“Alov Qoruyanlar”

Bakı:

26 °C

70 %

2 m/s

Əlaqə

AZ RU EN

Ana səhifə / İdman / “Alov Qoruyanlar”

“Alov Qoruyanlar”

10.06.2015 [09:09]

2 gündən sonra Azərbaycan “Bakı-2015” ilk Avropa Oyunları yarışmasına ev sahibliyi edəcək. Artıq Azərbaycan birinci Avropa Oyunlarına tam hazırdır və qonaqları qəbul etməyə başlayır. Sözsüz ki, bu cür mötəbər yarışmanın Bakıda keçirilməsi Avropa ailəsinin Azərbaycana böyük etimadının bariz nümunəsidir. Birinci Avropa Oyunları tarixi bir idman hadisəsi olmaqla yanaşı, respublikamızın ictimai-siyasi, humanitar, sosial-iqtisadi həyatı haqqında real gerçəklər barədə dünya ictimaiyyətinə məlumat vermək baxımından da mühüm əhəmiyyət kəsb edir.
Sevindirici haldır ki, dünyanın diqqətini çəkən ilk Avropa Oyunlarını hazırda bütün ictimaiyyət nümayəndələri kimi gənclər, eləcə də, “Bakı-2015”in könüllüləri də səbirsizliklə gözləyirlər.
Ənənəmizə sadiq qalaraq, “Yeni Azərbaycan” qəzetinin “Alov Qoruyanlar” adlı rubrikasında ilk Avropa Oyunlarında fəaliyyət göstərəcək növbəti könüllü gənclərimizi oxucularımıza təqdim edirik.
“Bakı-2015” ölkəmiz üçün böyük əhəmiyyət daşıyır”. Bunu Bakı Dövlət Universitetinin tələbəsi, “Bakı-2015”in könüllüsü Arzu Qurbanova deyib.
O, ilk Avropa Oyunlarının tariximizi, eləcə də, üzləşdiyimiz faciələri və mədəniyyətimizi təqdim etmək baxımından dünyanın informasiya məkanına yeni çıxış imkanı olduğunu bildirib: “İlk Avropa Oyunları ilə həm Azərbaycan, həm idmançılar, həm də ölkə vətəndaşları tarixə düşəcəklər. Çox sevindirici haldır ki, Azərbaycanın iqtisadi, siyasi və əmin-amanlığın təmini baxımından özünü sabit ölkə kimi tam təsdiqləməsi 2015-ci ildə birinci Avropa Oyunlarının məhz Bakı şəhərində keçirilməsi ilə bağlı tarixi qərarın qəbul edilməsi ilə nəticələnib. Artıq bu Oyunların keçirilməsinə sadəcə 2 gün qalır. Bu da bizim həyəcanımızı daha da artırır. Oyunların keçiriləcəyi günü səbirsizliklə gözləyirik. Bizi daha çox həyəcanlandıran, eyni zamanda, qürurlandıran - “Bakı-2015” könüllüləri olaraq yarışlarda iştirakımızdır. İnanıram ki, biz bu işin öhdəsindən layiqincə gəlməyi bacaracağıq”.
“Azərbaycan ilk Avropa Oyunlarına yüksək səviyyədə ev sahibliyi edəcək”. Bunu Bakı Dövlət Universitetinin tələbəsi, “Bakı-2015”in könüllüsü Səadət Qarayeva deyib.
O, sözügedən Oyunların ölkəmizin təbliğ edilməsi, eyni zamanda, daha da tanınması baxımından mühüm əhəmiyyət kəsb etdiyini bildirib. Onun sözlərinə görə, yarışlarda “Bakı-2015” könüllülərinin üzərinə ikiqat məsuliyyət düşür və onlar bu işin öhdəsindən layiqincə gələcəklərinə inanırlar: “Bura gələn turistlərdə ölkəmiz haqqında xoş təəssüratlar yaratmaq üçün biz əlimizdən gələni etməyə hazırıq. Çünki istənilən beynəlxalq tədbir Azərbaycanda, hər zaman yüksək səviyyədə keçirilib. Mən inanıram ki, ölkəmiz bu yarışlara da yüksək səviyyədə ev sahibliyi edəcək. Ümidvaram ki, ilk Avropa Oyunlarının keçirilməsində əldə edəcəyimiz təcrübə gələcəkdə digər mühüm yarışlara ev sahibliyi etməyimizə də şərait yaradacaq və təcrübəmizi artıracaq”.
“Bakı-2015”in könüllüsü birinci Avropa Oyunlarının ölkə idmanının daha da inkişaf etməsinə müsbət təsir göstərəcəyini bildirib: “Düşünürəm ki, ilk Avropa Oyunları idmanımızın inkişafına səbəb olmaqla yanaşı, eyni zamanda, gənclərimizi idmanla məşğul olmağa daha da həvəsləndirəcək. Bu yarışlar, eyni zamanda, ölkədə yeni nəsil idmançıların yetişməsinə də səbəb olacaq”.
Vüsalə CAVANŞİR

Paylaş:

Baxılıb: 1023 dəfə