Məğlub Ermənistanda total anarxiya və siyasi böhran hökm sürür

Bakı:

12 °C

87 %

5 m/s

Əlaqə

AZ RU EN

Ana səhifə / Dünya / Məğlub Ermənistanda total anarxiya və siyasi böhran hökm sürür

Məğlub Ermənistanda total anarxiya və siyasi böhran hökm sürür

09.01.2021 [09:16]

44 günlük müharibədə Azərbaycanın qarşısında ağır məğlubiyyətə uğrayan təcavüzkar Ermənistanda hazırda siyasi, iqtisadi və mənəvi-psixoloji böhran hökm sürür. Erməni mediasında çıxış edən ekspertlərin əksəriyyəti ölkədə xaos vəziyyətinin və hakimiyyətsizliyin mövcudluğu barədə də rəylər səsləndirir. Yerli mütəxəssislərin qənaətlərinə görə, mövcud hökumət nəinki məğlub Ermənistanı düşdüyü bataqlıqdan çıxarmağa, hətta hər hansı islahat aparmağa da qadir deyil. Ermənistan mediasının yazdığına görə, bütün səviyyələrdə hökumətin istefası tələb edilsə də, baş nazir Nikol Paşinyan son bəyanatlarında da çoxdan laxlamış kreslosundan əl çəkmək fikrində olmadığını dilə gətirir.

Qeyd edək ki, bu vəziyyətin fonunda ölkədə vətəndaş itaətsizliyi və kütləvi etiraz aksiyaları da davam edir. Belə ki, yanvarın 8-də ədliyyə nazirliyinin qarşısında növbəti mitinq təşkil edilib. "News.am" yazır ki, buna qədər nazirliyin binasının ətrafına çox sayda polis qüvvəsi cəmləşdirilib. Mitinqin əsas təşkilatçısı, hüquq müdafiəçisi Ruben Melikyan mətbuatda yayılan məlumatlarla əlaqədar ədliyyə nazirliyindən açıqlama tələb etdiklərini bildirib. Hüquq müdafiəçisi, həmçinin Paşinyan hökumətini fəaliyyətsizlikdə ittiham edib, mövcud hakimiyyətin hər hansı islahat aparmaq iqtidarında olmadığını deyib.

Yeri gəlmişkən, əksər siyasi partiya rəhbərləri hüquq-mühafizə orqanlarından Paşinyanı həbs etməyi tələb edirlər. Məsələn, "Panorama.am"a açıqlama verən "Yerkir Tsirani" ("Əriklər ölkəsi") partiyasının lideri Zaruhi Bostançıyan deyib ki, ölkədə dövlət hakimiyyətini məhv edən yeni tip prezident və baş nazir mövcuddur. Onun sözlərinə görə, qanunverici hakimiyyət də müstəqil fəaliyyət göstərə bilmir. "Cinayəti ört-basdır etmək cinayətdir", - deyən partiya sədri Ermənistan təhlükəsizlik xidmətinin direktoru və baş qərargah rəisini hərəkət etməyə çağırıb. Bu arada, "Fakt İnfo"ya açıqlama verən "Vahid Ermənistan" partiyasının sədri Artur Kazinyan isə ölkədə hüquq-mühafizə sisteminin də bərbad vəziyyətdə olduğunu bildirib. Onun sözlərinə görə, hüquq-mühafizə orqanlarında əməkdaşlar müəyyən təzyiq altında fəaliyyət göstərir və liderlərini həbs etmək barədə qərar verə bilmirlər.

Ermənistanın düşdüyü durumu "Sputnik Ermənistan"a dəyərləndirən polittexnoloq Vigen Hakopyan isə ölkədə total anarxiya hökm sürdüyünü bildirib: "Ermənistanın II Qarabağ müharibəsindəki məğlubiyyətindən sonra siyasi sahədə izahı verilməyən bir xaos hökm sürür. Bu anarxiya vəziyyətində vaxt baş nazirə qarşı işləyir. Müxalifət uzun müddət aksiyalar keçirə, küçələri bağlaya və ya başqa vasitələrə əl ata bilər. Ancaq ölkənin gələcəyi üçün müxalifət deyil, hökumət məsuliyyət daşıyır. Eyni zamanda, ölkədə nə hakimiyyət, nə də müxalifət real gücə sahibdir. Ermənistanda ən pis variant göz qabağındadır: total anarxiya".

Göründüyü kimi, Ermənistan ağır sosial-iqtisadi böhran içindədir. Məğlub ölkədə xaos və anarxiyanın mövcud olduğu bütün səviyyələrdə etiraf edilir. Uzun illərdir işsizlik və sosial-iqtisadi problemlərlə üzləşən əhali hazırda səhiyyədəki bərbad vəziyyətdən, koronavirusla mübarizədəki uğursuzluqdan əziyyət çəkir, habelə müharibənin yaratdığı fəsadların həm maddi, həm də mənəvi-psixoloji təsirini yaşayır. Mütəxəssislərin vurğuladıqları kimi, ölkəni total anarxiyadan çıxaracaq elə bir qüvvə olmadığı üçün yaranmış böhran məğlub Ermənistanı fəlakətə doğru sürükləyir.

Qaşqay ZİYƏDDİNOĞLU

Paylaş:

Baxılıb: 863 dəfə