Bələdiyyə-mətbuat əməkdaşlığı yeni mərhələyə qədəm qoyur

Bakı:

28 °C

53 %

9 m/s

Əlaqə

AZ RU EN

Ana səhifə / Sosial / Bələdiyyə-mətbuat əməkdaşlığı yeni mərhələyə qədəm qoyur

Bələdiyyə-mətbuat əməkdaşlığı yeni mərhələyə qədəm qoyur

24.07.2015 [09:31]

Binəqədi rayonunda fəaliyyət göstərən 5 bələdiyyə KİV təmsilçiləri qarşısında hesabat verdi
Dünən Binəqədi rayon bələdiyyələri tərəfindən Azərbaycan milli mətbuatının 140 illik yubileyi münasibətilə “Bələdiyyə-mətbuat əməkdaşlığı: yeni mərhələ və hesabatlılıq” adlı tədbir keçirilib. Tədbirdə əvvəlcə iyulun 23-nün Ağdam rayonunun işğal tarixi olduğu bildirilib, həmin gün erməni təcavüzünün qurbanı olanların və ərazi bütövlüyümüz uğrunda savaşda həyatını itirənlərin xatirəsi bir dəqiqəlik sükutla yad edilib.
Sonra tədbiri giriş nitqi ilə açan Azərbaycan Qəsəbə Bələdiyyələri Milli Assosiasiyasının rəhbəri, Rəsulzadə Bələdiyyəsinin sədri Hümbət Hüseynov milli mətbuatımızın 140 illik yubileyi münasibətilə media mənsublarını təbrik edib. Bələdiyyə sədri bildirib ki, tədbirin keçirilməsində əsas məqsəd həm jurnalist dostların bayram sevincinə sevinc qatmaq, həm də bələdiyyə olaraq ictimaiyyət qarşısında hesabat verməkdir: “Bildiyiniz kimi, bələdiyyələr seçkili orqan olaraq ildə iki dəfə öz seçiciləri qarşısında hesabat verir, sakinlərini görülən işlər barədə məlumatlandırır, gələcək fəaliyyətini, planlarını açıqlayırlar. Kütləvi informasiya vasitələrinin auditoriyasının daha geniş, oxucu və dinləyici kütləsinin daha əhatəli olmasını nəzərə alaraq, biz - Binəqədi rayonunda fəaliyyət göstərən 5 bələdiyyə sizlər qarşısında da hesabat verməyi qərara aldıq”.
Belə bir tədbiri bələdiyyə-mətbuat əməkdaşlığının yeni mərhələyə qədəm qoymasının bariz nümunəsi adlandıran H.Hüseynov “məhz Prezident İlham Əliyevin bələdiyyələrlə bağlı haqlı iradlarını nəzərə alaraq bu tədbiri keçirməyə qərar verdik” deyib. O, bildirib ki, ümumilikdə bələdiyyə idarəçiliyinin səmərəliliyi daha da artıb. Bələdiyyələrin yerli əhali ilə qarşılıqlı münasibətləri xeyli yaxşılaşıb, ictimai əlaqələri güclənib: “Dövlət tərəfindən bələdiyyələrə göstərilən diqqət və verilən hərtərəfli dəstək onların işini daha da yaxşılaşdırıb, yerli sosial-iqtisadi məsələlərin həlli imkanlarını artırıb. Ancaq bununla kifayətlənmək qeyri-mümkündür. Çünki ölkəmiz inkişaf edir, dövlət və qeyri-dövlət qurumlarının fəaliyyətində yeni texnologiyalar tətbiq olunur, idarəetmə ən müasir tələblər səviyyəsində qurulur, əhali arasında müasir ödəniş mədəniyyəti formalaşır. Şəffaflığı təmin etməyin əsas vasitələrindən biri kimi bütün əməliyyatların nağdsız yolla həyata keçirilməsi öz mühüm nəticələrini göstərməkdədir. Ona görə də bələdiyyələrin bu prosesdən kənarda qalması mümkün deyil”.
Tədbirdə, həmçinin, Binəqədi rayon Bələdiyyəsinin sədri Sitarə Cabbarlı, Binəqədi qəsəbə Bələdiyyəsinin sədri Aytac Əliyeva, Biləcəri Bələdiyyəsinin sədri Hikmət Quliyev və Xocasən Bələdiyyəsinin sədri Anar Abbasov 6 aylıq hesabat məruzəsi ilə çıxış ediblər. Hesabatlar dinlənildikdən sonra bələdiyyə sədrləri jurnalistləri maraqlandıran sualları cavablandırıblar.
Sonda bir qrup media nümayəndəsinə Binəqədi rayon bələdiyyələri adından “Bələdiyyə dostu” Fəxri diplomları və xatirə hədiyyələri təqdim edilib.
Nadir AZƏRİ

Paylaş:

Baxılıb: 929 dəfə