Türkiyə-Azərbaycan birliyi

Bakı:

32 °C

45 %

4 m/s

Əlaqə

AZ RU EN

Ana səhifə / YAP xəbərləri / Türkiyə-Azərbaycan birliyi

Türkiyə-Azərbaycan birliyi

22.02.2024 [11:06]

Türkiyə-Azərbaycan əməkdaşlığının önəmli istiqamətlərindən biri hərbi sahədə olan işbirliyidir. Hər il həm Türkiyədə, həm Azərbaycanda ən azı 10 hərbi təlim keçirilir ki, bu da hərbi gücümüzü daha da artır. Eyni zamanda, Türkiyə və Azərbaycan arasında müdafiə sənayesi sahəsində yeni imkanlar açılıb. Ölkələrimizin birgə istehsalla əlaqədar konkret planlar mövcuddur.

Fevralın 19-da Türkiyənin paytaxtı Ankarada rəsmi səfəri zamanı Prezident İlham Əliyev mətbuata verdiyi bəyanatında hərbi sahədə olan işbirliyindən bəhs edərkən vurğuladı ki, İkinci Qarabağ savaşı və keçirilən antiterror əməliyyatı Türkiyənin Ordu modelinin Azərbaycanda tam oturuşduğunu göstərdi. Ölkə başçısı onu da qeyd etdi ki, Qarabağda keçirilmiş antiterror əməliyyatı ölkəmizin suverenliyini tam təsdiqləmişdir, artıq bölücü, separatçı qüvvələrə Azərbaycan ərazisində yer yoxdur və bundan sonra heç vaxt olmayacaq.

Mətbuata bəyanatında Prezident İlham Əliyev onu da bildirdi ki, Türkiyə və Azərbaycanın birgə həyata keçirdiyi layihələr kifayət qədər çoxdur. Reallaşdırılan nəqliyyat, enerji layihələri ölkələrimizin sərhədlərindən kənarda da artıq önəmli rol oynayır. Ticarət dövriyyəmiz sürətlə artır və rekord həddə çatıb. Azərbaycan-Türkiyə ticarət dövriyyəsi 7,5 milyard dollara çatıb. Keçən il Azərbaycandan Türkiyəyə 9 milyard kubmetr təbii qaz ixrac edilmişdir. Əldə edilmiş razılaşmalar əsasında qazın həcminin artırılması nəzərdə tutulur, o cümlədən Türkiyə ərazisindən Avropaya gedən təbii qaz qitənin bir çox ölkələri üçün önəmli enerji təhlükəsizliyi məsələsidir. Mühüm beynəlxalq layihə olan Bakı-Tbilisi-Qars dəmir yolu yüklərin həcmini 1 milyon tondan 5 milyon tona çatdırmaq üçün bu ilin ortalarında tam istismara verilməlidir. Bir sözlə, Türkiyə-Azərbaycan birliyi təkcə bölgə üçün deyil, Avrasiya üçün önəmli amilə çevrilib.

Prezident İlham Əliyevin cari ilin 19 fevral tarixində Türkiyəyə rəsmi səfəri zamanı Prezidentlərin mətbuata birgə bəyanatında Prezident Rəcəb Tayyib Ərdoğan ölkəmizlə bağlı mühüm açıqlamalar verdi. Qardaş ölkənin Prezidenti bildirdi ki, Avropa Şurası Parlament Assambleyasında Azərbaycan nümayəndə heyətinin bu il keçiriləcək tədbirlərə qatılmasına maneə yaradılması ilə bağlı qəbul edilən qərarlara Türkiyə güclü etiraz şəkildə göstərib. Qəbul olunan qərar ləğv edilənə qədər Türkiyə bu istiqamətdəki səylərini davam etdirəcək və ölkəmizə dəstək göstərəcək.

Prezident Rəcəb Tayyib Ərdoğan Qarabağda işğala son qoyulması ilə birlikdə bölgəmizdə davamlı sülh üçün tarixi bir fürsət pəncərəsi açıldığını da diqqətə çatdırdı. Azərbaycan ilə Ermənistan arasında davamlı sülhün imzalanmasının bölgəmiz və dünyada sülh, əmin-amanlıq və sabitlik üçün yeni bir ümid mənbəyi olacağı şübhəsizdir, deyə qeyd edən qardaş ölkənin Prezidenti Türkiyənin bu prosesdə Azərbaycan ilə birlikdə çiyin-çiyinə hərəkət etdiyini bəyan etdi.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 595 dəfə