Humanitar əməkdaşlıq nümunəsi

Bakı:

24 °C

61 %

0 m/s

Əlaqə

AZ RU EN

Ana səhifə / Sosial / Humanitar əməkdaşlıq nümunəsi

Humanitar əməkdaşlıq nümunəsi

31.01.2026 [10:34]

Leyla Əliyeva Beynəlxalq Təbiəti Mühafizə Birliyində görüşlər keçirib

Heydər Əliyev Fondunun respublikamızda və ölkə hüdudlarından kənarda reallaşdırdığı xeyriyyəçilik, humanitar-mədəni təyinatlı layihələr quruma bütün dünyada böyük nüfuz qazandırıb. Fondun xarici ölkələrdə həyata keçirdiyi humanitar və mədəni layihələr Azərbaycanı sülhsevər, humanist və əməkdaşlığa açıq bir dövlət kimi tanıdır. Müxtəlif beynəlxalq təşkilatlarla, fondlarla və qurumlarla qurulan tərəfdaşlıqlar Fondun qlobal humanitar proseslərdə fəal iştirak etdiyini nümayiş etdirir. Bu əməkdaşlıqlar nəticəsində Fondun beynəlxalq əlaqələri ildən-ilə genişlənir və möhkəmlənir.

Bütün bunların nəticəsidir ki, Heydər Əliyev Fondu bu gün təkcə milli miqyasda deyil, dünya səviyyəsində də etibarlı və nüfuzlu humanitar təşkilat kimi tanınır. Fondun ardıcıl, məqsədyönlü və xoş məramlı fəaliyyəti gələcəkdə də beynəlxalq əməkdaşlığın daha da dərinləşəcəyinə və humanitar dəyərlərin geniş yayılmasına mühüm töhfələr verəcəyinə əminlik yaradır.

Dünən Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva İsveçrənin Qland şəhərində Beynəlxalq Təbiəti Mühafizə Birliyinin (IUCN) baş direktoru Qretel Agilar ilə görüş keçirib. Görüşdə Azərbaycan və regionda ətraf mühitin mühafizəsi sahəsində mövcud çağırışlar fonunda beynəlxalq əməkdaşlığın rolu, qlobal və regional səviyyədə əlaqələndirilmiş yanaşmaların əhəmiyyəti, habelə bu istiqamətdə dialoqun möhkəmləndirilməsinin perspektivləri ətrafında geniş fikir mübadiləsi aparılıb.

Bildirilib ki, 2014-cü ildən etibarən IUCN-in tamhüquqlu üzvü olan IDEA İctimai Birliyi təbiətin mühafizəsi və biomüxtəlifliyin qorunması istiqamətində beynəlxalq təşəbbüslərdə fəal iştirak edir və bu sahədə əməkdaşlığın genişləndirilməsinə töhfə verir. IUCN-in ötən il Əbu-Dabidə keçirilən Ümumdünya Mühafizə Konqresində təqdim olunmuş birgə pavilyon və bir sıra digər layihələrə toxunan görüş iştirakçıları qazanılan müsbət təcrübəni qeyd edərək, qarşılıqlı əməkdaşlığın uğurla davam edəcəyinə inandıqlarını ifadə ediblər.

Həmçinin görüş çərçivəsində Azərbaycanda IUCN ilə yüksəksəviyyəli regional dialoqun təşkili, beynəlxalq tədbirlər çərçivəsində birgə iştirak, o cümlədən Dünya Şəhərsalma Forumu (WUF13), Ümumdünya Ətraf Mühit Günü və COP31 çərçivəsində əməkdaşlıq imkanları müzakirə olunub.

Görüşün yekununda IUCN-in Azərbaycanda ölkə ofisinin açılması istiqamətində fəaliyyətlərin, eləcə də əməkdaşlıq əlaqələrinin daha da genişləndirilməsini nəzərdə tutan Niyyət Bəyannaməsi imzalanıb.

Tərəflər aparılan müzakirələri IDEA İctimai Birliyi ilə IUCN arasında uzunmüddətli və çoxtərəfli əməkdaşlığın inkişafı baxımından mühüm addım kimi dəyərləndiriblər.

Qeyd edək ki, 1948-ci ildən etibarən fəaliyyət göstərən IUCN ətraf mühitin mühafizəsi, biomüxtəlifliyin qorunması, eləcə də dayanıqlı inkişaf sahəsində dünyanın aparıcı beynəlxalq təşkilatlarından biridir. IUCN 1964-cü ildə nəsli kəsilmək təhlükəsi altında olan canlı və bitki növlərinin vəziyyətini əks etdirən Qırmızı Kitabı yaradaraq qlobal səviyyədə ekoloji qiymətləndirmə və qərarvermə proseslərinə mühüm töhfə verib.

Yeganə BAYRAMOVA

Paylaş:

Baxılıb: 465 dəfə