“Heydər Əliyev Azərbaycan multikulturalizminin siyasi banisidir” mövzusunda seminar keçirilib

Bakı:

27 °C

51 %

5 m/s

AZ RU EN

Ana səhifə / Xəbər lenti / “Heydər Əliyev Azərbaycan multikulturalizminin siyasi banisidir” mövzusunda seminar keçirilib

“Heydər Əliyev Azərbaycan multikulturalizminin siyasi banisidir” mövzusunda seminar keçirilib

04.12.2023 [17:20]

Bakı Beynəlxalq Multikulturalizm Mərkəzi “Heydər Əliyev İli” çərçivəsində cari ildə ölkəmizin 10 rayonunun Heydər Əliyev mərkəzlərində icra hakimiyyətləri ilə birlikdə Ulu Öndərin Azərbaycan multikulturalizminin inkişafında xidmətlərinə həsr olunan seminarlar keçirir. “Heydər Əliyev Azərbaycan multikulturalizminin siyasi banisidir” mövzusuna həsr edilən seminarların keçirilməsində məqsəd Ulu Öndər Heydər Əliyevin çoxspektrli fəaliyyəti, hakimiyyətə ikinci dəfə gəlişindən sonra azərbaycançılıq məfkurəsinin yenidən təşəkkül tapmasında rolu, xüsusən də ölkəmizdə əsrlərdən bəri əmin-amanlıq şəraitində birgə yaşayan müxtəlif etnik qruplar və konfessiyalar üçün yaradılan şərait, bu gün də milli və dini icmalara göstərilən dövlət qayğısı barədə geniş maarifləndirmə işləri aparmaqdır.

Layihə çərçivəsində növbəti seminar Naxçıvan şəhərində təşkil olunub. Tədbirdən öncə Ümummilli Lider Heydər Əliyevin abidəsi ziyarət edilib, Heydər Əliyev Muzeyi ilə tanışlıq olub. Azərbaycan Respublikasının Dövlət Himninin səsləndirilməsi ilə başlayan tədbirdə Vətən yolunda canından keçən şəhidlərimizin xatirəsi bir dəqiqəlik sükutla yad edilib. Bakı Beynəlxalq Multikulturalizm Mərkəzinin hazırladığı “Heydər Əliyev və multikulturalizm” sənədli filmi nümayiş olunub.

Naxçıvan Muxtar Respublikası Dini Qurumlarla İş üzrə Dövlət Agentliyinin direktoru Vüqar Babayev muxtar respublikada dini-mənəvi dəyərlər istiqamətində görülən işlər haqqında danışıb. O qeyd edib ki, Ümummilli Lider Heydər Əliyevin əsasını qoyduğu dövlət-din münasibətləri onun layiqli davamçısı Prezident İlham Əliyevin rəhbərliyi ilə uğurla davam etdirilir.

Məlumat verilib ki, bu gün muxtar respublikada 214 məscid və 17 dini icma fəaliyyət göstərir. Burada sağlam dini ideologiyanın formalaşması, dini təhlükəsizliyin təmin olunması, dini məsələlərin və ayinlərin düzgün təbliği, İslam dininin olduğu kimi çatdırılması istiqamətində müvafiq tədbirlər həyata keçirilir. Dini Qurumlarla İş üzrə Dövlət Agentliyi dini maarifləndirmə tədbirlərini diqqətdə saxlayır, müzakirələr aparır, kütləvi informasiya vasitələrinin imkanlarından səmərəli istifadə edir.

Azərbaycan Respublikası Milli Məclisinin deputatı Ceyhun Məmmədov tədbirdə çıxış edərək bildirib ki, müstəqillik illərində Ulu Öndərin rəhbərliyi ilə fərqli mədəniyyətlərə malik insanlar azərbaycançılıq ideologiyası ətrafında birləşmiş, sülh şəraitində birgəyaşayış modeli formalaşmışdır. Bu gün multikulturalizmin Azərbaycan modeli dünyaya nümunə kimi təqdim edilir.

Bakı Beynəlxalq Multikulturalizm Mərkəzinin əməkdaşı Tahir Kazımlı mərkəzin fəaliyyəti haqqında iştirakçılara ətraflı məlumat verib. O bildirib ki, Prezident İlham Əliyevin Fərmanı ilə 2014-cü ildə yaradılan Mərkəz ötən müddət ərzində ölkəmizdə uzun illərdən bəri sülh və əmin-amanlıq şəraitində yaşayan azsaylı xalqların mədəniyyətinin, dilinin, inanclarının qorunması istiqamətində müxtəlif səmərəli layihələr həyata keçirir.

Tədbir çərçivəsində dini-mənəvi dəyərlərə həsr olunmuş sərgi təşkil edilib. Eyni zamanda, Naxçıvan Dövlət Universitetində tələbələrlə də görüş keçirilib, Heydər məscid kompleksi ziyarət edilib.

Paylaş:

Baxılıb: 610 dəfə