Nazirlərin görüşündə....

Bakı:

26 °C

64 %

12 m/s

Əlaqə

AZ RU EN

Ana səhifə / Xəbər lenti / Nazirlərin görüşündə....

Nazirlərin görüşündə....

02.06.2023 [11:27]

NATO-nun Vilnüs sammitinə hazırlıq məsələləri diqqət mərkəzindədir

GÜLAY

NATO ölkələrinin xarici işlər nazirlərinin Norveçin paytaxtı Osloda ikigünlük görüşündə Ukrayna və Kosovodakı vəziyyət diqqət mərkəzindədir. Görüşdə təşkilata gələcək üzvlük və xüsusilə Ukraynaya cari hərbi yardım məsələlərinə toxunulub. Toplantıda digər müzakirə mövzusu isə alyansın Vilnüsdə keçiriləcək sammitinə hazırlıq və hərbi xərclərinin artırılmasıdır. Görüş qeyri-rəsmi xarakter daşıdığı üçün proqramın bir hissəsi elan edilməyib.

Son illər NATO-nun fəaliyyətinin əsas hissəsi Rusiya-Ukrayna müharibəsinə həsr olunub. Hələ 2021-ci ildə Rusiya Ukrayna sərhəddinə yaxın bölgələrdə xeyli hərbi qüvvə cəmləşdirən zaman NATO bu təhlükə haqqında dəfələrlə mesajlar vermişdi. Nəticə etibarilə ötən ilin fevralında Rusiya Ukraynaya qarşı hücuma start verdi. Müharibənin ilk günlərindən NATO bu hücumu pisləyib və Ukraynaya hərbi yardım göstərib. Bütün bunlar Ukrayna-Rusiya müharibəsinin uzunmüddətli və çətin olacağından xəbər verirdi.

ABŞ isə 2014-cü ildə Ukraynanın NATO-ya üzvlüyü ilə bağlı vəd versə də, müharibənin davam etməsi hazırda bunu mümkünsüz edir. Lakin Ukrayna Rusiya ilə müharibə şəraitində olduğu bir dövrdə NATO ilə əməkdaşlığın gücləndirilməsini hərtərəfli zəruri hesab edir. Bu, “Ukrayna -NATO Şurası” masası arxasında tamhüquqlu iştirakçıya çevrilmək, vaxtaşırı görüşlər təşkil etmək və döyüş meydanındakı vəziyyət barədə birbaşa yenilənmiş informasiyanı daha asanlıqla çatdırmağın mümkünlüyünü vəd edir.

Ukraynanın NATO-ya üzvlüyünü isə Rusiya özü üçün böyük təhdid hesab edir. Rəsmi Kiyevə NATO-nun, xüsusilə ayrıca olaraq ABŞ-ın hərbi dəstəyi hər zaman Rusiya tərəfindən etirazla qarşılanır. Rusiya-Ukrayna müharibəsindəki son vəziyyət isə bölgədə tərəflər nisbətinin dəyişkən hal aldığını deməyə imkan verir. Avropa İttifaqının Rusiyaya tətbiq etdiyi sanksiyaların da aydın hədəfləri var. Bu, çox böyük siyasi dəyişikliklərə, xüsusilə Rusiyanın iqtisadiyyatının zəifləməsinə hədəflənib.

Qeyd edək ki, NATO-nun Vilnüsdə keçiriləcək sammitdə Ukraynanın alyansa üzvlük məsələsinə də toxunulması gözlənilir. NATO Ukraynanın alyansa qoşulmaq üçün müraciətinə hələ baxılmadığını daha öncə etiraf etmişdi. Öz növbəsində Macarıstan hökumətinin nümayəndəsi Qergey Quyyaş Ukraynanın NATO-ya daxil olmasını dünya müharibəsinin başlanmasına bərabər hesab edib. Bununla belə, alyansın Ukrayna üçün təhlükəsizlik təminatlarının diqqətdə saxlanılması zərurətini də müttəfiqlər aydın şəkildə başa düşürlər. Bu baxımdan, xarici işlər nazirlərinin görüşü NATO-nun Vülnüs sammiti öncəsi vacib məsələlərin müzakirəsi baxımından əhəmiyyətlidir.

Paylaş:

Baxılıb: 604 dəfə