Rəcəb Tayyib Ərdoğan bir daha xatırlatdı: Şuşada Türkiyənin konsulluğu açılacaq

Bakı:

21 °C

58 %

3 m/s

Əlaqə

AZ RU EN

Ana səhifə / Siyasət / Rəcəb Tayyib Ərdoğan bir daha xatırlatdı: Şuşada Türkiyənin konsulluğu açılacaq

Rəcəb Tayyib Ərdoğan bir daha xatırlatdı: Şuşada Türkiyənin konsulluğu açılacaq

22.10.2022 [10:28]

NARDAR

Türkiyə Prezidenti Rəcəb Tayyib Ərdoğanın oktyabrın 20-də ölkəmizə səfər edərək Zəngilan Beynəlxalq Hava Limanının açılışında iştirak etməsi, eləcə də digər tədbirlərə qatılması, Şərqi Zəngəzurun bərpası istiqamətində bir sıra layihələrin təməlini Azərbaycan Prezidenti

İlham Əliyevlə birgə atması dövlətlərimizin qardaşlığının növbəti bir nümunəsidir. Rəcəb Tayyib

Ərdoğan Azərbaycan səfərindən qayıdarkən jurnalistlərə açıqlamasında Türkiyənin Şuşa şəhərində konsulluğunun açılacağını bildirib. Əslində, konsulluğun açılacağı barədə məlumatı Türkiyə Prezidenti ötən ilin iyun ayında Şuşa Bəyannaməsinin imzalanması mərasimi zamanı vermişdi. Bu məsələnin yenidən gündəmə gətirilməsi isə qardaş Türkiyənin müttəfiqlikdən doğan bütün addımları atacağını göstərir.

Mövzu ilə bağlı qəzetimizə açıqlama verən politoloq Ramiz Alıyev bildirib ki, bu gün dünyada Türkiyə və Azərbaycan qədər bir-birinə mənəvi-siyasi cəhətdən yaxın olan ölkələr tapmaq mümkün deyil. İki ölkənin münasibətləri unikal bir nümunəyə çevrilib. Dövlətlərarası strateji əlaqələrlə yanaşı, ortaq tarix və milli-mənəvi dəyərlər xalqlarımızın sıx birliyini və həmrəyliyini təmin edən amillərdir. Onun sözlərinə görə, Bakı ilə Ankara arasında diplomatik münasibətlərin qurulduğu 30 ildən artıq müddət bir çox əlamətdar hadisələrlə, önəmli məqamlarla zəngindir, elə tarixin özüdür: “Ötən dövrün mənzərəsinə nəzər saldıqda belə qənaətə gəlmək olur ki, iki ölkə bu müddət ərzində əsrə bərabər inkişaf yolu keçib, dostluq, qardaşlıq və müttəfiqlik münasibətləri ən yüksək nöqtəyə - zirvəyə çatıb. Ölkələrimiz arasında siyasi münasibətlər ən yüksək səviyyədədir. İqtisadi-ticari əlaqələr də uğurla inkişaf edir. Azərbaycan Türkiyədə, Türkiyə isə Azərbaycanda ən böyük sərmayədarlardan biridir. Bakı-Tbilisi-Ceyhan neft, Bakı-Tbilisi-Ərzurum qaz kəmərləri, Bakı-Tbilisi-Qars dəmir yolu, TANAP, TAP kimi birgə layihələr regional və beynəlxalq təhlükəsizliyə, əməkdaşlığa mühüm töhfələr verir. Bunlarla yanaşı, Azərbaycan və Türkiyə daim bir-birini ən yüksək səviyyədə dəstəkləyir, hər iki ölkənin milli maraqlarının qorunmasında qətiyyətli mövqe nümayiş etdirirlər”.

Politoloq qeyd edib ki, Şuşada Türkiyənin konsulluğunun açılması tərəflər arasında müttəfiqlik bəyannaməsindən irəli gələn məsələdir: “Azərbaycan ilə Türkiyə Şuşa Bəyannaməsini imzalamaqla müttəfiqlik münasibətlərinin strateji xarakterini və ən yüksək səviyyədə olduğunu bir daha təsdiqləyiblər. Şuşa Bəyannaməsində beynəlxalq müstəvidə birgə fəaliyyət və əməkdaşlıq, siyasi, iqtisadi, mədəni, humanitar və digər sahələrdə əlaqələrin inkişafı, xüsusilə də hər iki ölkənin milli və birgə təhlükəsizliyi ilə əlaqədar çox vacib məsələlər əks olunub. Ən əsası, Bəyannamə müstəqillik, suverenlik, ərazi bütövlüyü, beynəlxalq səviyyədə tanınmış sərhədlərin toxunulmazlığı, dövlətlərin daxili işlərinə qarışmamaq prinsiplərini rəhbər tutan, milli maraq və mənafeləri müdafiə və təmin etməyə yönəlmiş müstəqil xarici siyasət həyata keçirən hər iki ölkə tərəfindən müttəfiqlik münasibətlərinin qurulmasının siyasi və hüquqi mexanizmlərini müəyyənləşdirmək baxımından mühüm əhəmiyyət kəsb edir. Şuşada Türkiyənin konsulluğunun açılmasının nəzərdə tutulması isə onu göstərir ki, Türkiyə hər zaman Azərbaycanın yanında olacaq. O cümlədən, Şuşaya hansısa kənar xarici qüvvə başqa gözlə baxa bilməyəcək”.

Həmsöhbətimiz deyib ki, gerçəkliklər iki dost, qardaş, strateji tərəfdaş ölkənin ortaq siyasi iradəsini, birlikdə yeni tarixi nailiyyətlər qazanmaq niyyətini, əzmini əks etdirir. Bir daha sübuta yetirilir ki, Azərbaycan-Türkiyə dostluğu və strateji tərəfdaşlığı bənzərsiz bir nümunədir.

Paylaş:

Baxılıb: 663 dəfə