Paşinyan çıxılmaz vəziyyətə düşüb

Bakı:

14 °C

88 %

7 m/s

Əlaqə

AZ RU EN

Ana səhifə / Dünya / Paşinyan çıxılmaz vəziyyətə düşüb

Paşinyan çıxılmaz vəziyyətə düşüb

15.07.2021 [09:07]

İyunun 20-də Ermənistanda keçirilən növbədənkənar parlament seçkilərinin yekun nəticələri iyunun 27-də elan olunsa da, parlamentin iyulun 3-ə nəzərdə tutulan ilk iclası baş tutmayıb. Ona görə ki, müxalifətin tələbi ilə artıq 6 gündür konstitusiya məhkəməsi (KM) seçkilərin nəticələrinin ləğvi məsələsini müzakirə edir. Erməni KİV-i yazır ki, KM-ə ilk müraciət iyulun 1-də daxil olduğu üçün məsələnin müzakirəsinin 17 iyula qədər başa çatması gözlənilir.
Qeyd edək ki, 17 iyulda hansı qərar veriləcəyini proqnozlaşdırmağın çətin olmasına baxmayaraq, hakimiyyət müxtəlif vəzifələrə namizəd məsələsini müzakirə etməkdədir. “Past” qəzeti yazır ki, müzakirələrin nəticəsi olaraq Mərkəzi bankın keçmiş sədri Artur Cavadyan və Paşinyanın ən sadiq “silahdaşları”ndan biri olan ərazi idarəetmə və infrastruktur naziri Suren Papikyan baş nazirin müavinləri təyin edilə bilərlər. Qəzetin yazdığına görə, ən çətin məsələ xarici işlər nazirinin təyinatı ilə bağlıdır.
“Hraparak” qəzeti isə yazır ki, 31 may tarixində xarici işlər naziri Ara Ayvazyanın istefasından sonra xarici siyasət idarəsinə rəhbərin axtarışı davam edir: “Əldə etdiyimiz məlumata görə, Paşinyan çıxılmaz vəziyyətdədir, bu posta namizəd tapa bilmir. Müxtəlif şəxslər - Ruben Rubinyan, Ararat Mirzoyan, Mher Qriqoryan və hətta David Tonoyanın adları hallanır. Ararat Mirzoyan artıq bu vəzifədən imtina edib”.
Yeri gəlmişkən, baş nazir vəzifəsini icra edən Paşinyan 14 iyulda Armen Qriqoryanı təhlükəsizlik şurasının katibi vəzifəsindən azad edərək Ermənistan xarici işlər nazirinin birinci müavini vəzifəsinə təyin edib. Son günlərdə mediada və sosial şəbəkələrdə TŞ-nin katibi A.Qriqoryanın XİN rəhbəri təyin ediləcəyi barədə də xəbərlər yayılmaqdadır. Xatırladaq ki, xarici işlər naziri A.Ayvazyan istefa verdikdən sonra məhz A.Qriqoryan onu Ermənistanın təhlükəsizlik məsələlərinə zərbə vurmaq, xüsusən də erməni hərbçilərin qaytarılması prosesini əngəlləməkdə günahlandırmışdı.
“Joğovurd” qəzeti isə öz mənbələrinə istinadən hakim “Mənim addımım” fraksiyasının nümayəndələrinin baş nazir səlahiyyətlərini icra edən Paşinyanla görüşdüyünü yazıb. Nəşrin məlumatına görə, Paşinyan sədri olduğu “Vətəndaş müqaviləsi” partiyasının parlamentdə mandat qazanan yeni deputatlarının siyahısını, habelə spiker, vitse-spiker, fraksiya sədri və katibi vəzifələrinə namizədləri şəxsən komandaya təqdim etmək qərarına gəlib: “Mənbələrimizin verdiyi məlumata görə, hakim fraksiya, demək olar ki, “Vətəndaş müqaviləsi” partiyasının idarə heyətinin qərarı ilə barışıb. Belə ki, fraksiya nümayəndələrinin mühüm bir hissəsi, xüsusilə vitse-spiker vəzifəsinə Ruben Rubinyan və Hakop Arşakyanın namizədliyi ilə razılaşmırlar, lakin bu qərara heç bir şəkildə təsir edə bilmədikləri üçün səslərini çıxarmırlar”.
Qəzetin yazdığına görə, Paşinyan görüşdə parlamentdə fərqli bir müxalifət təmsil olunduğu üçün hakim fraksiyanı daha ayıq-sayıq olmağa çağırıb.
Beləliklə, seçkilərin nəticələrinin ləğv edilməsi ilə bağlı müxalifətin tələbinə konstitusiya məhkəməsində baxılması Ermənistandakı gərginliyi daha da artırıb. Digər tərəfdən, yeni hökumətin formalaşdırılması ərəfəsində Paşinyan hakimiyyəti idarəetmə üçün kadr tapa bilmədiyindən olduqca çıxılmaz vəziyyətə düşüb.
Qaşqay ZİYƏDDİNOĞLU

Paylaş:

Baxılıb: 776 dəfə