Ermənistanda hakimiyyət böhranı...

Bakı:

25 °C

64 %

0 m/s

Əlaqə

AZ RU EN

Ana səhifə / Dünya / Ermənistanda hakimiyyət böhranı...

Ermənistanda hakimiyyət böhranı...

28.04.2021 [09:40]

Məlum olduğu kimi, Ermənistanda növbədənkənar parlament seçkilərinin keçirilməsi üçün baş nazir Nikol Paşinyan 25 apreldə istefa verib. Bununla da məğlub ölkədə növbəti hakimiyyət böhranı yaranıb. Yerli mətbuatın yazdığına görə, hakimiyyətin əsas opponentləri deputatları “parlament çevrilişi” yolu ilə hakimiyyəti devirməyə çağırırlar. Buna baxmayaraq, hakim komanda seçki hazırlıqlarını davam etdirir. Belə ki, parlamentin sədri Ararat Mirzoyan aprelin 26-da prezidentin imzalamaqdan imtina etdiyi “Seçki məcəlləsinə dəyişiklik və əlavələr edilməsi haqqında” qanunu təsdiq edib. Bununla da proporsional seçki sisteminin bərpa edilməsi qüvvəyə minib.
Bu arada, “News.am” yazır ki, parlamentin spikeri A.Mirzoyan baş nazirin istefasından sonrakı proseduru da açıqlayıb. Spiker bildirib ki, Ermənistanın yeni baş nazirinin seçilməsi məsələsi 3 may tarixində parlamentin xüsusi iclasında müzakirə ediləcək. Xəbərdə o da qeyd edilir ki, “Mənim addımım” fraksiyası 3 mayda parlamentdə keçirilən səsvermədə Paşinyanın baş nazir vəzifəsinə namizədliyini irəli sürəcək, ancaq onu baş nazir seçməyəcək. Çünki bu proses parlamentin buraxılması və növbəndənkənar parlament seçkilərinin keçirilməsi üçün lazımdır. Baş nazir seçilməsə, yeddi gün ərzində yeni seçkilər keçiriləcək. Baş nazir səs çoxluğu ilə yenidən seçilməsə, parlament buraxılacaq və növbəndənkənar seçkilər elan ediləcək.
Qeyd edək ki, indiki siyasi böhran dövründə Paşinyan hakimiyyətini qorumaq üçün seçkilərə qədər baş nazir vəzifəsini özü icra edəcək. Lakin N.Paşinyanın bu cəhdinin qanuna zidd olduğu barədə müxtəlif fikirlər səslənir. Panorama.am” yazır ki, növbəti belə bir ittihamla eks-prezident Levon Ter-Petrosyan çıxış edib. Onun sözlərinə görə, bu qanun pozuntusuna qarşı seyrçi qalan parlamentdəki müxalifət partiyaları konstitusiyaya zidd addıma görə məsuliyyət daşıyırlar. Ter-Petrosyan konstitusiya məhkəməsinin keçmiş aparat rəhbəri Edqar Kazaryanın “Yerevan today”də yer alan “Konstitusiyaya görə, istefadan sonra baş nazirin vəzifəsində qalmaq hüququ yoxdur” məqaləsindəki arqumentləri ciddi qəbul etməyə çağırıb: “Ermənistan prezidentini, konstitusiya məhkəməsinin rəhbərliyini, Paşinyanla məxfi razılaşmaya gedən “Çiçəklənən Ermənistan” və “Maariflənən Ermənistan” partiyalarını məsələyə ciddi yanaşmağa çağırıram”.
Yeri gəlmişkən, onu da xatırladaq ki, parlamentdə təmsil olunan siyasi partiyalar seçkiyə hazırlaşsalar da, seçkiləri çıxış yolu hesab etməyən bəzi müxailf qüvvələr hadisələrin inkişafından narahatdırlar. Məsələn, “Aysor.am”ın yazdığına görə, Respublikaçı partiyanın sədrinin müavini Armen Aşotyan hökumətin istefasını şərh edərkən deyib ki, parlamentdaxili qüvvələr cəsarət toplayıb baş nazir postuna başqa bir namizəd irəli sürərsə, bu hökumətdən və Ermənistanı məhv olmaqdan xilas etmək üçün fürsət yaranacaq: “Çünki ölkə daxilində, xüsusən də Paşinyanın rəhbərliyi altında seçkilərin keçirilməsi üçün hazırda heç bir ictimai tələb yoxdur”.
Göründüyü kimi, Paşinyan hakimiyyətini qorumaq üçün qanun pozuntusuna rəvac verir. Eyni zamanda, ekspertlər indiki hakimiyyətin rəhbərliyi altında seçkilərin keçirilməsi üçün hazırda ictimai tələb olmadığını bildirirlər. Bu halda, seçkilərin məğlub Ermənistanda hökm sürən böhranı aradan qaldıracağı ehtimalı şübhə doğurur.
Qaşqay ZİYƏDDİNOĞLU

Paylaş:

Baxılıb: 850 dəfə