Dirçələn Füzuli – Türk dünyasının azad şəhəri

Bakı:

19°C

88%

3m/s

Əlaqə

AZ RU EN

Ana səhifə / Arxiv / Dirçələn Füzuli – Türk dünyasının azad şəhəri

Dirçələn Füzuli – Türk dünyasının azad şəhəri

17.10.2025 [21:20]

Azərbaycanın əzəli torpaqlarından olan Füzuli şəhəri uzun illər ərzində düşmən işğalı altında qalmış, 1993-cü ildə Ermənistan silahlı qüvvələri tərəfindən zəbt edilmişdi. 27 il davam edən bu ədalətsizlik 2020-ci ilin 17 oktyabrında öz sonunu tapdı. Azərbaycan Respublikasının Müzəffər Ali Baş Komandanı İlham Əliyevin rəhbərliyi ilə şanlı Ordumuz tərəfindən Füzuli şəhəri işğaldan azad edildi. Bu tarixi gün artıq hər il Füzuli Şəhəri Günü kimi qeyd olunur və azərbaycanlıların yaddaşında Zəfər, birlik və dirçəliş rəmzi kimi yaşayır.

İkinci Qarabağ müharibəsində əldə olunan uğurlar nəticəsində Füzuli şəhəri döyüş meydanında qəhrəman əsgərlərimizin canı, qanı bahasına azad edildi. Bu zəfər Ali Baş Komandan İlham Əliyevin qətiyyəti, strateji liderliyi və xalq-ordu birliyinin təntənəsi idi. Füzulinin azad olunması təkcə hərbi deyil, həm də siyasi və mənəvi baxımdan böyük dönüş nöqtəsi oldu. Prezident İlham Əliyev həmin tarixi günü elan edərkən bildirmişdi: “Füzuli bizimdir! Qarabağ Azərbaycandır!”

Füzuli şəhəri azad edildikdən dərhal sonra Azərbaycan dövləti tərəfindən genişmiqyaslı bərpa və yenidənqurma işlərinə start verildi. Prezident İlham Əliyev və Birinci vitse-prezident Mehriban Əliyeva dəfələrlə Füzuliyə səfər edərək görülən işlərlə yerində tanış olublar. 2021-ci ildə istifadəyə verilən Füzuli Beynəlxalq Hava Limanı azad edilmiş ərazilərdə həyata keçirilən ilk böyük infrastruktur layihəsi kimi tarixə düşdü.

Füzulidə yollar, körpülər, su və enerji xətləri bərpa olunur, müasir məktəblər, xəstəxanalar, mədəniyyət ocaqları inşa edilir. Şəhərin mərkəzində aparılan abadlıq və tikinti işləri Füzulinin yaxın illərdə tamamilə yenidən qurularaq yaşıl, ağıllı şəhərə çevriləcəyindən xəbər verir.

Füzuli Şəhəri Günü yalnız bir coğrafi məkanın azad olunması günü deyil. Bu gün Azərbaycanın ərazi bütövlüyünün bərpasını, 30 ilə yaxın işğal altında qalmış torpaqların sahibinə qayıtmasını, milli qürurumuzun təntənəsini simvolizə edir. Eyni zamanda, bu gün şəhidlərimizin xatirəsinə ehtiram, qazilərimizin qəhrəmanlığına minnətdarlıq günüdür.

Füzuli Şəhəri Günü Azərbaycan xalqı üçün həm qürurverici, həm də gələcəyə ümidlə baxmağa imkan yaradan xüsusi bir gündür. Bu günün qeyd olunması gələcək nəsillərə azadlıq, mübarizlik və vətənpərvərlik ruhunun aşılanması baxımından mühüm əhəmiyyət kəsb edir. Füzuli – bu gün təkcə bir şəhərin adı deyil, həm də dirçəlişin, qələbənin və quruculuğun ünvanıdır.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 151 dəfə