Dövlətçilik və Milli qürur simvolu

Bakı:

15 °C

47 %

13 m/s

Əlaqə

AZ RU EN

Ana səhifə / YAP xəbərləri / Dövlətçilik və Milli qürur simvolu

Dövlətçilik və Milli qürur simvolu

12.11.2025 [14:56]

9 Noyabr Azərbaycan Respublikasının Dövlət Bayrağı Günü xalqımızın milli kimliyinin, dövlətçilik düşüncəsinin və müstəqillik iradəsinin parlaq ifadəsidir. Bu tarix Azərbaycan xalqının yüzilliklər boyu azadlıq, milli özünüdərk və suverenlik uğrunda apardığı mübarizənin rəmzi kimi yaddaşımıza həkk olunub. Dövlət Bayrağı sadəcə bir rəmz deyil, xalqımızın mənəvi birliyini, milli dəyərlərini və azadlıq əzmini birləşdirən müqəddəs simvoldur.

1918-ci ildə Cümhuriyyətin süqutundan sonra Azərbaycan Sovet İttifaqının tərkibinə daxil edildi və üçrəngli bayraq dövlət rəmzi kimi istifadədən çıxarıldı. Lakin o, xalqın yaddaşında, ürəyində, gizli şəkildə milli varlığımızın simvolu kimi yaşamaqda davam etdi. 20-ci əsrin sonlarında SSRİ-nin dağılması ərəfəsində Azərbaycan xalqı yenidən azadlıq hərəkatına başladı və bu mübarizənin önündə məhz üçrəngli bayrağımız dayanırdı. Bayraq meydanlarda, mitinqlərdə, azadlıq yürüşlərində milli mübarizənin, xalq iradəsinin və azadlıq istəyinin rəmzinə çevrildi.

1991-ci il oktyabrın 18-də Azərbaycanın dövlət müstəqilliyi bərpa olundu və bu müstəqilliyin rəsmi rəmzi kimi üçrəngli bayrağımız yenidən ucaldıldı. 1991-ci il noyabrın 5-də Azərbaycan Respublikasının Ali Sovetində qəbul edilən qərarla üçrəngli bayraq Azərbaycanın dövlət bayrağı kimi təsdiqləndi. Bununla da, Azərbaycan Xalq Cümhuriyyətinin idealları müstəqil dövlətimizdə davam etdirildi və tarixi ədalət bərpa olundu.

Ulu Öndər Heydər Əliyev dövlət rəmzlərimizin qorunması və gənc nəsillərə aşılanması istiqamətində mühüm addımlar atdı. Onun təşəbbüsü ilə Azərbaycanın dövlət atributları bayraq, gerb və himn milli ideologiyanın əsas sütunlarına çevrildi. 2009-cu il noyabrın 17-də Prezident İlham Əliyevin imzaladığı sərəncamla 9 noyabr tarixi Azərbaycan Respublikasının Dövlət Bayrağı Günü elan edildi. Bu qərar həm tariximizə dərin hörmətin, həm də müasir dövlətçiliyimizin ideoloji əsaslarına olan sadiqliyin göstəricisi idi.

Bu gün Dövlət Bayrağı Günü ölkənin hər yerində xüsusi təntənə ilə qeyd olunur. Hər bir azərbaycanlı bu gün öz evində, iş yerində, küçədə üçrəngli bayrağı sevgi və qürurla dalğalandırır. Bakıda ucaldılmış Dövlət Bayrağı Meydanı Azərbaycan xalqının milli iftixarının rəmzidir. Meydanın mərkəzində 162 metr hündürlüyündə bayraq dirəyi ucalır ki, bu da ölkəmizin dövlət rəmzinə göstərdiyi ehtiramın bariz nümunəsidir. Burada dalğalanan bayraq hər kəsə azadlığın, müstəqilliyin və milli qürurun nə qədər dəyərli olduğunu xatırladır.

Azərbaycanın ərazi bütövlüyü uğrunda gedən mübarizələrdə də bayrağımız xüsusi rəmzi məna daşıyır. 2020-ci ilin Vətən müharibəsində əsgərlərimiz Azərbaycan bayrağını işğaldan azad edilmiş torpaqlarda ucaltdılar. Şuşada, Cəbrayılda, Füzulidə, Zəngilanda, Qubadlıda və Laçında dalğalanan bayraq şəhidlərimizin qanı bahasına qazanılmış qələbənin, milli qürurun və dövlət müstəqilliyimizin əbədi simvoluna çevrildi. Bu mənzərə hər bir azərbaycanlının qəlbində ömürlük fəxarət hissi oyatdı.

Dövlət Bayrağı Günü təkcə bir rəsmi bayram deyil, həm də xalqımızın birliyini və vətənpərvərlik ruhunu daha da gücləndirən mənəvi bayramdır. Bu gün gənc nəsil milli dəyərlərimizi daha dərindən dərk edir, azərbaycançılıq ideologiyasına sadiq qalmağın, dövlət rəmzlərinə hörmət etməyin vacibliyini anlayır.

Azərbaycanın üçrəngli bayrağı bu gün dünyanın bir çox ölkəsində səfirliklərimizdə, beynəlxalq tədbirlərdə, idman arenalarında və diaspor təşkilatlarında qürurla dalğalanır. Hər dəfə idmançımız qalib gələndə və səhnəyə Azərbaycan bayrağı qaldırılanda, hər bir azərbaycanlı bu qüruru öz qəlbində yaşayır.

9 Noyabr Dövlət Bayrağı Günü xalqımızın tarixində əbədi bir yer tutmuşdur. Bu gün bizə həm keçmişimizin şanlı səhifələrini xatırladır, həm də gələcək nəsillərə vətənə sevgi, dövlətə sədaqət, müstəqilliyə hörmət hissini aşılayır. Üçrəngli bayrağımız azad, güclü və müstəqil Azərbaycanın rəmzidir. O, daim ucalarda dalğalanacaq, xalqımızın birlik və qürur simvolu olaraq gələcək nəsillərə ötürüləcək.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 437 dəfə