Almaniyanın Maqdeburq şəhərində Milad yarmarkasına hücum nəticəsində həlak olanların sayı 5-ə çatıb

Bakı:

22 °C

65 %

5 m/s

AZ RU EN

Ana səhifə / Dünya / Almaniyanın Maqdeburq şəhərində Milad yarmarkasına hücum nəticəsində həlak olanların sayı 5-ə çatıb

Almaniyanın Maqdeburq şəhərində Milad yarmarkasına hücum nəticəsində həlak olanların sayı 5-ə çatıb

22.12.2024 [10:57]

Almaniyanın Saksoniya-Anhalt əyalətinin paytaxtı Maqdeburq şəhərində Milad yarmarkasında törədilən qanlı hadisə nəticəsində həlak olanların sayı 5-ə çatıb. Hadisə nəticəsində xəsarət alanların sayının 205-ə çatdığı bildirilir. Onlardan 40 nəfərinin vəziyyəti xüsusilə ağır qiymətləndirilir.

AZƏRTAC-ın Almaniyadakı xüsusi müxbiri Maqdeburq şəhərində hadisənin baş verdiyi ərazidə olub.

Hadisədən sonra Maqdeburq şəhərində əhalinin sıx olduğu ərazilərdə, o cümlədən Milad yarmarkasının ətrafında geniş təhlükəsizlik tədbirləri görülüb, polis nəzarəti gücləndirilib. Milad yarmarkasının ərazisinə şəhər sakinlərinin, o cümlədən media nümayəndələrinin girişinə icazə verilmir.

Şəhər sakinləri hadisənin baş verdiyi əraziyə gələrək həlak olanların xatirəsini ehtiramla yad edir, şamlar yandırır və çiçəklər düzürlər. Milad yarmarkasının yaxınlığındakı Müqəddəs İohan kilsəsinin qarşısında izdiham daha gurdur. İnsanlar buraya axın edərək kilsəsinin əsas qapısının qarşısına çiçəklər, şamlar düzür, həlak olanların xatirəsini yad edirlər.

Almaniyanın Federal Kansleri Olaf Şoltz Maqdeburq şəhərinə səfər edib, hadisənin törədildiyi Milad yarmarkasının ərazisinə baxış keçirib.

Kansler media nümayəndələrinə açıqlamasında xəsarət alanlardan 40 nəfərinin vəziyyətinin ağır olduğunu vurğulayıb. Milad bazarlarının insanların istirahət üçün üz tutduqları məkan olduğunu qeyd edən Kansler hücumu dəhşətli hadisə kimi dəyərləndirib. Baş nazir bu cür hadisələrlə əlaqədar cəmiyyətdəki qütbləşməyə yol verilməməsinin vacibliyini xüsusi vurğulayaraq, insanları birliyə və mehribanlığa çağırıb, nifrətin birlikdə yaşama mədəniyyətinə təsir etməməsinin vacibliyini qeyd edib.

Saksoniya-Anhalt əyalətinin Baş naziri Rayner Haselof isə açıqlamasında həlak olanların sayının 5-ə çatdığını, xəsarət alanların sayının 200-dən çox olduğunu bildirib. O, təhlükəsizlik məsələsinin gələcəkdə daha sıx şəkildə nəzərdən keçirilməsinin vacibliyini diqqətə çatdırıb.

Xatırladaq ki, əslən Səudiyyə Ərəbistanından olan 50 yaşlı Taleb A. adlı şəxs dekabrın 20-də yerli vaxtla saat 19:04-də (Bakı vaxtı ilə 22:04) yüksək sürətlə idarə etdiyi “BMW X3” markalı avtomobili şəhərdəki Milad yarmarkasında izdihamın üzərinə sürüb. Avtomobil yarmarkanın ərazisində 400 metr məsafədə hərəkət edərək qarşısına çıxan şəxsləri vurub.

Hadisə yerində yaxalanan şəxsin 2006-cı ildən Almaniyada yaşadığı və Bernburq şəhərində həkim (psixiatr) işlədiyi müəyyən edilib. Onun sosial mediada İslam dini əleyhinə çıxış və çağırışlar etdiyi məlum olub.

Qeyd edək ki, oxşar hadisə səkkiz il əvvəl Berlində baş vermişdi. 2016-cı il dekabrın 19-da terrorçular yük avtomobilini Berlinin Braytşayd meydanındakı Milad yarmarkasında insanların üstünə sürməsi nəticəsində 13 nəfər həlak olmuş, 70-dən çox insan xəsarət almışdı.

Paylaş:

Baxılıb: 541 dəfə