“Zəfər yolunun davamı: Qarabağda yeni iqtisadiyyat quruculuğu” mövzusunda konfrans keçirilib

Bakı:

25 °C

65 %

8 m/s

AZ RU EN

Ana səhifə / YAP xəbərləri / “Zəfər yolunun davamı: Qarabağda yeni iqtisadiyyat quruculuğu” mövzusunda konfrans keçirilib

“Zəfər yolunun davamı: Qarabağda yeni iqtisadiyyat quruculuğu” mövzusunda konfrans keçirilib

23.12.2021 [20:34]

Dekabrın 23-də Yeni Azərbaycan Partiyası Veteranlar Şurasının təşkilatçılğı ilə Bakı Ali Neft Məktəbində “Zəfər yolunun davamı: Qarabağda yeni iqtisadiyyat quruculuğu” mövzusunda konfrans keçirilib.

Əvvəlcə tədbir iştirakçıları BANM-də yaradılan şəraitlə tanış olublar.

Konfransda giriş sözü ilə çıxış edən YAP-ın İdarə Heyətinin üzvü, BANM-nin rektoru Elmar Qasımov bildirib ki, Prezident, Yeni Azərbaycan Partiyasının Sədri İlham Əliyevin rəhbərliyi ilə partiyamız böyük nailiyyətlərə imza atmaqda davam edir. Zəfərimizdən sonra Qarabağda sürətli bərpa və quruculuq işləri aparılır. İşğaldan azad edilən ərazilərdə iqtisadiyyatın inkişaf etdirilməsi döyüş meydanındakı uğurumuzun davamıdır.

YAP Veteranlar Şurasının sədri Arif Rəhimzadə çıxışında qeyd edib ki, ölkəmiz ötən müddət ərzində sürətlə inkişaf edib, siyasi və iqtisadi stabillik və dayanıqlıq təmin olunub: “Biz ulu öndər Heydər Əliyevin müəyyənləşdirdiyi yolla addımlayaraq bu günə gəlib çatmışıq. Prezident, Müzəffər Ali Baş Komandan İlham Əliyevin rəhbərliyi ilə Azərbaycan 2020-ci ildə Zəfəri ilə özünün güclü və qüdrətli dövlət olduğunu nümayiş etdirdi. Bizim həm döyüş, həm də informasiya məkanında mübarizəmiz uğurlu oldu”.

A.Rəhimzadə postmüharibə dövründə işğaldan azad edilmiş ərazilərdə bərpa və quruculuq işlərinin aparılmasını və müvəffəqiyyətlə başa çatdırılmasını dövlətimizin prioritet məsələlərindən olduğunu söyləyib. Onun sözlərinə görə, bölgədə iqtisadiyyatın dirçəldilməsi ümumilikdə ölkənin inkişafına və insanlarımızın rifah halının daha da yaxşılaşdırılmasına öz töhfəsini verəcək.

Konfransda məruzə ilə çıxış edən İqtisadi İslahatların Təhlili Kommunikasiya Mərkəzinin Strateji Planlaşdırma və İnkişaf Departamentinin rəhbəri Ayaz Müseyibov diqqətə çatdırıb ki, Azərbaycanda həyata keçirilən iqtisadiyyat BMT-nin həyata keçirdiyi Davamlı İnkişaf Məqsədləri proqramının 17 istiqaməti üzrə müəyyənləşdirilən dayanıqlı inkişaf üzrə aparılır. Qeyd olunub ki, ölkənin iqtisadi inkişafını sürətləndirmək üçün Qarabağa investesiyalar cəlb olunmalıdır və bu proses gedir. “Ağıllı kənd” və “Ağıllı şəhər” layihələri işğaldan azad edilmiş ərazilərimizdən ilk dəfə Zəngilanda reallaşdırılır.

Müasir dövrdə rəqəmsal texnologiyaların əhəmiyyətindən danışan A.Müseyibov Qarabağda həyata keçirilən bərpa və quruculuq işlərinin yüksək ahənglə aparıldığını qeyd edib. Bildirilib ki, infrastruktur yenidən qurulur, yollar çəkilir, nəqliyyat-kommunikasiya xətləri yaradılır.

YAP Veteranlar Şurasının üzvü Əli Həsənov Azərbaycanın nailiyyətlərinin əsasında ulu öndər Heydər Əliyevin müəyyənləşdirdiyi siyasətin dayandığını bildirib və qeyd edib ki, Prezident İlham Əliyev bu siyasəti uğurla davam etdirir. Prezidentimizin dünyada baş verən proseslərə çevik reaksiya verdiyini və qlobal təşəbbüslərlə çıxış etdiyini vurğulayan Ə. Həsənov bildirib ki, cənab İlham Əliyevin rəhbərliyi ilə Azərbaycan daha böyük zəfərlərə imza atacaq.

YAP-ın Təftiş Komissiyasının üzvü, Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov isə deyib ki, işğal dövründə Ermənistan Qarabağın flora və faunasını məhv edib, bu yöndə terror törədib. Onun sözlərinə görə, ermənilərin törətdiyi ekoloji terrorun fəsadları çox böyükdür. Bununla belə, Prezident İlham Əliyevin rəhbərliyi ilə dövlətimizin həyata keçirdiyi siyasət azad olunmuş ərazilərimizə yeni həyat bəxş edir. Komitə sədri Qarabağda zəngin təbii ehtiyatların olduğunu və bunun ölkəmizin iqtisadiyyatına böyük fayda verəcəyini vurğulayıb.

YAP Veteranlar şurasının üzvü, Auditorlar Palatasının sədri Vahid Novruzov da çıxışında böyük qayıdışla bağlı fikirlərini bildirib. Qazanılan uğurların, ən başlıcası Zəfərimizin əsasında həm də dayanıqlı və davamlı inkişaf olduğunu deyən V.Novruzov qeyd edib ki, aparılan dövlət siyasəti nəticəsində Azərbaycan daha da qüdrətli ölkəyə çevriləcək: “Güclü iqtisadiyyatdan şanlı Qələbəyə gəldik, indi isə gələcəyə inamla addımlamaq və insanların rifah halının yaxşılaşdırılması üçün iqtisadiyyatımızı gücləndirmək, yeni imkanlar axtarmaq lazımdır. Qarabağ zonası bunun üçün ən yaxşı məkandır”.

Daha sonra konfransda BANM tələbələrinin sualları cavablandırılıb.

Paylaş:

Baxılıb: 962 dəfə