Myanmada nə baş verir?

Bakı:

17°C

63%

5m/s

Əlaqə

AZ RU EN

Ana səhifə / Analitik / Myanmada nə baş verir?

Myanmada nə baş verir?

13.04.2023 [10:58]

N.BAYRAMLI

Xarici kütləvi informasiya vasitələrinin yaydığı məlumata görə, Myanma ordusu ölkənin şimalında yerləşən Sikain bölgəsindəki Paziqi kəndi yaxınlığında müxalif qüvvələrə hava hücumları təşkil edib.“Associated Press” agentliyi hadisə şahidlərinə istinadən bildirib ki, hava hücumu kəndin yaxınlığında yeni müxalifət ofisinin açılış mərasimi zamanı həyata keçirilib. İnsident şahidlərin sözlərinə görə, yerli vaxtla səhər saat 8 radələrində insanların üzərinə təyyarələrdən hava bombaları atılıb. KİV-in məlumatına əsasən, hücum nəticəsində 100-ə yaxın yerli sakin həlak olub, daha 50 nəfər yaralanıb. Yaralılar və ölənlər arasında uşaqlar da var. Yaralıların və ölənlərin dəqiq sayı məlum deyil. BMT bu hücumu pisləyib.

Rusiyanın “RİA” Novosti agentliyi isə yazıb ki, Myanma hakimiyyəti hücumun həyata keçirildiyini təsdiqləyib. “Hərbçilər mülki şəxslərə zərər vermədən məhdud hava zərbələri endiriblər”, - deyə açıqlamada qeyd edilir. Hakimiyyət orqanları terrorçuların mövqelərinə aviazərbələr endirildiyini bildirib.

Ümumiyyətlə, xarici və yerli müxalifət mediası vaxtaşırı Myanma hakimiyyətinin müxalif əhaliyə qarşı hava bombalarından istifadə etdiyini yazır. Məsələn, bildirilir ki, bu ilin əvvəlindən hərbçilər Sikain bölgəsində, eləcə də Karen, Kaçin və Çin əyalətlərində həm mülki, həm də müqavimət hədəflərinə hava zərbələrini artırıb. Bu gərginlik etnik silahlı qrupların çıxışlarında 2023-cü ildə ordunu devirməyə söz verdikdən sonra baş verib. 2021-ci ilin fevralında Myanma ordusunu əsas qarantı edən konstitusiya maddəsinə əsaslanaraq, ordu mülki hökuməti devirdi. Onlar 2020-ci ilin noyabrında keçirilən parlament seçkilərində Demokratiya Uğrunda Milli Liqanın xeyrinə kütləvi saxtakarlıq edildiyini açıqlayıblar. Bu partiyanın lideri Aunq San Suu Kyi ev dustaqlığına buraxılıb və daha sonra bir sıra ittihamlarla üzləşib. Ümumilikdə, o, 33 il müddətinə azadlıqdan məhrum edilib.

Qeyd edək ki, çağdaş Myanmada bu cür hadisələr qeyri-adi qəbul edilmir. Cənub-Şərqi Asiyada yerləşən Myanma Çin, Laos, Tayland, Hindistan və Banqladeş ilə sərhəddədir. Myanma daha çox bu ölkədə müsəlmanların kütləvi qətlə yetirilməsi ilə dünya mediasının gündəmində yer alır. Məsələ ondadır ki, əsasən Myanmanın şimal-qərbində, Banqladeşlə sərhəd əyaləti Arakanda yaşayan müsəlman rohinca xalqına qarşı ayrı-seçkilik, düşmən münasibət yerli hakimiyyət tərəfindən hər zaman davam edib. Hakimiyyət, buddistlər müsəlmanları dəfələrlə kütləvi qırğına məruz qoyublar. Ölkədə əhalinin 83 faizi buddistlər, cəmi 4 faizi müsəlmanlardır. Ekspertlərin fikrincə, bu problem indi deyil, 70 ildən çoxdur davam edir. Hələ 1940-cı illərdə Myanma müstəqil olmamışdan əvvəl rohinca müsəlmanları təşkilatlanaraq müstəqillik mübarizəsi başladıb. Və o zamandan etibarən yerli buddist xalqla müsəlmanlar arasında ilk münaqişələr baş verib. II dünya müharibəsi zamanı Myanma ərazilərini yaponlar işğal edib və bu zaman etnik münaqişə daha da böyüyür. 1946-cı ildə isə arakanlılar yeni qurulmuş Pakistan dövlətinə müraciət edərək onlara birləşmək istədiklərini bildirirlər. Daha sonra isə Arakanda təşkilatlanan rohinca müsəlmanları Birma hakimiyyətindən muxtariyyət tələb etsələr də, bu istək rədd edilib və baş qaldıran bir neçə müsəlman hərəkatı Myanma ordusu tərəfindən yatırılıb. Son illərdə də Myanma ordusu və buddist əhali tərəfindən müsəlmanlara qarşı kütləvi qırğınlar törədilib. Ordu özünün qanlı əməllərinə “İslam radikalizmi” və terrorla mübarizə donu geyindirməyə çalışıb. Bu qırğınların nəticəsində on minlərlə müsəlman ölkəni tərk etməyə məcbur olub.

Bəzi ölkələr, eləcə də İslam Əməkdaşlıq Təşkilatı Myanmada müsəlmanlara qarşı qırğınları pisləyib. Lakin bütövlükdə, beynəlxalq birlik, xüsusilə Qərb ölkələri bu qırğınlara qarşı səssiz qalmaqda davam edir.

Paylaş:

Baxılıb: 675 dəfə