Volodimir Zelenski: Rusiya 450-dən çox pilotsuz təyyarə və 30 raketlə Ukraynaya hücum edib

Bakı:

26 °C

55 %

2 m/s

Əlaqə

AZ RU EN

Ana səhifə / Dünya / Volodimir Zelenski: Rusiya 450-dən çox pilotsuz təyyarə və 30 raketlə Ukraynaya hücum edib

Volodimir Zelenski: Rusiya 450-dən çox pilotsuz təyyarə və 30 raketlə Ukraynaya hücum edib

10.10.2025 [22:56]

Ukrayna oktyabrın 10-na keçən gecə Rusiyanın onun enerji infrastrukturuna endirdiyi kütləvi zərbənin nəticələrini təmizləməyə davam edir.

AZƏRTAC xəbər verir ki, bu barədə Ukrayna Prezidenti Volodimir Zelenski məlumat verib.

O, bunu ukraynalıların normal fəaliyyətini təmin edən obyektləri hədəf alan 450-dən çox dron və 30-dan çox raketdən istifadə edərək “qeyri-qanuni və hesablanmış hücum” kimi xarakterizə edib.

“Hazırda ölkə üzrə 20-dən çox insanın yaralandığı məlumdur, hər kəsə lazımi yardım göstərilir. Təəssüf ki, Zaporojyeyə edilən hücumda bir uşaq ölüb. Ailəsinə və dostlarına dərin hüznlə başsağlığı verirəm”, -deyə Zelenski sosial şəbəkədə yazıb.

Dövlət başçısı qeyd edib ki, Kiyevdə elektrik və su təchizatının bərpası üzrə işlər davam etdirilir. Kiyev, Donetsk, Çerniqov, Çerkassı, Xarkov, Sumı, Poltava, Odessa və Dnepropetrovsk vilayətlərində elektrik enerjisinin verilişində fasilələr yaranıb. Zaporojye, Kirovoqrad və Xerson vilayətlərində bərpa işləri aparılır. Bütün lazımi xidmətlər yerindədir, xilasedicilər dron və raket hücumlarının nəticələrini aradan qaldırırlar.

"Mən icmaların inkişafı naziri Aleksey Kulebadan, energetika naziri Svetlana Qrinçukdan, daxili işlər naziri İqor Klimenkodan və yerli rəhbərlərdən mütəmadi hesabatlar alıram. Bizə bütün səviyyələrdə rəsmilərdən maksimum səmərəlilik lazımdır”, -deyə Prezident vurğulayıb.

Zelenski əlavə edib ki, istilik mövsümü başlamazdan əvvəl Rusiya qəsdən Ukraynanın mülki və enerji infrastrukturunu hədəfə alır. O, beynəlxalq tərəfdaşları qətiyyətlə hərəkət etməyə – hava hücumundan müdafiə sistemlərinin tədarükünü artırmağa və Rusiyaya qarşı yeni sanksiyalar tətbiq etməyə çağırıb.

“Bizə boş vədlər deyil, ABŞ, Avropa və G7-dən qətiyyətli addımlar lazımdır. Biz G20-nin və sülhdən danışan, lakin real addımlar atmaqdan çəkinənlərin bu vəhşiliyə cavab verəcəyinə ümid edirik. Dünya özünü bu cinayətlərdən qoruya bilər və bu, qlobal təhlükəsizliyi gücləndirəcək”, -deyə Ukrayna lideri sözlərini yekunlaşdırıb.

Qeyd edək ki, oktyabrın 10-na keçən gecə Rusiya hücum pilotsuz uçuş aparatlarından və müxtəlif növ raketlərdən istifadə edərək Ukraynaya kütləvi hücuma keçib. Paytaxtın atəşə tutulması nəticəsində 12 nəfər yaralanıb. Kiyev meri Vitali Kliçko bildirib ki, düşmən hücumları səbəbindən çayın sol sahilində elektrik enerjisi tamamilə kəsilib.

Dnepr və Zaporojye bölgələri də atəşə məruz qalıb, yanğınlar baş verib və mülki əhali arasında itkilər olub. İlkin məlumatlara görə, Rusiya hücumlarının əsas hədəfi enerji infrastrukturu olub.

Paylaş:

Baxılıb: 570 dəfə