Növbədənkənar parlament seçkilərindən sonra Ermənistanda siyasi gərginlik daha da artıb

Bakı:

16 °C

77 %

10 m/s

Əlaqə

AZ RU EN

Ana səhifə / Dünya / Növbədənkənar parlament seçkilərindən sonra Ermənistanda siyasi gərginlik daha da artıb

Növbədənkənar parlament seçkilərindən sonra Ermənistanda siyasi gərginlik daha da artıb

01.07.2021 [09:06]

Ermənistanda növbədənkənar parlament seçkilərindən sonra siyasi gərginlik daha da artıb. Erməni mediası yazır ki, buna səbəb müxalifət bloklarının seçkilərin yekun nəticələrindən konstitusiya məhkəməsinə şikayət etməsidir. Onlar seçkilərin nəticələrinin ləğv olunmasını tələb edirlər. Ancaq həmin bloklar parlamentdə qazandıqları mandatdan da imtina etmək fikrində deyillər. Belə ki, parlamentdaxili mübarizəyə hazır olduğunu nümayiş etdirən müxalifətin qənaətinə görə, hökumət əvvəlki qaydada fəaliyyət göstərməyə davam etdiyi halda, ilyarımdan sonra yenidən növbədənkənar seçkilərin keçirilməsi qaçılmaz olacaq. Göründüyü kimi, bu hal Ermənistana heç də sabit gələcək vəd etmir. Yəni bu açıqlamalar ondan xəbər verir ki, Paşinyan hakimiyyəti yeni hökuməti qursa belə, uğur qazanmayacaq.
Bu arada, Paşinyanın komandasında artıq vəzifə uğrunda mübarizə gedir. “Joğovurd” qəzeti öz mənbələrinə istinadən yazır ki, hakim “Vətəndaş müqaviləsi” partiyasında “vəzifə bölgüsü” prosesi başlayıb. Qəzetin yazdığına görə, hələlik bu proses baş nazir səlahiyyətlərini icra edən Nikol Paşinyanın iştirakı olmadan başlayıb: “Əldə etdiyimiz məlumata görə, “Vətəndaş müqaviləsi” partiyasının üzvləri müzakirələr zamanı, xüsusilə fraksiyanın hazırkı lideri Lilit Makuntsun yerinə kimin seçiləcəyini müəyyənləşdirməyə girişiblər. Belə ki, L.Makuntsun Ermənistanın ABŞ-dakı səfiri vəzifəsinə təyinatı günəmdə olduğundan Hayk Koncoryan və Arpi Davoyan hakim fraksiyanın parlamentdəki rəhbəri vəzifəsinə iddialıdırlar. Parlament sədri vəzifəsi uğrunda da fəal mübarizə gedir. Ararat Mirzoyan, Alen Simonyan və Suren Papikyan bu posta real namizəddirlər. Lakin partiya Ararat Mirzoyanın spiker vəzifəsində qalmasını təmin etməyə daha çox meyillidir”.
Bu məqamda onu da vurğulayaq ki, bəzi ekspertlər seçkilərin nəticəsinə fərqli yanaşma nümayiş etdirirlər. Məsələn, “News.am”ın yazdığına görə, “Sosial ədalət naminə” partiyasının rəhbəri Arman Qukasyan deyib ki, seçicilərin az qala 50 faizinin seçkilərdə iştirak etməməsi cəmiyyətdə seçkilərə qatılanlardan fərqli, yeni siyasi qüvvələrə tələbat olduğunu göstərir. Onun sözlərinə görə, növbədənkənar parlament seçkiləri cəmiyyətin ciddi şəkildə qütbləşdiyini göstərir: “Bu isə narahatlıq yaradır, çünki qütbləşmə davam edərsə, ölkədə böhran daha da güclənəcək. Budəfəki seçkiqabağı kampaniyanın öncəkilərdən əsas fərqləndirici xüsusiyyəti siyasi qüvvələr tərəfindən seçicilərə Ermənistanı böhrandan çıxarmaq üçün konkret proqramlar təklif edilməməsi idi. Bunun əvəzində iqtidar və müxalifət bir-birilərini nüfuzdan salmaq məqsədi güdürdülər”.
Beləliklə, ekspertlər seçkilərin nəticələrinin Ermənistanı böhrandan çıxarmadığını, əksinə, növbədənkənar parlament seçkilərinin cəmiyyətdə ciddi qütbləşmə yaratdığını bildiriblər.
Qaşqay ZİYƏDDİNOĞLU

Paylaş:

Baxılıb: 764 dəfə