Ağdamın azad olunması və yenidənqurulması Azərbaycan dövlətçiliyinin və xalq birliyinin bariz təzahürüdür

Bakı:

26 °C

63 %

8 m/s

AZ RU EN

Ana səhifə / YAP xəbərləri / Ağdamın azad olunması və yenidənqurulması Azərbaycan dövlətçiliyinin və xalq birliyinin bariz təzahürüdür

Ağdamın azad olunması və yenidənqurulması Azərbaycan dövlətçiliyinin və xalq birliyinin bariz təzahürüdür

18.11.2025 [21:19]

20 Noyabr – Ağdam Şəhəri Günüdür və bu gün şəhərin azad edilməsinin ildönümü kimi qeyd olunur. Prezident İlham Əliyevin 2023-cü il iyulun 31-də imzaladığı sərəncama əsasən, Ağdamın işğaldan azad edildiyi bu tarix hər il xüsusi gün kimi xatırlanır.

2020-ci il sentyabrın 27-də Ermənistanın hərbi hücumuna qarşı başlanan əks-hücum əməliyyatında Azərbaycan Ordusunun əsgər və zabitləri böyük igidlik və qəhrəmanlıq nümayiş etdirdilər. Onların misilsiz şücaəti və xalq-ordu-iqtidar birliyi nəticəsində otuz ilə yaxın düşmən işğalı altında olan torpaqlarımız 44 gün ərzində azad edildi. Bu Qələbə nəticəsində Ermənistan kapitulyasiya aktını imzalamağa və əraziləri boşaltmağa məcbur oldu. Ağdam rayonunun işğal altında qalan hissəsi isə bir güllə atılmadan Azərbaycana təhvil verildi.

Azad edilən Ağdamda dərhal geniş tikinti və quruculuq işlərinə başlanıldı. Ərazisinin çox hissəsi minalı olmasına baxmayaraq, təmizləmə işləri aparılıb, şəhərin sosial və infrastruktur xəritəsi tamamilə yeni və müasir şəkildə qurulub. Ötən illərdə “Ağdam-1” və “Ağdam-2” elektrik yarımstansiyaları, “Qarabağ” Regional Elektrik Şəbəkəsinin Rəqəmsal İdarəetmə Mərkəzi, Zəfər və İşğal muzeyləri, Ağdam Sənaye Parkı və yeni yaşayış kompleksləri inşa olunub. Həmçinin dəmir yolu vağzalının tikintisi nəzərdə tutulur.

Qarabağ xanlığının banisi Pənahəli xanın sarayının yerləşdiyi İmarət Kompleksi bərpa edilib, şəhərdə tamaşaçı tutumu 15 min nəfər olan yeni stadion inşa olunur. 2022-ci il oktyabrın 4-də Prezident İlham Əliyev və birinci xanım Mehriban Əliyeva şəhərin müxtəlif kəndlərində və şəhər daxilində yeni layihələrin təməlqoyma mərasimlərində iştirak ediblər. Heydər Əliyev Fondu tərəfindən Ağdam Cümə Məscidində bərpa işləri aparılıb.

Ağdamın tarixi zənginliyi və mədəni irsi işğal dövründə ciddi ziyan görmüşdü. Otuz ilə yaxın müddətdə rayonun bütün sərvətləri talan edilmiş, meşələr və təbii sərvətlər məhv edilmişdi. Bununla yanaşı, tarixi abidələr, sənət və mədəniyyət obyektləri dağıdılmışdı. Lakin Azərbaycan xalqı bu taleyə boyun əymədi. 44 günlük Vətən Müharibəsində qazanılan Qələbə nəticəsində Ağdam və bütün Qarabağ torpaqları azad edildi, insan tələfatının qarşısı alındı və “Ağdamın azad olunmasına görə” medalı ilə minlərlə hərbi qulluqçu təltif olundu.

Bugünkü Ağdam – həm tarixi yaddaşın bərpası, həm də gələcəyə yönəlmiş canlı şəhərdir. İnsanlar öz ata-baba yurdlarına qayıdır, gənclər burada yaşamaq, yaratmaq və gələcəyi qurmaq arzusunda fəaliyyət göstərirlər. Salınan məktəblər, mədəniyyət evləri, idman kompleksləri, sənaye parkları həm iqtisadi, həm sosial, həm də mənəvi həyatın canlanmasına xidmət edir.

Ağdamın yenidən qurulması həm də tarixi və milli dəyərlərin bərpasıdır. Bərpa edilən abidələr, məscidlər, parklar və qəhrəmanlıq muzeyləri millətin keçmişinə göstərilən ehtiramın təzahürüdür. Burada həyata keçirilən “ağıllı şəhər”, “yaşıl enerji” və ekoloji layihələr Azərbaycanın gələcəyə baxışının parlaq nümunəsidir. Ağdamın dirçəlişi yalnız binaların deyil, həm də xalqın iradəsinin ucaldığını göstərir.

Bu gün Ağdamın azadlığı, qayıdışı və yenidənqurulması Azərbaycan dövlətinin qüdrətinin, xalqın birliyinin və milli iradənin simvoludur. Ulu Öndər Heydər Əliyevin “Azərbaycan xalqı heç vaxt müstəqilliyini itirməyəcək” fikri bu torpaqda gerçəkliyini tapır. Ağdam həm keçmişin yaralarını sağaldır, həm də gələcəyə ümid bəxş edir.

Namiq Əhmədov

YAP Xəzər rayon təşkilatının sədri

Paylaş:

Baxılıb: 613 dəfə