Azərbaycan prezidentinin qlobal sülh missiyası: İndi bütün saatlar sülhə işləyir

Bakı:

20 °C

68 %

8 m/s

Əlaqə

AZ RU EN

Ana səhifə / YAP xəbərləri / Azərbaycan prezidentinin qlobal sülh missiyası: İndi bütün saatlar sülhə işləyir

Azərbaycan prezidentinin qlobal sülh missiyası: İndi bütün saatlar sülhə işləyir

05.02.2026 [17:05]

Elçin Quliyev

YAP Nərimanov Rayon Təşkilatının sədri

Birmənalı şəkildə qeyd olunmalıdır ki, Prezident İlham Əliyevin “Zayed İnsan Qardaşlığı Mükafatı”na layiq görülməsi dövlətimizin başçısının regionda sülhün bərqərar olunması istiqamətində apardığı ardıcıl və prinsipial siyasətə beynəlxalq səviyyədə verilən yüksək qiymətin bariz nümunəsidir.

Eyni zamanda, Azərbaycan Prezidenti İlham Əliyevin “Zayed İnsan Qardaşlığı Mükafatı”na layiq görülməsi Azərbaycanın son illərdə yalnız siyasi və iqtisadi deyil, eyni zamanda, mənəvi və humanitar müstəvidə də qəbul olunan bir aktora çevrildiyini nümayiş etdirir. Təbii ki, burada Prezident İlham Əliyevin apardığı siyasətin məzmunu, beynəlxalq səviyyədə formalaşmış şəxsi nüfuzu və mürəkkəb proseslərdə sülhə əsaslanan yanaşmasını xüsusilə qeyd etmək lazımdır.

Dövlətimizin başçısının bu mükafat kontekstində dəyərləndirilməsi onun rəhbərliyi ilə formalaşan siyasi xəttin beynəlxalq miqyasda məhz bu dəyərlərlə uzlaşdığını göstərir.

Azərbaycan mürəkkəb regional şəraitdə belə, qarşıdurmanı dərinləşdirməyən, əksinə məsuliyyətli davranış modeli ortaya qoyan ölkə kimi tanınır. Bu baxımdan Prezident İlham Əliyevin Davosda keçirilən Dünya İqtisadi Forumu çərçivəsində “Sülh Şurasının Nizamnaməsi”nin imzalanma mərasimində iştirakı və Azərbaycanın Sülh Şurasına qoşulması ölkəmizin irəli sürdüyü sülh gündəliyinin qlobal səviyyədə qəbul olunduğunu mühüm fakt kimi təsdiqləyir.

Birmənalı şəkildə vurğulanmalıdır ki, Birləşmiş Ərəb Əmirliklərinin (BƏƏ) paytaxtı Əbu-Dabi bu günlərdə, sadəcə, rəsmi bir mərasim deyildi, sülh təntənəsi idi. "Zayed İnsan Qardaşlığı Mükafatı"nın Azərbaycan Prezidenti İlham Əliyevə təqdim olunması, tarixin yaddaşına bir Liderin uzaqgörənliyi və bir xalqın minillik multikulturalizm mədəniyyətinin təntənəsi kimi həkk olundu. Bu təltif BƏƏ-nin banisi Şeyx Zayed bin Sultan Al-Nəhyanın müqəddəs irsi ilə Azərbaycanın humanizm fəlsəfəsinin eyni nöqtədə – insanlıq zirvəsində görüşməsidir.

Digər tərəfdən, Azərbaycan ilə Ermənistan arasında münasibətlərin normallaşması istiqamətində atılan addımlar, məhdudiyyətlərin aradan qaldırılması, iqtisadi və humanitar əməkdaşlığa başlanması Prezidentin çıxışında sülhün artıq praktik mərhələyə keçdiyini göstərən faktlar kimi səsləndirildi.

Eyni zamanda, mərasimin Əbu-Dabidə keçirilməsinin rəmzi mənası da çıxışda xüsusi vurğulandı. Məhz burada aparılan danışıqların sonradan Vaşinqtonda tarixi razılaşmalarla nəticələnməsi BƏƏ-nin və onun Prezidenti Şeyx Məhəmməd bin Zayed Al Nahyanın sülh prosesinə verdiyi töhfə kimi qəbul olunur.

Dinindən, dilindən, etnik mənsubiyyətindən asılı olmayaraq hər bir insanın hüquq və azadlıqlarının qorunması Azərbaycanda yalnız konstitusion norma deyil, eyni zamanda, mənəvi həyat fəlsəfəsidir.

“Zayed İnsan Qardaşlığı Mükafatı” mərhum Şeyx Zayed bin Sultan Al Nəhyanın humanist ideallarını yaşadan, dünyada sülhü, dinlərarası və mədəniyyətlərarası dialoqu təşviq edən ali bir beynəlxalq platformadır. Bu mükafatın Azərbaycan Prezidentinə təqdim edilməsi məhz ölkəmizin qlobal sülh gündəliyində tutduğu mövqenin, beynəlxalq etimadın və yüksək nüfuzun parlaq göstəricisidir.

Prezident İlham Əliyev həm döyüş meydanında ədaləti bərpa edən bir fateh, həm də sülhün qanadları altında dünyanı birləşdirən bir xilaskardır. Bu mükafatın məhz dövlətimizin başçısına verilməsi, Türk dünyasının humanizm dəyərlərinin beynəlxalq miqyasda qəbul edilən manifestinə çevrildi. Eyni zamanda, İndoneziya Prezidenti Coko Vidodonun səmimi etirafları, Azərbaycanın İslam dünyasından uzanıb bütün bəşəriyyəti kəşf edən bir dialoq körpüsü olduğunu sübut etdi.

Prezidentin "Biz sülhü, sadəcə, kağız üzərində deyil, insanların qəlbində və əməllərində qurmalıyıq" çağırışı, mərasim iştirakçıları tərəfindən böyük rəğbətlə qarşılandı. O, "Zayed İnsan Qardaşlığı Mükafatı"nı qəbul edərkən bu təltifin təkcə onun şəxsi fəaliyyətinə deyil, Azərbaycan xalqının sülhsevər ruhuna verilən bir dəyər olduğunu qeyd etdi. Bu nitq, Azərbaycanın qlobal həmrəylik yolunu fənər kimi işıqlandırdığını və dünyanı daha ədalətli bir gələcəyə səslədiyini bir daha sübut etdi.

Beləliklə, bu mükafat və mükafatlandırma mərasimi Azərbaycanın son illərdə apardığı sülhyönümlü siyasətin beynəlxalq kontekstdə necə qəbul olunduğunu bir daha aydın şəkildə ortaya qoydu.

Bu ali təltif Azərbaycanın dünyada apardığı nəcib sülh mübarizəsinin məntiqi nəticəsidir. Beynəlxalq münsiflər heyətinin və dünya liderlərinin ehtiram dolu baxışları ilə təqdim olunan bu mükafat hər bir azərbaycanlının qəlbində böyük qürur hissi oyatdı.

Bir sözlə, Azərbaycan prezidentinin qlobal sülh missiyasına söykənən bütün saatlar indi yalnız sülhə işləyir!

Paylaş:

Baxılıb: 357 dəfə