Əsrlərin sınağından keçmiş qardaşlıq

Bakı:

26 °C

60 %

7 m/s

Əlaqə

AZ RU EN

Ana səhifə / YAP xəbərləri / Əsrlərin sınağından keçmiş qardaşlıq

Əsrlərin sınağından keçmiş qardaşlıq

17.11.2025 [21:07]

Azərbaycan və Özbəkistanı birləşdirən bağlar təkcə coğrafi məkanla məhdudlaşmır; bu dostluğun kökləri dərin tarixi-mədəni əlaqələrə, ortaq dini və mənəvi dəyərlərə, əsrlər boyu formalaşmış adət-ənənələrə əsaslanır. Hər iki xalq türk dünyasının ayrılmaz hissəsi olmaqla, dil, mədəniyyət və düşüncə yaxınlığı baxımından bir-birinə olduqca yaxındır. Bu yaxınlıq tarix boyunca müxtəlif istiqamətlərdə özünü göstərmiş, xalqlarımızın bir-birinə olan münasibətini daha da möhkəmləndirmişdir. Azərbaycanın və Özbəkistanın tarixi inkişaf yoluna nəzər yetirdikdə, hər iki ölkə Səfəvilər dövründən tutmuş Çingizilər və Teymurilər epoxalarına qədər bir çox ortaq səhifələrə malikdir. Mədəniyyətlərimizdəki oxşarlıqlar isə bu tarixi paralellərin təbii nəticəsidir. Muğam və məqam ənənələri, xalq yaradıcılığı, poeziyada klassik irs, xüsusilə də Nizami, Füzuli, Nəvai kimi dahilərin yaradıcılığı dövlətlərimiz arasında mədəni körpülərin qurulmasında mühüm rol oynamışdır. Ortalıq mədəniyyət zonasında formalaşmış bu zəngin irs bu gün də hər iki xalqın qürur mənbəyidir. Azərbaycan və Özbəkistan xalqları üçün ortaq dini dəyərlər də xüsusi əhəmiyyət kəsb edir. İslam mədəniyyəti həm mənəvi dünyagörüşümüzü formalaşdırmış, həm də xalqlarımız arasında qarşılıqlı hörmət və anlayışı daha da gücləndirmişdir. Qonaqpərvərlik, böyüyə hörmət, ailə dəyərlərinə bağlılıq kimi ortaq adət-ənənələr toplumlarımızı bir-birinə daha da yaxınlaşdırır. Bu gün Azərbaycan və Özbəkistan yalnız tarixdə deyil, həm də müasir dövrdə strateji tərəfdaşlıq münasibətləri qurmuş ölkələrdir. Siyasi, iqtisadi, humanitar sahələrdə əlaqələr sürətlə inkişaf edir. Prezidentlər səviyyəsində qarşılıqlı səfərlər, imzalanan əməkdaşlıq sənədləri və birgə layihələr bu əlaqələrin davamlılığını və perspektivlərini daha da genişləndirir. Mədəniyyət günləri, tələbə mübadiləsi, incəsənət və kino festivalları isə xalqlarımız arasında mənəvi əlaqələrin güclənməsinə töhfə verir. Bütün bu amillər göstərir ki, Azərbaycan–Özbəkistan münasibətləri təkcə dövlətlərarası əməkdaşlıq deyil, həm də əsrlərə söykənən qardaşlıq münasibətləridir. Tarixi köklər, ortaq mədəniyyət, dini və mənəvi dəyərlər, adət-ənənələr bu qardaşlığı daim yaşatmış, bu gün də iki xalqın bir-birinə olan sevgisinin və etimadının əsasını təşkil edir. Bu birliyin gələcəkdə daha da inkişaf edəcəyi və regionda sabitlik, sülh və tərəqqiyə xidmət edəcəyi şübhəsizdir.

Nicat Quliyev

YAP Laçın rayon təşkilatının məsləhətçisi

Paylaş:

Baxılıb: 459 dəfə