Məğlub Ermənistanda yeni siyasi kataklizmlər...

Bakı:

0 °C

80 %

10 m/s

Əlaqə

AZ RU EN

Ana səhifə / Dünya / Məğlub Ermənistanda yeni siyasi kataklizmlər...

Məğlub Ermənistanda yeni siyasi kataklizmlər...

28.01.2021 [08:53]

Müharibədə uduzaraq kapitulyasiya aktına imza atan Ermənistanda 3 aya yaxındır davam edən daxili böhran daha da dərinləşməkdədir. Belə ki, cəmiyyətdə hökm sürən ümidsizlik və xaos vəziyyətinin fonunda hökumətin istefası tələbi ilə keçirilən etiraz aksiyaları müxtəlif formalarda davam edir. Erməni KİV-nin yaydığı məlumata görə, müxalif qüvvələrin baş nazir postuna vahid namizədi Vazgen Manukyanın rəhbərlik etidiyi “Vətənin xilası naminə hərəkat”ın liderlərinin regionlarda vətəndaşlarla görüşləri davam edir.
“News.am” yazır ki, “Vətənin xilası naminə hərəkat”ın üzvləri bu dəfə Ararat vilayətinə səfər ediblər. Vilayət sakinləri ilə görüşdə V.Manukyan bildirib ki, müxalifətin qapalı salonlarda tədbirləri və mitinqləri davamlı olacaq. Hərəkatın daxilində fikir ayrılığına dair iddialara gəlincə, V.Manukyan “Çiçəklənən Ermənistan” partiyasının onun namizədliyini qəbul etmədiyi xəbərini “uydurma” adlandırıb. O həmçinin Nikol Paşinyanın mütləq şəkildə hakimiyyətdən uzaqlaşdırılacağına əmin olduğunu bildirib: “İstənilən halda istefa olacaq, bu adam qala bilməz, imkan verməyəcəyik. Erməni müxalifəti konstitusion yolla hakimiyyət dəyişikliyinin tərəfdarıdır, üsyana da getməyə hazırdır, lakin zorakılıq tətbiqetmə ehtimalını istisna edir. Biz hələlik konstitusiya yolu ilə Nikolu qovmaq istəyirik. Əgər bu yol nəticə verməsə, üsyana getməliyik”.
Paşinyanın növbədənkənar seçki ilə bağlı təklifinə gəlincə, V.Manukyan qeyd edib ki, müxalifət də seçki keçirilməsinin tərəfdarıdır, amma mövcud hakimiyyətin dövründə deyil: “Son müharibə elə nəticələrə gətirib çıxarıb ki, insanlar hələ də şok vəziyyətindən tam ayıla bilməyiblər. Kapitulyasiya aktı imzalandıqdan iki ay sonra Nikol hakimiyyətdən getməyibsə, deməli, sona qədər vəzifədə qalmağa çalışacaq. Bu halda hansı demokratik seçkilərdən danışmaq olar?”
Bu arada, “Hraparak” qəzeti yazır ki, son həftələrdə hakim komanda növbədənkənar seçkilərə hazırlıqla məşğul olur. Onlar artıq partiyanın regional strukturlarını ziyarət etməyə başlayıblar. Hətta Paşinyanın may ayında növbədənkənar seçki keçirməyi planlaşdırması barədə qeyri-rəsmi məlumatlar yayılıb.
Yeri gəlmişkən, müxalifətin cəmiyyətlə dialoqun açarını tapa bilmədiyini bəyan edən politoloq və keçmiş deputat Vahe Ohannisyan “Sputnik-Ermənistan”a verdiyi açıqlamada deyib ki, növbədənkənar seçkilər zərurət olsa da, indi keçirilməməlidir: “Bu cür tələsik seçkidən yaranan riskləri, bu ssenarinin müsbət və mənfi tərəflərini anlamalıyıq. Növbədənkənar seçkilər yeni parlamentin və hökumətin qurulmasına gətirib çıxaracaq, ancaq daxili siyasi vəziyyətin sabitləşməsinə kömək etməyəcək. Biz mövcud problemləri həll etmək əvəzinə seçkilərlə bağlı daxili qarşıdurmaya gedirik. Mənəvi-psixoloji baxımdan daha çox nəzərdən keçirilməli olan digər problem minlərlə vətəndaşın şok vəziyyətində olduğu bir vaxtda seçkiyə getməyin nə qədər düzgün olmasıdır”.
Bəzi yerli ekspertlər isə ötən ilin sonunda daha fəal olan müxalifətin çıxılmaz vəziyyətə düşdüyünü iddia edirlər. Dinc yolla hakimiyyətin istefasına nail olmayan müxalifətin qiyama hazırlaşması da bu səbəblə əlaqələndirilir. Göründüyü kimi, Paşinyanın mütləq şəkildə hakimiyyətdən uzaqlaşdırılmasının vacibliyini bəyan edən rəqibi konstitusion yolla dəyişikliyə tərəfdar olsa da, üsyanı da istisna etmir. Bu vəziyyət isə yaxın vaxtlarda məğlub ölkədə daha ciddi qarşıdurmaların olacağından xəbər verir.
Qaşqay ZİYƏDDİNOĞLU

Paylaş:

Baxılıb: 709 dəfə