Türk Dövlətləri Təşkilatının güclənən mövqeyi və təhlükəsizlik tərəfdaşlığı

Bakı:

27 °C

61 %

4 m/s

Əlaqə

AZ RU EN

Ana səhifə / Arxiv / Türk Dövlətləri Təşkilatının güclənən mövqeyi və təhlükəsizlik tərəfdaşlığı

Türk Dövlətləri Təşkilatının güclənən mövqeyi və təhlükəsizlik tərəfdaşlığı

22.09.2026 [15:34]

Türk Dövlətləri Təşkilatının (TDT) beynəlxalq arenadakı mövqeyinin möhkəmləndirilməsi üçün öz potensialından maksimum istifadə etməsi müasir dövrün ən vacib reallıqlarından biridir. Azərbaycan Prezidenti İlham Əliyevin TDT-yə üzv ölkələrin təhlükəsizlik üzrə rəhbər şəxsləri ilə keçirilən görüşdə vurğuladığı kimi, təşkilatın böyüyən gücü və geosiyasi çəkisi regionda sülhün və təhlükəsizliyin təmin olunmasında müstəsna rol oynayır. Bu gün dövlətlərimiz arasında mövcud olan mənəvi birlik, mədəniyyətlərin və dillərin oxşarlığı, ümumi etnik köklər – bütün bunlar təşkilatımızı möhkəmləndirən təməl sütunlardır. Dövlət başçısının qeyd etdiyi kimi, Türk dünyası bizim ailəmizdir və bu ailənin birliyi ümumi gələcəyimizin təminatıdır.

Hazırda mürəkkəb qlobal proseslərin cərəyan etdiyi bir şəraitdə beynəlxalq hüquq iflic vəziyyətinə düşüb. İkiüzlü standartların və güc amilinin ön plana çıxdığı bir zamanda Türk dövlətlərinin sıx həmrəylik nümayiş etdirməsi həyati əhəmiyyət kəsb edir. Buna baxmayaraq, həyata keçirilən məqsədyönlü siyasət nəticəsində ölkələrimizin ərazilərində sabitlik, sülh və təhlükəsizlik hökm sürür. Daxili sabitliyin qorunması, ictimai asayişlə, müxtəlif terror təhdidləri ilə bağlı vəziyyətin nəzarət altında olması xalqlarımızın dinc yaşamasına şərait yaradır. Lakin arxayınlaşmaq olmaz, çünki bugünkü təhdidlər ideoloji xarakter daşıyır və kənardan edilən təsir cəhdləri daha incə üsullarla həyata keçirilir. Bu baxımdan, birgə fəaliyyətimizin səmərəliliyini artırmaq üçün zəif yerlərimizin harada olduğunu müəyyənləşdirmək faydalı olacaq.

Təhlükəsizliklə yanaşı, Türk dünyasının iqtisadi və energetika potensialı da sürətlə artır. Azərbaycan bu prosesdə strateji körpü rolu oynayır. Biz həm dünya iqtisadiyyatını enerji resursları ilə təchiz edən ölkəyik, həm də Mərkəzi Asiya ölkələrindən Xəzər vasitəsilə enerji resurslarının daha sonra beynəlxalq bazarlara tranzitini həyata keçiririk. Şərq-Qərb və Şimal-Cənub nəqliyyat koridorlarının kəsişməsində yerləşən regionumuz qlobal logistikada əvəzolunmaz mövqeyə sahibdir. Bununla yanaşı, ölkələrimizin əhalisinin gənc və demoqrafik vəziyyətin müsbət olması da üstünlükdür. Bu böyük insan resursunun düzgün istiqamətləndirilməsi üçün gənclər təşkilatlarımızın qarşılıqlı fəaliyyətinə daha çox diqqət yetirməliyik.

TDT çərçivəsində ikitərəfli və çoxşaxəli əlaqələr də yüksələn xətlə inkişaf edir. Əlbəttə ki, bu münasibətlər sistemində Türkiyə-Azərbaycan əlaqələrinin xüsusi yeri, rolu var. Şuşa Bəyannaməsi ilə müttəfiqlik səviyyəsinə qaldırılan bu münasibətlər bütün Türk dünyası üçün bir nümunədir. Digər tərəfdən, Mərkəzi Asiya dövlətləri ilə də dostluq bağları sürətlə dərinləşir. Məsələn, Özbəkistanla əbədi dostluq haqqında müqavilə imzalamışıq ki, bu da strateji tərəfdaşlığımızın tarixi zirvəsidir. Ölkələrimiz arasında mənəvi-mədəni bağlar da çox güclüdür. Bakıda Əlişir Nəvainin abidəsi ucaldılıb, Daşkənddə isə Nizami Gəncəvinin abidəsi var. Bu, xalqlarımızın bir-birinin mədəni irsinə verdiyi yüksək dəyərin bariz göstəricisidir.

Qazaxıstanla da münasibətlərimiz strateji xarakter daşıyır və dinamik inkişaf edir. Biz bundan sonra da fəal qarşılıqlı fəaliyyət göstərəcək, Qazaxıstan və Azərbaycan xalqlarının rifahı naminə çalışacağıq. Yekun olaraq deyə bilərik ki, Türk Dövlətləri Təşkilatının güclənməsi, təhlükəsizlik sahəsində əməkdaşlığın dərinləşməsi və ideoloji təhdidlərə karşı birgə mübarizə aparılması regionumuzun işıqlı gələcəyini və dayanıqlı inkişafını təmin edən əsas amildir.

Nicat Quliyev

YAP Laçın rayon təşkilatının məsləhətçisi

Paylaş:

Baxılıb: 87 dəfə