Qarşılıqlı etimad və strateji tərəfdaşlıq

Bakı:

18 °C

82 %

4 m/s

Əlaqə

AZ RU EN

Ana səhifə / YAP xəbərləri / Qarşılıqlı etimad və strateji tərəfdaşlıq

Qarşılıqlı etimad və strateji tərəfdaşlıq

10.12.2025 [15:11]

Dekabrın 8-də Bratislavada Azərbaycan Prezidenti cənab İlham Əliyev və Slovakiya Prezidenti Peter Pelleqrini mətbuata bəyanatla çıxış etdilər. Bu bəyanatda səsləndirilən fikirlər bir daha göstərdi ki, Azərbaycan-Slovakiya münasibətləri davamlı olaraq yüksələn xətlə inkişaf edir. Slovakiya Prezidentinin Azərbaycan xalqını Ermənistanla sülh müqaviləsinin paraflanması münasibətilə təbrik etməsi, bu prosesin Ağ Evdə, ABŞ Prezidenti Donald Trampın iştirakı ilə baş tutmasını vurğulaması, Avropa dövlətlərinin Azərbaycanda bərqərar olan yeni reallıqları etiraf etdiyini açıq şəkildə göstərir. Dost ölkə rəhbərinin “Azərbaycan bu gün sülh şəraitində yaşayır və diqqətini postmüharibə dövrünün quruculuğuna yönəldib” fikri ölkəmizin regionda sabitlik və inkişaf modelinə çevrildiyinin Avropa miqyasında təsdiqidir. Bu, həm də beynəlxalq arenada Azərbaycanın mövqelərinin möhkəmləndiyini sübut edir. Sülhdən sonra bərpa prosesinə, reinteqrasiya siyasətinə və yeni iqtisadi mərhələyə keçid Azərbaycanın uzun illər davam edən mübarizəsinin strateji nəticəsidir. Slovakiya rəhbərliyinin bu dəyişiklikləri yüksək qiymətləndirməsi, əslində, iki ölkə arasında formalaşan qarşılıqlı etimadın nə qədər səmimi və dayanıqlı olduğunun göstəricisidir.

Cənab Prezident İlham Əliyevin öz bəyanatında səsləndirdiyi məqamlar isə bu dostluğun təkcə diplomatik sözlərə deyil, real siyasi və strateji təmələ söykəndiyini nümayiş etdirir. Dövlət başçısının Qələbənin beşinci ildönümündə Slovakiyanın yüksək səviyyəli nümayəndə heyətinin Azərbaycanda iştirakına xüsusi təşəkkür etməsi, Bratislavanın Bakıya verdiyi siyasi dəstəyin simvolik deyil, həm də məzmunlu olduğunu ortaya qoyur. Bu kimi jestlər dostluğun mahiyyətini daha da gücləndirir və qarşıdakı illərdə əməkdaşlığın hər sahədə dərinləşməsi üçün möhkəm zəmin yaradır. Digər tərəfdən, cənab Prezident İlham Əliyevin Slovakiyanın sabit inkişafını, güclü sənaye potensialını və ən əsası, müstəqil xarici siyasət yürütməsini yüksək qiymətləndirməsi bu ölkəyə Azərbaycanın xüsusi hörmətini əks etdirir. Cənab Prezidentin “bəzən çətinliklərə baxmayaraq Slovakiya öz yolundan dönmür” fikri isə Avropada suveren mövqe nümayiş etdirən dövlətlərin etibarlı tərəfdaş kimi dəyərləndirildiyini göstərir. Məhz bu qarşılıqlı etimad və siyasi uzlaşma fonunda Azərbaycan-Slovakiya əməkdaşlığı qarşıdakı dövrdə daha geniş miqyasda inkişaf edəcək, həm ikitərəfli münasibətlərə, həm də Avropa–Cənubi Qafqaz xəttində sabitlik və tərəfdaşlıq mühitinə yeni töhfələr verəcək.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 328 dəfə