“Airbus”lə birlikdə səkkiz şirkət Almaniyaya altıncı nəsil döyüş təyyarəsi təklif edib

Bakı:

28 °C

47 %

9 m/s

Əlaqə

AZ RU EN

Ana səhifə / Dünya / “Airbus”lə birlikdə səkkiz şirkət Almaniyaya altıncı nəsil döyüş təyyarəsi təklif edib

“Airbus”lə birlikdə səkkiz şirkət Almaniyaya altıncı nəsil döyüş təyyarəsi təklif edib

10.06.2026 [20:33]

Avropanın gələcəyin döyüş təyyarəsini yaratmağı hədəfləyən SCAF (Gələcəyin Hava Döyüş Sistemi) layihəsinin rəsmi olaraq dayandırılmasından dərhal sonra Almaniyada yeni hərbi aviasiya təşəbbüsü gündəmə gəlib. “Airbus” da daxil olmaqla səkkiz şirkət Berlində hakimiyyətə altıncı nəsil döyüş təyyarəsinin hazırlanmasını nəzərdə tutan yeni layihə təqdim edib.

AZƏRTAC xəbər verir ki, “Team Gen 6” adlı sənaye konsorsiumu Almaniyanın müdafiə naziri Boris Pistoriusa altıncı nəsil qırıcı təyyarənin hazırlanması ilə bağlı rəsmi təklif göndərib.

Məlumatı təsdiqləyən tərəflərdən biri Almaniyanın radar və sensor texnologiyaları istehsalçısı “Hensoldt” şirkəti olub. Yeni layihədə “Dassault Aviation” iştirak etmir.

“Financial Times”ın yazdığına görə, “Team Gen 6” aşağıdakı şirkətləri birləşdirir: “Airbus Defence and Space”, Fransanın raket sistemləri istehsalçısı MBDA, Almaniyanın “Hensoldt” şirkəti, “Rohde & Schwarz” elektron texnologiyalar qrupu, “MTU Aero Engines” mühərrik istehsalçısı, “Liebherr”, “Autoflug”, “Diehl Defence”.

Şirkətlərin əksəriyyəti məsələ ilə bağlı şərh verməkdən imtina etsə də, layihənin rəsmi təqdimatının iyunun 11-də Berlində keçiriləcək ILA Beynəlxalq Aerokosmik Sərgisində elan ediləcəyi gözlənilir.

Almaniyanın müdafiə naziri Boris Pistorius bir müddət əvvəl ölkəsinin yeni nəsil döyüş təyyarəsinin hazırlanması üçün alternativ tərəfdaşlar axtardığını açıqlamışdı. Onun sözlərinə görə, Berlin artıq bir neçə aydır müxtəlif sənaye tərəfdaşları ilə bu istiqamətdə danışıqlar aparır.Hazırda “Airbus” Böyük Britaniya, Almaniya, İtaliya və İspaniya ilə birlikdə “Eurofighter Typhoon” qırıcılarının istehsalında iştirak edir. Lakin bu təyyarələrin gələcəkdə yeni nəsil platforma ilə əvəz olunması nəzərdə tutulur. Məhz buna görə Almaniya və “Airbus” yeni layihənin mümkün qədər tez həyata keçirilməsinin vacibliyini vurğulayırlar. Bu baxımdan Berlinin yanaşması Fransa və “Dassault”un “Rafale” proqramı ilə bağlı daha müstəqil strategiyasından fərqlənir.

SCAF layihəsinin bağlanması Avropa müdafiə sənayesində yeni mərhələnin başlanğıcı kimi qiymətləndirilir. İndi əsas sual Almaniyanın rəhbərlik edəcəyi yeni təşəbbüsün Avropanın gələcək hava qüvvələrinin formalaşmasında hansı rolu oynayacağıdır.

Paylaş:

Baxılıb: 443 dəfə