görüş zamanı o, mənə təsdiq etdi ki, İsrail fikir ayrılıqlarını aradan qaldırmaq təklifini qəbul edir və dəstəkləyir. İndi HƏMAS da eyni şeyi etməlidir”, - deyə Blinken vurğulayıb.

HƏMAS üçün “blef” danışıqlar

HƏMAS isə Doha danışıqlarını fərqli baxış bucağından dəyərləndirir. Hərəkatın yüksəkrütbəli nümayəndəsi Usamə Həmdan ABŞ dövlət katibi Antoni Blinkenin Qəzza zolağında girovların azad edilməsi və atəşkəsin təmin olunması üçün yenilənmiş təklifi qəbul etmək çağırışını tənqid edib. Həmdən bunu Əl-Cəzirə telekanalına müsahibəsində bildirib. Onun sözlərinə görə, HƏMAS yalnız Baydenin bir neçə ay əvvəl irəli sürdüyü və razılaşdırılmış təklifin qəbul edilməsini istəyir. İsrail tərəfi isə həmin təklifə daxil olan məsələlərdən imtina edib.

“Netanyahunun yenilənmiş təklifə razılıq verməsi onu göstərir ki, ABŞ administrasiyası onu əvvəlki razılaşmanı qəbul etməyə inandıra bilməyib”, - deyə HƏMAS rəsmisi vurğulayıb. O qeyd edib ki, atəşkəs razılaşması Qəzzada müharibənin bitməsi və İsrail qoşunlarının oradan çıxarılması şərti ilə baş tuta bilər.

HƏMAS hərəkatının Siyasi Bürosunun rəhbəri Yəhya əs-Sinvar isə Qəzza zolağında atəşkəs danışıqlarının yeni mərhələsini “blef” adlandırıb və bunun yalnız İsrail üçün vaxt gecikdirdiyini iddia edib. Bu barədə “The Wall Street Journal” nəşri məlumat yayıb.

Sinvar hesab edir ki, danışıqların məqsədi İsrailə hərbi planlarını həyata keçirmək imkanı verməkdir. Onun sözlərinə görə, o, İordan çayının qərb sahilindən hücumlar da daxil olmaqla, münaqişənin coğrafiyasını genişləndirməklə Təl-Əvivə təzyiqi artırmaq niyyətindədir.

MÜBARİZ

Paylaş:

Baxılıb: 1037 dəfə