Güclü ordunun olması dövlət siyasətinin illər boyu əsas prioriteti olub

Bakı:

25 °C

61 %

9 m/s

Əlaqə

AZ RU EN

Ana səhifə / YAP xəbərləri / Güclü ordunun olması dövlət siyasətinin illər boyu əsas prioriteti olub

Güclü ordunun olması dövlət siyasətinin illər boyu əsas prioriteti olub

01.05.2022 [14:05]

Ali Baş Komandanı İlham Əliyevin qətiyyət və ardıcıllıqla davam etdirdiyi ordu quruculuğu prosesi xalqımızın zəngin və şərəfli ənənələrini qorumaqla həyata keçirilməkdədir. Bu gün öz gücü və qüdrəti ilə seçilən, qarşıya qoyulan bütün vəzifələri layiqincə yerinə yetirmək imkanına malik olan Azərbaycan Ordusu dövlət müstəqilliyinin bərpasından ötən illər ərzində müasir inkişaf səviyyəsinə gəlib çatdı. Bu gün xidməti yüksək səviyyədə aparmaq üçün bütün imkanlar yaradılmışdır. Ölkə rəhbərliyinin bu sahəyə olan yüksək diqqət və qayğısının nəticəsidir ki, dünyada orduların reytinqlərini tərtib edən sanballı qurumlar bu gün Azərbaycan Ordusunun dünyanın güclü orduları sırasında olduğunu təsdiqləyirlər.

Xüsusilə qeyd olunmalıdır ki, müasir ordu quruculuğunu xarakterizə edən, Milli Ordumuzun möhkəmlənməsinə geniş imkanlar yaradan əsas amil dinamik iqtisadi inkişaf və ölkəmizin iqtisadi qüdrətinin artmasıdır. İqtisadi inkişaf ordumuzun bütün istiqamətlər üzrə potensialının yüksək səviyyəyə çatdırılmasına və Azərbaycanda hərbi-sənaye potensialının gücləndirilməsinə geniş imkanlar yaradır. Hər bir dövlət onda güclü olur ki, onun qüdrətli iqtisadiyyatı və güclü ordusu var. Azərbaycanın güclü orduya malik olması 44 günlük Vətən müharibəsində bir daha nümayiş etdirildi. Gənclərimizin bu gün dövlət başçısı İlham Əliyevin sərəncamı ilə hərbi xidmətə böyük ruh yüksəkliyi ilə getmələri də onlarda Vətən sevgisinin böyüklüyünün təsdiqidir. Hələ 2003-cü ildə andiçmə mərasimindəki nitqi zamanı ordu quruculuğu və bu sahədə perspektivlər barədə danışan Prezident İlham Əliyev demişdi: “Azərbaycanda ordu quruculuğu sahəsində də böyük işlər görülmüşdür. Ölkəmizdə güclü ordu yaradılmışdır və bu proses davam edəcəkdir. Bu məsələ daim mənim diqqət mərkəzimdə olacaqdır. Azərbaycanın çox güclü ordusu olmalıdır. O qarşıda duran bütün məsələləri həll etmək iqtidarında olmalıdır. Əminəm ki, Azərbaycanın iqtisadi potensialı ordumuzun ən yüksək standartlara cavab verməsinə və qarşıda duran bütün vəzifələri yerinə yetirməsinə imkan verəcəkdir”.

İkinci Qarabağ müharibəsindən sonra bütün dünya yeni Azərbaycanı kəşf etdi. Məlum oldu ki, onun yaxşı təlim keçmiş, müasir silah növləri ilə silahlanmış və ən əsası onlardan istifadə qaydalarını bilən ordusu var. Ekspertlərin sözlərinə görə, indi Azərbaycan ordusu istənilən kənar təhlükələrə hazırdır və təcavüzkarlara layiqli cavab vermək gücündədir. 44 günlük müharibə nəinki Azərbaycan Silahlı Qüvvələrinin möhkəmliyini, ilk növbədə, bu müharibə, əslində, vətənpərvər və azadlıqsevər əsgərlərin ruhunun gücünü göstərdi. Bu, böyük bir motivasiya idi. Razılaşaq ki, yaxşı təlim və silahlanma olsa da, motivasiya olmasa, müharibəni udmaq mümkün deyil. Müharibədə qalib gəlmək müharibə üsullarını daha da təkmilləşdirmək üçün böyük bir stimuldur. Bununla yanaşı, qeyd edək ki, Azərbaycan Ordusu pilotsuz uçan aparatlardan indiyədək dünyada heç kimin nümayiş etdirmədiyi səviyyədə istifadə etmək bacarığını nümayiş etdirdi. Bununla da bir çox ölkələrin ordularının döyüş əməliyyatları strategiyasında dəyişiklik etdi. Mütəxəssislər bildirirlər ki, hazırda Cənubi Qafqazda Azərbaycanın Ordusu, həqiqətən də, ən güclüdür.

Müharibədəki ağır məğlubiyyət Ermənistanı kapitulyasiya aktını imzalamağa məcbur etdi. Bununla da Azərbaycan Respublikasının ərazi bütövlüyü bərpa olundu. Bu zəfərdən sonra xalq-dövlət-ordu birliyi yüksək səviyyəyə qalxdı. Ölkə başçısının dediyi kimi, bu birlik bizə imkan verəcək ki, işğaldan azad edilmiş torpaqlara yenidən həyat qaytaraq, məcburi köçkünlərimizi o yerlərə maksimum qısa müddət ərzində qaytaraq. Qarabağ bölgəsi, gözəl tarixi diyarımız sanki yenidən doğulacaq, yenidən canlanacaq, dirçələcək. Azərbaycanın ayrılmaz hissəsi və ən gözəl güşələrindən biri olan Qarabağ əsl cənnət məkanına çevriləcəkdir.

Vüsal Hüseynov- YAP Xocavənd rayon təşkilatının sədri

Paylaş:

Baxılıb: 773 dəfə