Dünya Azərbaycanlılarının Həmrəyliyi – Milli Birliyimizin Təməl Daşı

Bakı:

0 °C

93 %

3 m/s

Əlaqə

AZ RU EN

Ana səhifə / YAP xəbərləri / Dünya Azərbaycanlılarının Həmrəyliyi – Milli Birliyimizin Təməl Daşı

Dünya Azərbaycanlılarının Həmrəyliyi – Milli Birliyimizin Təməl Daşı

29.12.2025 [17:37]

Mansur Quliyev

YAP Ağdam rayon təşkilatının sədri

Dünya Azərbaycanlılarının Həmrəyliyi Günü xalqımızın tarixi yaddaşında milli birliyin, mənəvi bütövlüyün və dövlətçilik ideyasının təntənəsi kimi mühüm yer tutur. Bu əlamətdar gün təkcə təqvim bayramı deyil, eyni zamanda, Azərbaycan xalqının milli azadlıq mübarizəsinin məntiqi nəticəsi, müstəqil dövlətçilik yolunda əldə edilmiş böyük mənəvi qələbənin rəmzidir.

Ümummilli Lider Heydər Əliyev Dünya Azərbaycanlılarının Həmrəyliyi Gününün mahiyyətini yüksək siyasi uzaqgörənliklə dəyərləndirərək demişdir:

“Dünya azərbaycanlılarının həmrəyliyi gününün dövlət bayramı kimi qeyd edilməsi xalqımızın milli azadlıq mübarizəsinin məntiqi nəticəsi olaraq artıq xoş ənənəyə çevrilmişdir.”

Bu fikirlər Ulu Öndərin milli birlik və həmrəylik ideyasına verdiyi strateji əhəmiyyəti aydın şəkildə ifadə edir.

Azərbaycan xalqı əsrlər boyu müxtəlif imperiyaların tərkibində yaşasa da, öz milli kimliyini, dilini, dinini və adət-ənənələrini qoruyub saxlamışdır. XX əsrin sonlarında əldə edilən dövlət müstəqilliyi isə bu tarixi mübarizənin ən böyük nəticəsi olmuşdur. Məhz bu müstəqillik dünya azərbaycanlılarını vahid amal ətrafında birləşdirən əsas faktora çevrilmişdir. Həmrəylik Günü də bu birliyin rəmzi kimi hər bir azərbaycanlı üçün inam və ümid anıdır.

Bu gün dünyanın müxtəlif ölkələrində milyonlarla azərbaycanlı yaşayır, işləyir və fəaliyyət göstərir. Onlar yaşadıqları cəmiyyətlərdə Azərbaycan həqiqətlərinin təbliğində, milli-mənəvi dəyərlərimizin qorunmasında və dövlət maraqlarımızın müdafiəsində mühüm rol oynayırlar. Buna baxmayaraq, Ümummilli Liderin də vurğuladığı kimi, soydaşlarımızın milli-mənəvi varlığını yaşadan yeganə dövlət müstəqil, suveren Azərbaycan Respublikasıdır. Azərbaycan dövləti dünyanın harasında yaşamasından asılı olmayaraq hər bir azərbaycanlının Vətəni, güvənc yeri və mənəvi dayaq nöqtəsidir.

Heydər Əliyevin əsasını qoyduğu dünya azərbaycanlılarının birliyi və həmrəyliyi ideyası bu gün də uğurla davam etdirilir. Bu siyasət Azərbaycan dövlətçiliyinə sədaqət, ana dilimizə, milli-mənəvi dəyərlərimizə hörmət və ümumbəşəri dəyərlərin qorunması prinsiplərinə söykənir. Məhz bu dəyərlər dünya azərbaycanlılarını vahid məqsəd ətrafında birləşdirir və onları müstəqil Azərbaycan dövlətinin güclənməsi naminə səfərbər edir.

Bu gün Prezident İlham Əliyevin rəhbərliyi ilə Azərbaycan regionda və beynəlxalq müstəvidə söz sahibi olan güclü dövlətə çevrilmişdir. 2020-ci ildə əldə edilən tarixi Zəfər və ərazi bütövlüyümüzün bərpası dünya azərbaycanlılarının həmrəyliyinin real nəticəsi kimi tarixə yazılmışdır. Bu Qələbə bir daha sübut etdi ki, milli birlik və dövlət-xalq həmrəyliyi Azərbaycanın ən böyük güc mənbəyidir.

Dünya Azərbaycanlılarının Həmrəyliyi Günü bizə tariximizi, milli kimliyimizi və gələcək məsuliyyətimizi xatırladır. Bu gün hər bir azərbaycanlı üçün milli qürur, vətənə bağlılıq və dövlətçilik düşüncəsinin möhkəmləndiyi əlamətdar gündür. Ümummilli Lider Heydər Əliyevin ideyaları əsasında formalaşan bu həmrəylik bu gün də Azərbaycan dövlətinin inkişafına, xalqımızın birliyinə və gələcək nəsillərin milli ruhda tərbiyəsinə xidmət edir.

Paylaş:

Baxılıb: 279 dəfə